Genesis Chapter 7

Abeg click here to share dis post

Di Plenty-water

  1. Baba-God con yarn Noah sey, “Make you and your full house enta inside di Ark, I don see sey you be man wey get clean-heart for dis generation.
  2. And for everi clean animal, carry seven-seven—di man plus woman, and for di animals wey no clean, carry two-two—man plus woman.
  3. Take seven-seven kinds of birds—both male and female. Do am to save everi kind of birds for di earth.
  4. In seven days, I go make rain fall for di earth for forty  days plus forty nights and I go scata everitin wey I don make and wey dey alive—komot from di earth.”
  5. Naso Noah do everitin wey Baba-God tell am to do.
  6. Noah na six hundred years old wen di big-water  cover di earth.
  7. So Noah plus hin sons, hin wife and hin pikin wives, con enta di ark—becos of di big-water.
  8. And di clean animals, and di ones wey no clean, and  di birds and of everitin wey dey creep for di earth,
  9. Dem enta inside di ark [big boat], two-two—man plus  woman, as Baba-God bin tell Noah.
  10. And e happun sey afta seven days, di big-water con  cover di earth.
  11. Wen Noah be six hundred years old, for di second month and di seventeenth day of di month—di same day nahin all di water wey dey flow from underground  burst open, and di windows of heaven open for serious rain.
  12. And di rain fall for di earth for forty days plus forty  nights.
  13. Dis same day nahin dem enta di ark—Noah, Shem, Ham, plus Japhet, plus Noah sons, and Noah wife, plus di three wives of hin sons.
  14. Dem plus different-different kind of animals, everi different kind of malu, plus everi different-different kind of tins wey dey creep for di earth. And  everi different kind of birds, plus everi different types of birds.
  15. And dem follow Noah enta inside di ark. Two-two  from everi animal wey dey breath life.
  16. And di ones wey enta na man plus woman—of all animals, as Baba-God don tell am, and Baba-God lock  am inside.
  17. And di big-water cover di earth for forty days, and di water con dey plenty more-more to hold di ark, and e  raise go up from di land.
  18. Di big-water flow well-well, and e cover everitin wey  dey for di earth. So di ark con dey float for di water.
  19. Di water cover di earth well-well, plus all di high  mountains wey dey for di earth.
  20. Di water rise go up sote e con cover di mountains pass  twenty-five feet.
  21. And everi animal wey dey move for di earth con kpeme, both fawo plus malu, and animals, plus evertin wey dey creep for di earth, plus everi man.
  22. Naso evertin wey dey breath for di earth con die.
  23. Baba-God kill everitin wey get life for di earth—human being, animals, animals wey dey creep, plus birds, and everi pesin. Di only pipo wey remain na Noah, plus those pipo wey dey wit am for  inside di ark [big boat].
  24. So di water cover di earth for hundred and fifty days.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website