Leviticus

Leviticus Chapter 13

Abeg click here to share dis post

Law About Leprosy

  1. Baba-God con tell Moses and Aaron sey,
  2. “If any pesin skin dey swell up, or rashes, or any light place for hin skin wey be like sey na leprosy, dem must carry dat kain pesin come meet Aaron wey be di priest, or to one of hin sons wey be priest.
  3. Make di priest observe di sore wey dey for di skin, and if di hair for di sore don turn to white, and e con be like sey di sore deep pass di skin for hin flesh, dat na disease of leprosy. So di priest go look am, con tok sey di pesin no clean.
  4. If di place for di skin na white, but e no be like sey e deep pass di skin and di hair for inside am neva turn to white, make di priest put di pesin wey get di diease for one place—for seven days.
  5. On di seventh day, make di priest observe am, and if he see sey di sore neva change, and e neva spread for all hin skin, make he keep di pesin wey get di disease for one place—for anoda seven days.
  6. On di seventh day, make di priest observe am again, and if di sore don dark and e neva spread for di skin, di priest go confam sey di man clean; na just craw-craw. Di pesin go wash hin clothes and he go clean.
  7. But if di craw-craw don spread for di skin afta di priest don observe am to confam sey he clean, he must visit di priest again.
  8. Make di priest observe am, and if di rashes don spread for di skin, di priest go confam sey di pesin no clean; na leprosy.
  9. Wen pesin get disease of leprosy for skin, dem must carry am come meet di priest.
  10. Make di priest torch-light di man, and if hin skin dey swell up con white—and wey don make di hair sef white, and if raw flesh dey for di place wey swell up,
  11. na old leprosy for skin, and di priest go confam sey di pesin no clean. And di priest no go lock am for one place, becos di pesin no clean.
  12. “If di leprosy start for pesin skin, con spread for di whole skin, and as di priest dey see sey e cover everi where for di skin of di pesin—from head to leg,
  13. make di priest observe di pesin, and if di disease don cover hin whole body,he go tok sey di pesin clean. Since all of dem don turn to white, he clean.
  14. But any time wey raw flesh show-face on any pesin, di pesin no clean.
  15. Wen di priest see di raw flesh, he go tok sey dat pesin no clean. Di raw flesh no clean; na leprosy.
  16. If di raw flesh change, con turn to white, he must go see di priest.
  17. Di priest go observe am, and if di sores don turn to white, di priest go tok sey dat pesin clean. Di pesin clean.
  18. Wen pesin get boil for hin skin and e con heal,
  19. and for di place wey di boil dey, di place swell up con white, or one kain red-white spot con dey, he must carry hinsef go meet di priest.
  20. Di priest go observe am, and if he see sey e deep pass di skin and di hair wey dey inside am don turn to white, di priest go tok sey di pesin no clean. Na disease of leprosy wey affect am for where di boil bin dey.
  21. But if wen di priest observe am, white hair no dey inside am, and e no deep pass di skin and e con dey dull, naso di priest go keep am for one place for seven days.
  22. If di tin dey spread for all hin skin, di priest go confam sey di pesin no clean, na disease.
  23. But if di spot no gree change, and e neva spread, na just mark from boil, and di priest go confam sey he clean.
  24. “Any time wey e be like sey pesin skin burn, and one kain red-white, or white spot con show-face for di raw flesh of di place wey burn,
  25. Make di priest observe di spot, and if di hair wey dey inside am don turn to white, and e dey show sey di tin deep pass di skin, na disease of leprosy wey don show-face for di place wey burn for di skin. Di priest go tok sey di pesin no clean; na disease of leprosy.
  26. But if di priest observe am, con see sey white hair no dey for di place wey burn for di skin, and if e no deep pass di skin, and e don dark, den make di priest keep di pesin for one place for seven days.
  27. Make di priest observe am on di seventh day, and if e dey spread for di skin, di priest go tok sey e no clean; na disease of leprosy.
  28. But if maybe di spot no change, and e neva spread for di skin, but e con dull, na just skin wey swell up from di place wey burn, and di priest go tok sey di pesin clean; na skin wey rise from di place wey burn.
  29. “If man or woman get sore for hin head or jaw,
  30.                make di priest observe di sore, and if e be like sey e deep pass di skin and di hair wey dey inside am dey yellow, con thin, di priest go tok sey di pesin no clean, na leprosy for head or jaw.
  31. But if wen di priest observe dis kain sore, and e be like sey e no deep pass di skin and black hair no dey inside am, den make di priest put di pesin wey get di disease for one place for seven days.
  32. On di seventh day, make di priest observe di sore, and if e neva spread and no yellow hair on am, and e no be like sey e deep pas di skin,
  33. dem must shave am, except di disease area, and di priest go keep di pesin wey get di disease for one place for seven days.
  34. On di seventh day, di priest go observe di sore again, and if e neva spread, and e no be like sey e deep pass di skin, di priest go tok sey di pesin clean. Make di pesin wash hin cloth and he go clean.
  35. But if di sore start to dey spread afta di priest don tok sey di pesin clean,
  36. di priest go observe di pesin again and if di sores don spread for di skin, make di priest no look for yellow hair; becos di pesin no clean.
  37. But if di priest reason sey di sores neva spread, and black hair dey grow on am, di sores don heal, and di priest go tok sey di pesin clean.
  38. Wen man or woman get white spot for hin skin,
  39. make di priest observe dem, and if di white spots na white wey dull, na craw-craw wey no serious don show-face for hin skin; dat pesin dey clean.
  40. “Wen man hair dey cut from hin head na gorimakpa (bald), he clean.
  41. If hin hair don cut from front of hin head, and hair no dey for hin fore head, he clean.
  42. But if one kian red-white sore catch hin head wey be gorimakpa or hin forehead, dis one na leprosy wey don catch hin head or forehead.
  43. Make di priest look everi where for di pesin head well-well, and if di sore wey swell up be like red-white color just as leprosy dey be for skin—for hin gorimakpa (bald) head or for hin forehead wey hair no dey,
  44. di man get leprosy and he no clean. Di priest go tok sey di pesin no clean becos he get disease for hin head.
  45. And pesin wey get dat kain disease—must wear tear-tear cloth, make he no comb hin hair, con cover di low part of hin face, con dey shout, “E no-clean, e no-clean!”
  46. As long as he get disease, he no clean. Na only am must dey and he must stay outside di camp.

