Exodus

Exodus Chapter 38

Abeg click here to share dis post

Di Altar For Offering Wey Dem Burn

1. He build di altar of burnt offering wit shittim wood. Na square wey long reach seven and half feet, con wide reach seven and half feet, and e con high reach four and half feet.

2. He make horns for di altar (di sharp place wey face up) for di four corners, so dat di horn plus di altar con be one piece of wood, and he cover di altar wit bronze.

3. He use bronze take make all di tools wey dem dey use for di altar—pot, shovel, sprinkling bowl, meat forks, plus pans.

4. He con use bronze take make roasting-net for di altar, he fix am inside di altar reach half, so dat di sides of di altar come up small.

5. He use bronze take make four rings for di corners of di roasting-net, wey dem go use fix di carrying poles.

6. He use shittim wood take make di poles, con use bronze take cover dem.

7. He shuuk di poles inside di rings, wey come out from di sides of di altar—to carry am. He make di altar wit planks, like box wey open.

Di Basin For Washing

8. He use bronze take make basin plus basin-stand, wit bronze mirrors wey di women give—di women wey dey serve for di doormot of di worship-place.

Di Yard For Di Worship-place

9. He form di yard wey dem use curtains take cover, curtains wit fine linen wey dem weave. Di curtain long reach 150 feet for di south side.

10. Na twenty pillars hold di curtains, wit twenty solid-bottoms wey dem make wit bronze. And wit silver hooks and rings for di pillars.

11. He make di same type of curtains for di north side—wey long reach 150 feet. Na twenty pillars hold am, and dem set di twenty pillars for solid-bottom wey dem make wit bronze. He hang di curtains wit silver hooks and rings.

12. Di curtain wey dey for di west end of di yard long reach 75 feet. Na ten pillars hold dem—pillars wey dem set for ten solid-bottom. Na silver hooks plus rings dem take hook dem.

13. Di east end plus di front sef long reach 75 feet.

14. Di doormot of di worship-place dey for di east side, and e get two curtains. Di curtain for di right side long reach twenty-two and half feet. E get three pillars and three solid-bottoms.

15. Di curtain sef for di left side long reach 22 and half feet, and na three pillars wey get three solid-bottoms nahin hold di curtains.

16. Dem make all di curtains wey dem use for di yard wit fine linen wey dem weave.

17. All di pillars wey hold di curtains for di yard—get bronze solid-bottoms, and all di hooks plus rings na silver. Dem cover up of di pillars wit silver, and dem use silver take make di rings wey dey hold di curtains.

18. He make di curtain of di door of di yard wit fine linen wey dem weave, and he design am wit blue, purple, plus red thread. E long reach 30 feet, con high reach 7 and half feet. Just like di curtains wey form di wall of di yard.

19. Na four pillars hold dem, all di pillars get four solid-bottoms wey dem make wit bronze. Dem cover di up of di pillars wit silver, and na silver dem take make both di hooks plus rings.

20. Na bronze dem take make all di tent pins wey dem use for di worship-place and di yard.

Materials For Di Worship-place

21. Na dis be di amount of materials wey dem dey use take build di worship-place, wey dem count based-on wetin Moses tok—wey di Levites record under di control of Ithamar wey be di son of Aaron, di priest.

22. Bezalel wey be di son of Uri, di son of Hur, from di tribe of Judah, make everitin wey Baba-God tell Moses.

23. Oholiab wey be di son of Ahisamach dey wit am—na from di tribe of Dan—na artist and designer, and he sabi weave thread work wit blue, purple and red thread, plus fine linen.

24. Di full amount of gold from di offering—wey dem use take build di holy place na about 995 kg, based-on di official standard of weight for di worship-place.

25. All di pipo of Israel give about 3,422 kg of silver, based-on di official standard of weight for di worship-place.

26. Di silver come from di tax wey dem collect from everi man wey register for di census. (Di tax na one beka—one beka na half of one silver coin, based-on di standard weight of silver for di worship-place). Dem collect dis tax from 603,550 men wey be twenty years go up.

27. Dem use about 3,400 kg of silver take make 100 solid-bottoms for di holy place, and dia curtains, about 34 kg of silver for everi solid-bottom.

28. Bezalel use di remaining 25 kg of silver take make hooks plus rings, and to use cover di up of di pillars.

29. Di pipo still bring offering of about 2,406 kg of bronze as special offering.

30. Nahin dem use take make di solid-bottoms of di pillars for di doormot of di worship-place, and for di bronze altar plus di bronze roasting-net, and all di tools of di altar.

31. Dem still use bronze take make di solid-bottoms of di pillars wey support di curtains round di yard, and di soild-bottoms for di pillars of di doormot of di yard, plus all di tent pins for di worship-place and round di yard.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website