Exodus

Exodus Chapter 7

Abeg click here to share dis post

Moses For Pharaoh Front

1.Baba-God con tell Moses sey, “See, I don make you to be like god for Pharaoh; and Aaron your broda go be your prophet.

2. You go tok all di tins wey I don tell you to tok; and Aaron your broda go tell Pharaoh sey make he send di pikin of Israel komot from di land.

3. I go make Pharaoh get strong heart, and I go add-join my signs plus wonders for di land of Egypt.

4. But Pharaoh no go listen to you, so dat I go put my hand on top Egypt, and I go carry my armies, plus my pipo, and di pikin of Israel—komot from di land of Egypt wit ogbonge judgements.

5. Naso di Egyptians go sabi sey na me be di Oga, wen I stretch my hand for Egypt, con carry di pikin of Israel komot from dem.”

6. So Moses plus Aaron do wetin Baba-God tell dem to do.

7. Moses na eighty years and Aaron na eighty-three years old wen dem follow Pharaoh tok.

8. Baba-God con tok to Moses plus Aaron sey,

9. “Wen Pharaoh go follow una tok sey, ‘Show me one miracle,’ den you go tell Aaron sey, ‘Carry di walking-stick and make you put am for Pharaoh front and e go turn to snake.’

10. So Moses and Aaron enta go meet Pharaoh, and dem do wetin Baba-God tell dem to do. Aaron put di walking-stick for Pharaoh and hin servants front—and e turn to snake.

11. Pharaoh sef call hin wise men, plus hin jazzmen, so di jazzmen of Egypt do di same tin wit dia jazz. 

12. All di men throw dia sticks for ground and dem turn to snake, but Aaron walking-stick—wey don turn to snake con swallow all dia snake.

13. Baba-God con make Pharaoh get strong heart, so he no gree listen to dem as Baba-God bin tok.

Di Water Turn To Blood

14. Naso Baba-God tell Moses sey, “Pharaoh don get strong heart, he no gree let di pipo komot.

15. Go meet Pharaoh for morning, he dey go di river, and make you stand near river Nile to meet am, con carry di walking-stick for your hand wey bin turn to snake.

16. Naso you go tell am sey, ‘Di Oga and God of di Hebrews don send me to you sey make you let my pipo dey go—so dat dem go fit serve me for inside desert, and you no gree hear us since.

17. Naso Baba-God tok: Na inside dis tin you go take know sey na me be Oga. See, I go nack di water wit di walking-stick (staff) wey dey for my hand, and dem go turn to blood.

18. And di fish wey dey for di river go kpeme, di river go dey smell, and di Egyptian go hate to drink from di river.’ ”

19. Baba-God con tok to Moses sey, “Tell Aaron sey, ‘Carry your walking-stick make you stretch your hand for di waters of Egypt, and for di small-rivers, for di river, and for di ponds, plus di water—so dat dem go turn to blood tru-out di land of Egypt, both for inside containers wey dem make wit wood and containers wey dem make wit stones.’ ”

20. So Moses plus Aaron do wetin Baba-God tell dem to do, he carry di walking-stick take nack di water wey dey for di river for front of Pharaoh, and for front of hin servants. Naso di water wey dey for di river just turn to blood.

21. So di fish wey dey for di river die, sote di river con dey smell, and di pipo of Egypt no fit drink from di river. Naso blood con dey for all di land of Egypt.

22. Di jazzmen of Egypt do di same tin wit dia jazz, so Pharaoh heart con strong more-more, and he no gree listen to dem as Baba-God bin tok.

23. Pharaoh turn, con enta inside hin palace and he no even reason am sef.

24. All di Egyptian con dey dig round di river to get water wey dem go drink, becos dem no fit drink from di water of di river.

25. Seven days con reach afta Baba-God nack di river.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website