Exodus Chapter 16

Abeg click here to share dis post

Manna Plus Birds

  1. So dem start to dey waka from Elim, and all di pipo of Israel wey gada con reach di desert of Sin—wey dey between Elim and Sinai, on di fifteenth day of di second month afta dem komot from di land of Egypt.
  2. And di whole pipo of Israel wey gada con dey complain against Moses plus Aaron for inside desert.
  3. Di pipo of Israel tell dem sey, “We wish sey Baba-God use hin hand kill us for di land of Egypt wen we sidon near di pot of meat, and wen we dey chop bread belleful. Una don carry us enta desert to kill all dis pipo wey gada wit hunger.”
  4. Den Baba-God tell Moses sey, “See I go make bread fall from heaven like rain for una, and make di pipo go out to gada some food everi day, so dat I go confam dem, whether dem go follow di law or not.
  5. And e go happun sey on di sixth day dem go prepare wetin dem gada, and e go double wetin dem gada everi day.
  6. So Moses plus Aaron tell all di pikin of Israel sey, “Na for evening una go know sey na Baba-God carry una komot from Egypt.
  7. And for morning, una go see Baba-God levels, becos he dey hear una complains against Baba-God. Who we be wey una dey complain against us?”
  8. Moses still tok sey, “Baba-God go give una meat to chop dis evening, plus bread wey go belleful una for morning, becos Baba-God dey hear all una complains wey una dey complain against am; and who we be? Una complian no dey against us, but na against Baba-God.
  9. Moses con tell Aaron sey, “Tell all di pipo of Israel wey gada sey, ‘Make una come hear for Baba-God front becos he don hear una cry-cry.”
  10. E con happun sey as Aaron dey tok to all di pipo of Israel wey gada, dem look di desert side, and dem just see Baba-God levels dey show-face for cloud.
  11. Naso Baba-God tell Moses sey,
  12. “I don hear di complains of all di pikin of Israel, follow dem tok sey, ‘For evening una go chop meat, and for morning una go chop bread belleful. And una go know sey I be Baba-God wey be una Oga.”
  13. E con happun sey for evening, birds (quails) con dey fly, and dem cover di camp, and for morning, dew con dey around di whole camp.
  14. Wen di dew don go up, some small small round tins wey fine like small-small-ice con show-face for di ground of di desert.
  15.  So wen di pipo of Israel see am, dem con dey tell dem sef sey, “Na manna,” becos dem no know wetin di tin be. Naso Moses tell dem sey, “Dis na di bread wey Baba-God don give una to chop
  16. Dis na wetin Baba-God tok, ‘Make everi man gada only wetin e fit chop. Make everi pesin take about two liters for everi pesin wey dey for hin house.’ ”
  17. Di pipo of Israel do like dat, con gada, some gada more, some gada small.
  18. And wen dem measure am per liter, di pesin wey gada plenty no gada too much, and di pesin wey gada small—e own no too small. Everi man gada wetin he fit chop.
  19. Moses con tok sey, “Make no man chop am remain reach morning.”
  20. But some of dem no gree hear Moses; dem keep some part of am reach morning, but na so-so worms full inside am and e con dey smell. Moses con vex for dem.
  21. Dem gada am for morning, everi man based-on how he take dey chop reach, and wen di sun con dey hot—e melt.
  22.  E con happun sey on di sixth day, dem gada double di bread wey dem need—about four and half liters for everi single pesin instead of about two liters, so all di chiefs go meet Moses to tell am.
  23. He con tell dem sey, “Dis na wetin Baba-God tok: ‘Tomorrow go be day of rest, na holy Sabbath to Baba-God. So make una bake wetin una wan bake, and boil wetin una wan boil. Save wetin remain, con keep am until morning reach.’ ”
  24. So dem save am until morning, just as Moses tell dem to do—dem no rotten and worms no dey inside dem.
  25. Moses con tok sey, “Chop dat one today, becos today na Sabbath to Baba-God; today una no go see am for field.
  26. Una go gada am for six days, but on di seventh day wey be Sabbath, none of dem go dey.”
  27. E con happun sey some pipo con go out to gada on di seventh day, and dem no see anytin.
  28. Naso Baba-God tell Moses sey, “How long una no go gree keep my laws, con follow my words?
  29. Make una put am for inside una mind sey Baba-God don give una di Sabbath, nahin make he dey give una food for two days—on di sixth day. Make everi pesin stay for hin house, make no pesin komot from hin house on di seventh day.
  30. So di pipo rest on di seventh day.
  31. And di pipo of Israel call am Manna. E white like coriander seed and e sweet like tin cake wey dem make wit honey.
  32. So Moses tok sey, “Dis na wetin Baba-God tok: “Make una keep two liters of dis manna, becos I want make future generations see di food wey I give una wen una dey for inside desert afta I save una from Egypt.”
  33. Moses con tell Aaron sey, “Put some manna* inside container and put am for di worship-place, make future generations see am.”
  34. Aaron do wetin Baba-God tell Moses. He put di manna inside di ark, for front of di stones wit di writings of Baba-God agreement—to keep am safe.
  35. Di pikin of Israel chop manna for forty years until dem reach land wey pipo dey, dem chop manna until dem reach di border of di land of Canaan.
  36. One omar (2.19 liters) na ten percent of one ephah (21.9 liters).


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website