Exodus

Exodus Chapter 31

Abeg click here to share dis post

Bezalel Plus Oholiab

1. Naso Baba-God tell Moses sey,

2. “See, I don choose Bezalel wey be di son of Uri, di son of Hur from di tribe of Judah.

3. I don make am brekete wit Baba-God Spirit, wit wisdom and understanding. I don make am sabi tins, and to sabi different-different handwork.

4. So dat he go fit do ogbonge design, wit silver, gold, plus bronze.

5. To cut and set stones, to do wood work, and to do all kind of handwork.

6. Evensef, I don choose Oholiab wey be di son of Ahisamach from di tribe of Dan, to epp Bezalel. Evensef, I don put wisdom inside di hearts of those artists wey sabi, so dat dem go fit make everitin wey I don tell you to do;

7. Di worship-place, di ark of di word of God, wit di mercy chair on top, all di properties of di worship-place—

8. di tables plus e tools, di pure gold lampstand plus all e tools, plus di altar of incense,

9. Di altar of burnt offering, plus all di tools, di basin plus di basin-stand;

10. And di clothes wey dem weave for di priests to use for service, plus di holy cloth for Aaron di priest, plus di clothes for hin sons wey dem dey use serve as priests,

11. and di ororo for anointing, plus incense wey dey scent for di Holy place. Make dem make dem just as I tell you.”

     Di Sabbath

12. Naso Baba-God tell Moses sey,

13. “Tell di pipo of Israel sey, ‘Una must keep my Sabbath. Na dis go be sign between una and me tru-out una generations, so dat una go sabi sey na me be Baba-God wey dey make una holy.

14. “Keep di Sabbath becos e holy for una. Dem must kill any pesin wey spoil di Sabbath. Dem must cut any pesin komot—wey work on di Sabbath.

15. Make una hustle [work] for six days, but di seventh day na Sabbath of rest—wey holy for Baba-God. Dem must kill any pesin wey work on Sabbath.

16. Make all di pikin of Israel keep di Sabbath, and make una celebrate di Sabbath from generation to generation as agreement forever.

17. E go be sign between me and all di pikin of Israel forever; becos na wit six days Baba-God take make di heavens plus di earth, and he con rest on di seventh day, con chill.’ ”

18. Wen Baba-God follow Moses yarn finish for Mountain Sinai, he give am di two stones wey Baba-God use hin finger write di law put.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website