Exodus

Exodus Chapter 28

Abeg click here to share dis post

Di Clothes For Di Priests

1. Take Aaron your broda and hin sons wit am, from among di pipo of Israel, so dat he go serve me inside di priest office—even Aaron, Nadab and Abihu, Eleazar, and Ithamar wey be Aaron sons.

2. And you go make holy clothes for Aaron your broda—cloth wey fit di levels of priest, and to make am look fine.

3 You go tok to di pipo wey sabi—wey I don put di spirit of wisdom brekete inside dem—make dem make cloth for Aaron, to make am holy—so dat he go fit serve me as priest.

4. Na dis be di clothes wey dem go make; chest-cloth, priest-cloth, short-sleeve-gown, long-sleeve-gown wey dem weave well, priest-cap, and belt. Make dem make all dis holy clothes for your broda Aaron, plus hin sons. Make dem wear dem wen dem dey serve me as priests.

Di Priest-Cloth

5. Use only gold plus fine linen wey dem weave wit blue, purple, and red thread.”

6. Make dem make di priest-cloth wit gold, blue, purple and red thread, wit fine linen wey dem weave wit design.

7. Make e get two hook for di two shoulders, wey dem go fit use take tie am, and make di hook dey for di two sides.

8. And fine belt wey dem make wit di same material: fine linen wey dem weave, and wey dem design wit thread—gold, blue, purple, plus red thread.

9. Carry two onyx stones and make you carve di names of di tribes of Israel put.

10. Six of dia names go dey for one stone, and di remaining six for di oda stone—based-on on dia age.

11. Make pesin wey sabi carve di names of all di pikins of Israel for di two stones, di way dem take dey carve seal. Put di stones on gold design.

12. Tie di two stones for di hook for di shoulder of di priest-cloth—to represent di twelve tribes of Israel. Naso Aaron go take carry dia names for hin shoulder, so dat me, Baba-God, go always dey remember my pipo.

13. Use gold take make settings wit design,

14. And weave two chains of pure gold like rope, con join dem to di fine gold settings.

15. Make chest-cloth wey di High priest go use take know wetin I want make my pipo do. Design am wit di same material for di priest-cloth. Use fine linen wey dem weave and design wit gold, blue, purple, and red thread.

16. Make di chest-cloth wit one material wey dem fold two times to form square, make e long reach nine inches, con wide reach nine inches.

17. Put four rows of fine-fine-stones on am. Di first row go get one sardius, one topaz, plus one emerald.

18. Di second row go get one turquoise, sapphire, plus diamond.

19. Di third row go get one jacinth, one agate, and purple amethyst.

20. Di fouth row go get one blue-green beryl, onyx, and jasper. Una go set all dis stones for fine gold settings.

21. One stone go represent one of di twelve sons of Israel, and dem go carve di name of di tribe on am like seal.

22. Use pure gold take make chains wey dem twist like rope, for di chest-cloth to di priest-cloth.

23. Den make two gold rings for di chest-cloth, con tie dem join on top of di two ends of di chest-cloth.

24. Tie di ends of di two gold chains join di two gold rings wey dey for di corners of di chest-cloth.

25. Tie di oda end of di gold chain join di fine gold settings, con tie dem for di shoulder part of di chest-cloth, for front.

26. Den make two more gold rings, con tie dem join di two ends of di chest-cloth for di corners—wey dey for di corner of di priest-cloth for inside.

27. And make two more gold rings, con fix dem put for di bottom of di shoulder part, under di priest-cloth, for front, near di place wey dem dey join am, for up of di belt of di priest-cloth wey dem weave.

28. Tie di ring of di chest-cloth join di ring of di priest-cloth wit blue rope, so dat di chest-cloth go dey on top of di fine belt of di priest-cloth wey dem weave, and make e no fit loose.

29. Naso Aaron go take carry di names of di tribes of Israel for di holy chest-cloth—on top of hin heart, wen he enta inside di holy place. Dis na sign to always remember sey he dey represent di pipo wen he stand for Baba-God front.

30. Evensef, put di Urim plus di Thummim (nahin dem dey use take consult Baba-God) for di chest-cloth, so dat dem go dey on top of Aaron heart any time wey he dey enta di worship-place; so dat Aaron go fit know di mind of Baba-God for di pipo of Israel.

Di Oda Priest Clothes

31. Use only blue cloth take make di short-sleeve-gown wey di priest go wear under di priest-cloth. Use only one single piece of cloth take make am.

32 . Put hole for di center, for di head, and make dem weave round am so dat e no go tear

33. Make pomegranates wit blue, purple, and red thread, and sew dem join di under of di blue short-sleeve-gown, con put gold bell between di pomegranates.

34. So dat e go be; one pomegranates—one gold bell, one pomegranates—one gold bell, just like dat round di cloth.

35. Aaron go wear di short-sleeve-gown wen he dey work for di worship-place, and di bells go dey ring wen he dey waka enta, and wen he dey come out from di Holy Place, so dat he no go die.

36. Make crown wit pure gold, and carve on am as dem take dey carve seal: “Holiness to Oga Chineke.”

37. Use blue cloth take tie am join di front of di priest-cap.

38. Aaron go wear am for hin forehead, so dat he go carry di blame of any sin  wey di pipo of Israel commit, as dem dey give Baba-God dia holy gifts. Make Aaron always wear am for hin forehead so dat Baba-God go accept dem.

39. Use fine linen thread take weave di long-sleeve-gown, use fine linen take make di priest-cap and weave di belt.

40. You go make long-sleeve-gown for Aaron sons, and you go make belt for dem, and you go make caps for dem, to make dem get swag, and to make dem get levels.

41. So you go wear dem on Aaron your broda and hin sons. You go anoint dem, bless dem, con make dem pure, so dat dem go fit serve me as priests.

42. Use linen take make short-nika to cover dia body. E go long from dia waist reach dia lap.

43. Aaron and hin sons must wear dem any time wey dem de enta di worship-place, and wen dem come near di altar to do dia work for di Holy Place, so dat dem no go use dia head take carry sin, and dem go con die. Make Aaron and hin generation always follow dis law forever.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website