Law About Cloth Wey Leprosy Touch

47. Any cloth wey leprosy don touch, whether di cloth na wool or linen;

48. Whether na cloth wey dem weave or knit from linen or wool, or leather, or anytin wey dem make from leather,

49. and if di place wey di leprosy touch for di cloth dey green or red—whether na wrapper, leather, or cloth wey dem knit or weave, or anytin wey dem make from leather, e mean sey leprosy dey on am, and dem must carry am go meet di priest.

50. Di priest go look di cloth well-well, con keep am for one place for seven days.

51. Di priest go observe am again for di seventh day, if di leprosy don spread for di cloth, or di cloth wey dem weave or knit, or di leather—na leprosy wey dey spread; and those tins no clean.

52. He must burn di cloth, or di cloth wey dem weave or knit from wool or linen cloth, or anytin wey dem make wit leather, wey get di disease, becos di leprosy bad well-well; dem must burn di cloth.

53. But if wen di priest observe am, and di leprosy neva spread for di cloth, or di cloth wey dem weave or knit, or di leather,

54. di priest go tok sey make dem wash di cloth wey get di leprosy, den he go keep di cloth for one place for anoda seven days.

55. Afta dem don wash di cloth wey di leprosy affect, di priest go observe am, and if di leprosy neva change e color, even though e don stop to spread, di priest go tok sey di cloth no clean. Burn am for faya—whether di leprosy don affect one side or di oda.

56. But if wen di priest observe am, di leprosy con dey dark afta dem wash di cloth, he go tear di part wey di leprosy affect from di cloth, or leather, or cloth wey dem knit or weave.

57. But if e show-face again for di cloth, leather, or cloth wey dem knit or weave, or from anytin wey dem make wit leather, di disease dey spread, and dem must burn anytin wey get leprosy.

58. Di cloth or material wey dem knit or weave, or leather wey dem don wash, and wey di leprosy don komot, dem must wash am again, and e go clean.”

59. Na dis be di law about leprosy wey affect cloth wey dem make wit wool or linen, material wey dem knit or weave, or any leather—for di priest to tok if dem clean or not.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website