Leviticus

Leviticus Chapter 15

Abeg click here to share dis post

Law About Discharge From Body

  1. Baba-God con tell Moses and Aaron sey,
  2. “Follow di pipo of Israel tok, and make una tell dem sey: ‘Any man wey get discharge from hin body—no clean.
  3. Naso hin discharge go take make am no clean: whether di discharge kontinu to dey flow from hin body or hin body keep am inside, e go make di man no clean.
  4. Any bed wey di man wey get discharge sleep put, dat bed no clean, and everitin wey he sidon put no clean.
  5. Make any pesin wey touch hin bed wash hin clothes, con baff wit water, and di pesin no go clean until evening,
  6. And any pesin wey sidon on anytin wey di man wey get di discharge sidon put—dat pesin no go clean until evening and di pesin must wash hin clothes.
  7. Evensef, any pesin wey touch di man wey get di discharge go wash hin clothes, con baff wit water, and di pesin no go clean until evening.
  8. If pesin wey get discharge spit on pesin wey clean, make di pesin wash hin clothes, con baff wit water, and di pesin no go clean until evening.
  9. Anytin wey di man sidon on wen he dey ride animal—dat chair no go clean.
  10. Any pesin wey touch anytin wey di man sidon put—dat pesin no go clean until evening, and any pesin wey carry those tins go wash hin clothes, con baff wit water, and di pesin no go clean until evening.
  11. Any pesin wey di pesin wey get di discharge touch, and di pesin no wash hin hand, di pesin go wash hin clothes con baff wit water, and di pesin no go clean until evening.
  12. Any clay container wey di pesin wey get di discharge touch, make dem break di container, but make dem rinse everi wood container wey di pesin wey get di discharge touch.
  13. Wen di man wey get discharge don clean from hin discharge, naso he go count seven days for hin cleaning to complete, con wash hin clothes, and baff wit fresh water wey dey flow from ground, naso di man go clean.
  14. On di eighth day, he must carry two doves or two young pigeons come Baba-God front, for di door of di worship-place—to meet di priest.
  15. Naso di priest go sacrifice dem, one for sin offering, and di oda one for burnt offering. Naso di priest go take clean di man for Baba-God front, becos of hin discharge.
  16. Wen man pour, he must baff hin whole body, and he no go clean until evening.
  17. Any cloth or leather wey sperm-water touch, dem must wash am, and e no go clean until evening.
  18. Afta man and woman climb demsef, dem must baff, and dem no go clean until evening.
  19. Wen woman dey see her period everi month, she no clean for seven days, any pesin wey touch her no clean until evening reach.
  20. Anytin she sidon put or lie down put as she dey see her period—dat tin no clean until evening.
  21. Any pesin wey touch her bed must wash hin clothes, con baff wit water—and dat pesin no go clean until evening.
  22. Any pesin wey touch anytin wey she sidon put go wash hin clothes, con baff wit water, and dat pesin no go clean until evening.
  23. If anytin dey on top of her bed or on top of anytin wey she sidon put, wen pesin touch di tin, di pesin no go clean until evening.
  24. And if any man sleep wit her at-all—sote di woman blood con touch hin body, di man no go clean for seven days; and everi bed wey he use sleep no go clean.
  25. If woman get plenty blood wey dey flow for many days, wey con pass her normal period, all di days of dis discharge go be like di days of her normal period. She no clean.
  26. Everi bed wey she lie down put on di days of her discharge, dat bed no clean. E go be like di bed wey she use sleep wen she dey see her period.
  27. Any pesin wey touch those tins no go clean, make di pesin wash hin clothes, con baff wit water, and di pesin no go clean until evening.
  28. Afta she don clean from her discharge, den make she count seven days, and afta dat she go clean.
  29. And on di eighth day, she go carry two doves or two young pigeons, and she go carry dem come meet di priest, to di door of di worship-place.
  30. Naso di priest go sacrifice one as sin offering and di oda one as burnt offering, naso di priest go take clean her to make her pure for Baba-God front, becos of her period wey no clean.
  31. So you must separate di pipo of Israel from di tins wey no clean, so dat dem no go corrupt my worship-place wey dey for di middle of di camp—so dat dem no go die.
  32. Na dis be di law for pesin wey get discharge and for pesin wey no clean becos he pour,
  33. And for woman wey dey for her period everi month, for pesin wey get discharge, and for man wey sleep wit woman wey no clean, and for pesin wey get discharge for body, either man or woman, and for man wey sleep wit woman wey no clean.’”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website