Leviticus

Chapter 8

Abeg click here to share dis post

Moses Bless Aaron and Hin Sons To Be Priest

1. Naso Baba-God tell Moses sey,

2. “Bring Aaron plus all hin sons, dia clothes, ororo for anointing, small-malu for di sin offering, two rams and basket wey contain bread wey dem no use yeast make,

3. con gada all of dem for di door of di worship-place.

4. So Moses do wetin Baba-God tell am to do, and all di pipo gada for di door of di worship-place.

5. Moses con tell all di pipo wey gada sey, “Dis na wetin Baba-God tell us sey we must do.”

6. Naso Moses bring Aaron plus all hin sons come front, con use water take wash dem.

7. He wear di long-sleeve-gown on Aaron, he tie belt round hin waist, den he wear am di short-sleeve-gown, con wear am di priest-cloth, naso he tie di rope of di priest-cloth wey dem weave round am.

8. And Moses put di chest-cloth on am, and he put di Urim and Thummim for di chest-cloth. (Urim and Thummim nahin dem dey use take know wetin Baba-God wan make hin pipo do).

9. And Moses put di priest-cap for hin head, con put holy gold crown on top of di priest-cap—just as Baba-God tell Moses

10. Naso Moses carry di ororo for anointing, con anoint di worship-place plus everitin wey dey inside am—to make dem holy.

11. He sprinkle some of di ororo for di altar seven times, he anoint di altar plus all di tools, plus di basin wit e stand, to make dem holy.

12. He pour some of di anointing ororo for Aaron head, con anoint am to make am holy.

13. Naso he bring Aaron sons come front, con wear di long-sleeve-gown on dem, he tie di belt round dia waist, con wear dem di special cap, just as Baba-God tell am to do.

14. Den he bring di small-malu for di sin offering, and Aaron plus all hin sons put dia hands for di small-malu head wey be for di sin offering.

15. So Moses kill di malu, con carry some of di blood, and he use hin finger take some of di blood to put round di horns of di altar. He con pour out di remaining blood for ground of di altar. Naso e take make di altar holy by making am pure.

16. Moses carry all di fat sef for di inside part, di part wey cover di liver, plus di two kidneys plus dia fat, he con burn am for di altar.

17. But he carry di rest of di small-malu, plus di skin, di meat, di intestine, con burn dem for faya wey dey outside di camp, just as Baba-God tell am.

18. He bring di ram for di burnt offering, and Aaron wit hin sons put dia hands for di ram head.

19. So Moses kill di ram, con sprinkle di blood round di sides of di altar.

20. He cut di ram to pieces, con burn di head, di pieces plus di fat.

21. He wash di inside part, plus di legs wit water, con burn di whole ram for di altar as burnt offering, sweet scent, offering wey dem make to Baba-God wit faya, as Baba-God tell Moses.

22. Naso he carry di oda ram for di ceremony to make dem priest, so Aaron plus hin sons put dia hand on di head of di ram.

23. Moses kill di ram con carry some of di blood put am for di end of Aaron right ear, and on di big-finger of hin right hand, and on di big-finger of hin right leg.

24. Moses bring Aaron sons sef come front, con put some of di blood for di end of dia right ear, for di big-finger of dia right hand, and for di big-finger of dia right leg. Naso he sprinkle di blood round di sides of di altar.

25. He carry di fat, di fat tail, all di fat wey dey for di inside part, di part wey cover di liver, di two kidneys plus dia fat, and di right shoulder.

26. Den he carry cake of bread and one wey dem make wit ororo, plus one thin-cake—from di basket of bread wey dem make wit-no yeast, wey dey for Baba-God front; he put dem for di fat portions wey and on di right shoulder.

27. He put all dis tins for Aaron hands and hin son hands, and he wave dem for Baba-God front as wave offering.

28. So Moses carry dem from dia hands, con burn dem for di altar, on top of di burnt offering. Na dis be di offering to bless priest as holy for service. Na sweet scent and special gift wey dem give to Baba-God wit faya.

29. He carry di breast sef, con wave am as wave offering to Baba-God. Na dis be Moses share from di ram of di ceremony to make dem priest, just as Baba-God bin tell am.

30. Naso Moses take some of di ororo for anointing, and some of di blood from di altar, con sprinkle am on Aaron and hin clothes, and on hin sons plus dia clothes. Naso he take make Aaron holy, hin clothes, hin sons, and hin sons clothes.

31. Moses con tell Aaron plus hin sons sey, “Cook di meat for di door of di worship-place, con chop am for there wit di bread from di basket of offering for di priest-ceremony, just as I tell una sey, ‘Aaron and hin sons go chop am.’

32. Den burn di rest of di meat plus di bread wit faya.

33. No komot from di door of di worship-place for seven days, becos na dat time di priest-ceremony go complete. Na seven days e go take to make una holy as priest.

34. Wetin we do today na wetin Baba-God tell me to do—to sacrifice for una sins to make una pure.

35. Una must stay for di door of di worship-place for day and night, for seven days, and do wetin Baba-God want, so dat una no go die; becos na Baba-God tell me.”

36. So Aaron plus hin sons do everitin wey Baba-God tell Moses to tell dem to do.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website