Genesis Chapter 20

Abeg click here to share dis post

Abraham plus Abimelech

  1. Abraham con travel from there go di south side of di kontri. He stay between Kadesh and Shur, and he travel for Gerar.
  2. So Abraham con tok sey Sarah hin wife na hin sista. Naso Abimelech di king of Gerar con send make dem  go carry Sarah come meet am.
  3. But Baba-God come meet Abimelech for night for  inside hin dream, con tell am sey, “See, you be deadbody becos of di woman wey you go carry. She be anoda man wife.”
  4. But Abimelech neva sleep wit her, he con tok sey, “Baba-God, abi you go kill nation wey get clean-heart?
  5. Abi Abraham no tell me sey, “She be my sista? And she, even shesef tok sey, “He be my broda. Na wit my  clean and innocent heart I take do dis tin.”
  6. So Baba-God tell am for hin dream sey, “Yes, I know  sey na wit clean-heart you take do dis tin; mesef nahin stop you so dat you no go commit sin against  me: so nahin make me no let you touch her.
  7. So carry di woman go give her husband; becos he be prophet, and he go pray for you, and you go live: but if you no carry her go back, make you just know sey you go surely kpeme, plus everitin wey you get go kpeme.”
  8. So Abilemech stand up for early mor-mor, con call all hin servants, he tell dem all dis tins, sote dem con dey  fear.
  9. Naso Abimelech call Abraham, con tell am sey, “Which kain tin be dis wey you con do to us? And which bad tin I do to you wey you don carry big sin  put for me and my kingdom? You don do me wetin you no suppose do to me.”
  10. Abimelech con tell am sey, “Wetin you see wey make  you do dis kain tin?”
  11. Abraham con tok sey, “Na becos I bin tink sey una no  dey fear Baba-God for dis place, and sey dem go kill me becos of my wife.
  12. But Sarah na true-true my sista, na my papa pikin, but no me my mama nahin born her, but I marry her.
  13. And e happun sey wen Baba-God make me komot from my papa house, I con tell her sey, “Na di good tin  wey you go do for me be dis: any place wey we go, make you tok sey I be you broda.”
  14. So Abimelech carry sheep plus malu, plus servants— man and woman, con give Abraham. He carry Sarah hin wife give am sef.
  15. Naso Abimelech tok sey, “Na my land dey for your front so, stay for any where wey you like.”
  16. He con tell Sarah sey, “See, I don give your broda one thousand pieces of silver to confam to all di pipo wey dey for here sey you dey innocent; everi pesin go sabi sey you neva do any wrong tin.
  17. So Abraham pray to Baba-God, and Baba-God heal Abimelech, plus hin wife and hin house-girls, and  dem born pikin for am.
  18. Becos Baba-God don sharply close all di women belle for di house of Abimelech, and hin wife, plus hin house-girls becos of Sarah and Abraham.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website