Exodus

Exodus Chapter 36

Abeg click here to share dis post

            As Dem Take Build Di Worship-place

1. So Bezalel plus Aholiab, and everi beta artist wey Baba-God don give wisdom plus understanding, to sabi do everi kind of work for di holy place, go do everitin based-on wetin Baba-God tok.

Di Pipo Give Yanfu-yanfu

2.

Moses call Bezalel plus Oholiab and everi pesin wey get skill wey Baba-God don give pawa, and wey get open-mind to come do di work.

3. Moses give dem all di offerings wey di pipo of Israel bring to do di building work of di holy place. And di pipo kontinu to dey bring offering wit open-heart everi morning.

4. So all di artists wey dey do all di work for di holy place—leave dia work,

5. Con tell Moses sey, “Di pipo dey bring materials pass wetin we need for di work wey Baba-God tell us to do.”

6. So Moses give order, and dem send hin word tru-out di whole camp, “No man or woman must make any oda tin as offering for di worship-place. So di pipo stop to dey carry more tins come,

7. Becos wetin dem get don already pass wetin dem need for di work.

Di Worship-place

8. All di men wey get skill among di workers, con make di worship-place wit ten curtains wey dem weave wit fine linen, and blue, purple, plus red thread, wit fine cherubim wey artist design on am.

9. All di curtains na di same size, dem long reach 42 feet and dem wide reach 6 feet.

10. Dem join five of dis curtains togeda to form one long curtain, and dem join di oda five curtains togeda to make anoda long curtain.

11. Naso he use blue thread take make loops for corner of di last curtain for di first set, and dem do di same tin for di corner of di last curtain for di second set.

12. He make fifty loops for one curtain, con make fifty loops for di corner of di oda set of curtain, so di loops con dey opposite demsef.

13. He make gold hooks to join di curtains togeda, so dat di worship-place con be one.

14. He make eleven curtains wit goat hair for di roof of di worship-place.

15. All di eleven curtains na di same size. Dem long reach 45 feet and dem wide reach 6 feet.

16. Bezalel join five of dis curtains togeda to make one long curtain, and dem join di oda six togeda to make anoda long curtain.

17. He make fifty loops for di corner of di curtain for one set, con make fifty loops for di corner of di second set.

18. He make fifty hooks to join di two sets togeda to firm one single cover.

19. He con make cover for di tent wit goat skin wey dem dye to red, and anoda badger skin to cover am.

20. For di frames of di worship-place, Bezalel make frames from acacia wood. And dem stand face up.

21. Everi single frame high reach 15 feet, con wide reach 27 feet.

22. Everi frame get two parts wey point out—for under. Naso he take do all di frames for di worship place.

23. Dem make twenty frames for di south side,

24. And forty silver solid-bottoms wey go dey under dem—two solid-bottom for everi frame for di two part of di frame wey point out from under di frame. And two solid-bottoms for di next frame and e two parts wey point out from under di frame.

25. For di oda side, di north side of di worship-place, dem make twenty frames,

Wit forty silver solid-bottom—two for under everi frame.

26. Dem make six frames for di far end wey be di west end of di worship-place,

27. And dem make two frames for di corners of di worship-place, for di two back corners.

28. For dis two corners, di frames na double from di bottom but dem join wit one ring for up. He make two of dem like dis for di two corners.

29.So dem be eight frames plus six silver solid-bottom—two for under everi frame.

30.Dem still make crossbar wit acacia wood: five for di frames wey dey for one side of di worship-place,

31. and five for di frames wey dey for di oda side, and five for di frames wey dey for di west, for di far end of di worship-place.

32. Dem make di center crossbar so dat e stretch from one end to di oda end for di middle of di frames.

33. Dem cover di frames wit gold, con make gold rings to hold di crossbar. Dem cover di cross bar sef wit gold.

34. Dem make di curtain wit blue, purple and red thread wit fine linen wey dem weave, and artist design cherubim put on am.

35. Dem make four pillars wit acacia wood for am, con cover dem wit gold. Dem make gold hooks for dem and dem cast dis four solid-bottom.

36. For di doormot of di tent, dem make curtain wit blue, purple and red thread, plus linen wey dem weave—di work of designer.

37.And dem make five pillars wit dia hooks. Dem cover di cap of di pillars and dia rings—wit gold, but he make di five solid-bottoms wit bronze.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website