Proverbs (Pidgin Bible)

Proverbs 4

Abeg click here to share dis post

Wisdom Na Oga kpatakpata

[wpdm_package id=’1217′]

  1. My son, hear wetin your papa dey teach you; put your ears for ground make you sabi understand.
  2. I dey teach you beta tin, so make you no fashi wetin I dey teach you.
  3. Wen I be boy for my papa house, wen I still small, and be di only pikin wey my mama get.
  4. My papa teach me, con tell me sey, “Hold my words wit your full heart; do wetin I tell you to do and you go live.
  5. Get wisdom, get understanding; no fashi my words or turn komot from di words from my mouth.
  6. No fashi wisdom and she go keep you; love her and she go protect you.
  7. Wisdom na di koko; so get wisdom. And inside everitin wey you get, make sure sey you get understanding.
  8. If you value wisdom, she go promote you; gum-body wit her and she go give you respect.
  9. She go use flower take make crown of grace for your head, con give you crown wey get levels.”
  10. Hear me my pikin, listen to di tins wey I dey tell you, and you go get long life.
  11. I don teach you for di way of wisdom, and I don carry you pass di correct ways.
  12. Notin go fit stop you wen you waka, and wen you run, you no go stagger.
  13. Hold my teachings tight, no let am go; guard am well-well, becos she be your life.
  14. No enta bad pipo way, or follow evil men waka.
  15. No reason am, no travel for dia way; komot from dia way, con waka go your own way.
  16. Dem no-fit sleep until dem do evil; dem no-fit rest until dem fall pesin.
  17. Dem dey chop di food of wickedness—con dey drink ogogoro of blood.
  18. But di way of pesin wey get clean-heart be like sun wey dey shine, wey dey shine more-more enta di perfect day.
  19. But badbelle pipo way be like darkness; dem no know wetin dey make dem stagger.
  20. My pikin, turn your ears to wetin I dey tok, listen well-well to my words.
  21. No let dem komot for your eyes, keep dem inside-inside your heart;
  22. dem be life for those pipo wey see dem, plus good health for man full body.
  23. Guard your heart well-well, becos na from there all di mata of life dey flow from.
  24. Komot your mouth from wuru-wuru; and no let bend-bend yarnings komot from your lips.
  25. Make your eyes dey look straight go front, and your eyes dey face your destiny.
  26. Reason yourself, and make all your ways stand gidigbam.
  27. No turn go right or left; waka komot from evil.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website