Leviticus

Leviticus Chapter 1

Abeg click here to share dis post

      Offering Wey Dem Burn

  1. Baba-God call Moses, con follow am tok from di worship-place. He tok sey,
  2. “Follow di pipo of Israel tok, con tell dem sey: ‘Wen any of una dey bring offering for Baba-God, bring offering of malu, sheep or goat—from una animals.
  3. “If di burnt offering na from your animals, he suppose bring animal wey be male and wey no get comma for body. He must bring am come wit free-mind to di door of di worship-place for front of Baba-God.
  4. Make he lay hin hand on di head of di burnt offering, and Baba-God go accept am from am as payment for hin sins.
  5. Make he kill di young malu for Baba-God front, and Aaron sons wey be di priests go bring di blood, con sprinkle am round di altar wey dey near di door of di worship-place.
  6. Make he skin di burnt offering, con cut am into pieces.
  7. Make di sons of Aaron wey be di priests put faya for di altar, con arrange wood for di faya.
  8. Den Aaron sons wey be di priests go arrange di pieces, even di head plus di fat, on di wood wey dey burn for di altar.
  9. Make dem wash di inside parts and di legs wit water, and di priest go burn all of dem for di altar. Na burnt sacrifice, offering wey dem make wit faya, sweet smell wey dey make Baba-God happy.
  10. “If di offering na burnt offering from di animals, from either sheep or goats, burnt sacrifice, make he bring male wey no get comma.
  11. Make he kill am for di north side of di altar, for Baba-God front, and Aaron sons wey be di priests go sprinkle di blood round di altar.
  12. Make he cut am into pieces, even di head plus di fat—and di priest go arrange dem for di wood wey dey burn for di altar.
  13. Make he use water take wash di inside parts plus di legs, and make di priest carry all of dem, con burn dem for di altar. Na burnt sacrifice, offering wey dem make wit faya, sweet smell wey dey make Baba-God happy.
  14. “If di offering to Baba-God na burnt offering of fawo, make he give dove or young pigeon.
  15. Di priest go carry am come di altar, make dem komot di head con burn am for di altar; make dem komot di blood for di sides of di altar.
  16. Make he komot di part for di bird throat where di food dey stay before e enta di bird belle, komot di feathers sef, con throway am for di east side of di altar, for where ashes dey.
  17. And make he tear am open from di feathers, but make he no tear am finish, and make di priest burn am for faya for di wood wey dey on altar. Na burnt sacrifice, offering wey dem make wit faya, sweet smell wey Baba-God like.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website