Leviticus Chapter 9

Abeg click here to share dis post

Di Priest Start Dia Work

1. E con happun sey on di eighth day Moses call Aaron and hin sons, plus di senior-men of Israel.

2. He con tell Aaron sey, “Bring one small malu for your sin offering, and one ram for burnt offering, make both of dem no get any comma, and give dem to Baba-God.

3. Den make you tell di pipo of Israel sey: “Make una carry one small goat for sin offering, one small malu and lamb wey be one year old, and make dem no get comma—for burnt offering.

4. Still take one small-malu plus ram for peace offerings to sacrifice for Baba-God front, and flour [seed offering] wey dem rob wit olive ororo—for seed offering. Give all dis offering to Baba-God becos Baba-God go show-face to una today.’ ”

5. Dem bring di tins wey Moses tell dem, to front of di door of di worship-place, and all di pipo come near, con stand for Baba-God front.

6. Naso Moses tok sey, “Na wetin Baba-God tell una to do be dis, so dat Baba-God levels go show-face to una.”

7. Moses con tell Aaron sey, “Go di altar and make you give your sin offering plus your burnt offering, and epp yoursef and di pipo sacrifice for una sins; con sacrifice di offering wey be for di pipo, and sacrifice for dia sins, just as Baba-God tok.”

8. So Aaron go di altar, con kill di small-malu for sin offering for hinsef.

9. Hin sons carry di blood go give am, and he put hin finger inside di blood, he put am for di horns of di altar, con pour out di remaining blood for di bottom of di altar.

10. He burn di fat for di altar, and di two kidneys plus di part wey cover di liver—from di sin offering, as Baba-God bin tell Moses;

11. Den he burn di flesh plus di skin for outside di camp.

12. So he kill di burnt offering. Hin sons give am di blood, he con sprinkle am for all di sides of di altar.

13. Dem give am di burnt offering, wit all di pieces, plus di head, and he burn dem for di altar.

14. He wash di inside parts plus di legs, con burn dem on top of di burnt offering for di altar.

15. So Aaron carry di offering wey be for di pipo. He carry di goat wey be for di pipo sin offering, con kill am as sin offering, as he do to di first one.

16. He carry di burnt offering, con prepare am di way wey Baba-God bin tell dem.

17. He carry di seed offering sef, he pack some for hin hand, con burn am for di altar to add-join di morning burnt offering.

18. He kill di small-malu plus di ram as sacrifice of peace offering for di pipo, and Aaron sons give am di blood wey he sprinkle round di sides of di altar.

19. Naso he carry di fat of di malu plus di ram—di fat tail and di fat wey dey around di inside parts—along wit di kidneys plus di part wey cover di liver.

20. He put di fat on top of di breasts of di animals, con burn dem on di altar.

21. Naso Aaron wave di breasts plus di right shoulder as wave offering to Baba-God, just as Moses bin tok.

22. Den Aaron carry hin hand go up to face di pipo, con bless dem. And as he don sacrifice di sin offering, di burnt offering, plus di peace offering, he come down.

23. Naso Moses plus Aaron enta di worship-place. Wen dem come out, dem bless di pipo, and Baba-God levels show-face to all di pipo.

24. Faya con dey komot from Baba-God front to burn di offering and di fat wey dey for di altar. Wen all di pipo see am, dem con dey shout, and dem bow down wit dia face for ground.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website