Exodus

Exodus Chapter 33

Abeg click here to share dis post

  Baba-God Tell Dem To Komot From Sinai

1. So Baba-God tell Moses sey, “Komot from dis place, you plus di pipo wey you carry komot from Egypt, and go up to di land wey I promise Abraham, Isaac, plus Jacob—sey, ‘I go give di land to your pikin-pikin-pikin.’

2. I go send angel go for your front, con pursue di pipo of Canaan, di Amorites, Hittites, Perizzites, Hivites plus Jebusites.

3. Go up to di land wey dey flow wit milk plus honey. But I no go follow you go, becos una get coconut-head, or I fit kill una for road.”

4. Wen di pipo hear dis bad words about dem, dem start to dey cry and no pesin wear any jewelries.

5. Becos Baba-God bin tell Moses sey, “Tell di pipo of Israel sey, ‘Una get coconut-head. If I sey make I dey wit una for one minute, I fit kill una. Now make una komot una jewelries and I go decide wetin I go use una do.’ ”

6. So di pipo of Israel komot dia jewelries for Mountain of Horeb.

Di Worship-place

7.

Now Mose carry hin tent, con set am for outside di camp for where far-small, con call am, “Worship-place.” Any pesin wey wan ask from Baba-God go go di worship-place for outside di camp.

8. And wen Moses go di tent, all di pipo stand up con dey for di doormot of dia house dey watch Moses until he enta inside di Tent.

9. As Moses dey enta di tent, di pillar of cloud come down, con stay for di doormot as Baba-God dey follow Moses tok.

10. So all di pipo see di pillar of cloud dey stand for di doormot of di tent, all of dem stand up dey worship—everi single one of dem for di doormot of hin house (tent).

11. Naso Baba-God follow Moses tok face to face, as man take dey follow hin padi tok. Lata, Moses go go back to di camp, but Joshua wey be di son of Nun—di young man wey dey serve am no go komot from di tent.

Baba-God Promise To Dey Wit Dem

12. Moses con tell Baba-God sey, “E don tey wey you dey tell me sey, ‘Lead dis pipo,’ but you neva let me know who you go send wit me. But you don tok sey, ‘I sabi you wit your name and you don see favour wit me sef.’

13. Now I dey beg you, if you dey happy wit me, teach me your ways so dat I fit sabi you, and so dat I go see favour for your eyes. Remember sey dis nation na your pipo.”

14. Naso Baba-God ansa am, “I go follow you go, and I go give you peace.”

15. So Moses tell am sey, “If you no follow us go, no send us go up from here.

16. How any pesin go take sabi sey you dey happy wit me and wit your pipo unless you follow us? Na you wey dey follow us make me and your pipo different from all di oda pipo of di earth?”

17. Naso Baba-God tell Moses sey, “I go do wetin you don ask, becos I dey happy wit you and I sabi your name.”

18. So Moses tok sey, “Now abeg you, show me your levels.”

19. And Baba-God tok sey, “I go make all my goodness pass your front, con call my holy name your front. I go sorry-for who I wan sorry-for, and I go show kind-heart to who I wan show am to.

20. But he tok sey, “You no fit see my face, becos no pesin fit see me, con dey alive.”

21. Naso Baba-God tok sey, “See, one place dey near me wey you fit stand on top of one rock.

22. Wen my levels pass like light, I go hide you for one place wey open for rock. I go cover your eyes wit my hand until I don pass.

23. Den I go komot my hand and you go see my back; but you no fit see my face.”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website