Numbers

Numbas Chapter 1

Abeg click here to share dis post

          Di First Census Of Israel

  1. Baba-God follow Moses tok for inside di worship-place, for di desert of Sinai, on di first day of di second month, for di second year afta di pipo of Israel komot from Egypt. He tok sey:
  2. “Count all di pipo of Israel by dia families, dia papa house, and write di names of everi man, one by one.
  3. You and Aaron go numba dem based-on dia group, all men for Israel from twenty years old or more, wey fit serve for di army.
  4. Take one man from everi tribe, di head of di family—to epp you.
  5. Dis na di name of di men wey go epp you for di work: from Reuben—Elizur wey be di son of Shedeur;
  6. From Simeon; Shelumiel wey be di son of Zurishaddai;
  7. From Judah; Nashon wey be di son of Amminadab;
  8. From Issachar; Nethanel wey be di son of Zuar;
  9. From Zebulun; Eliab wey be di son of Helon;
  10. From di sons of Joseph; From Ephraim; Elishama wey be di son of Ammihud. From Manasseh; Gamaliel wey be di son of Pedahzur.
  11. From Benjamin; Abidan wey be di son of Gideoni.
  12. From Dan; Aheizer wey be di son of Ammishaddai.
  13. From Asher; Pagiel wey be di son of Ocran.
  14. From Gad; Eliasaph wey be di son of Deuel;
  15. From Naphtali; Ahira wey be di son of Enan.”
  16. Dis na di men wey dem choose from di community, di chiefs of di papa-papa-papa tribes. Na dem be di heads of di families of Israel.
  17. Moses plus Aaron carry dis men wey dia names dey di list,
  18. and dem call all di pipo togeda, on di first day of di second month, di pipo register demsef by dia families and dia papa house. From di men of 20 years go up, dem count dem head by head.
  19. Just as Baba-God tell Moses. Naso he count dem for di desert of Sinai:
  20. From di pikin-pikin-pikin of Reuben, di first born son of Israel: All di men wey be twenty years old or more, wey fit fight for di army; dem write dia names, one by one, based-on dia families and dia papa house.
  21. Di numba from di tribe of Reuben na 46,500.
  22. From di pikin-pikin-pikin of Simeon. All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  23. Di numba from di tribe of Simeon na 59,300.
  24. From di pikin-pikin-pikin of Gad: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  25. Di numba from di tribe of Gad na 45,650.
  26. From di pikin-pikin-pikin of Judah: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  27. Di numba from di tribe of Judah na 74,600.
  28. From di pikin-pikin-pikin of  Issachar: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  29. Di numba from di tribe of Issachar na 54,400.
  30. From di pikin-pikin-pikin of Zebulun: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  31. Di numba from di tribe of Zebulun na 57,400.
  32. From di sons of Joseph: From di pikin-pikin-pikin of Ephraim: All di men wey be twenty years old or more, wey fit fight for di army, dem write dia names, one by one, based-on dia families and dia papa house
  33. Di numba from di tribe of Ephraim na 40,500.
  34. From di pikin-pikin-pikin of Manasseh: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  35. Di numba from di tribe of Manasseh na 32,200.
  36. From di pikin-pikin-pikin of Benjamin: All di men wey be twenty years old or more, wey fit fight for di army, dem write dia names, one by one, based-on based-on dia families and dia papa house.
  37. Di numba from di tribe of Benjamin na 35,400.
  38. From di pikin-pikin-pikin of Dan: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  39. Di numba from di tribe of Dan na 62,700.
  40. From di pikin-pikin-pikin of Asher: All di men wey be twenty years old or more wey fit fight for di army, dem write dia names, one by one, based-on dia families and dia papa house.
  41. Di numba from di tribe of Asher na 41,500.
  42. From di pikin-pikin-pikin of Naphtali: All di men wey be twenty years old or more, wey fit fight for di army, dem write dia names, one by one, based-on dia families and dia papa house.
  43. Di numba from di tribe of Naphtali na 53,400.
  44. Dis na di men wey Moses and Aaron count, and di twelve leaders of Israel, all of dem dey represent hin family.
  45. All di pikin of Israel wey be from twenty years, wey dem count based-on dia papa house, and wey fit serve for di army.
  46. All of dem na 603,550.
  47. But dem no count di families of di tribe of Levi along wit di oda tribes.
  48. Baba-God bin tell Moses sey:
  49. “You must no count di tribe of Levi or add dem join di census of di oda pipo of Israel.
  50. Instead, choose di Levites make dem dey in charge of di worship-place—make dem still dey in charge of di properties, plus everitin wey belong to my house. Na dem go dey cary di Tent of di worship-place, plus all di properties, dem go serve inside di worship-place—con set dia camp round am.
  51. Any time e reach for di worship-place to move, di Levites go take am down. And wen e reach time to stop, dem go set am up again. But dem must kill any stranger wey come near am.
  52. Everi single tribe of Israel go camp for e own place, wit dia own flag.
  53. But di Levites go camp round di worship-place, to protect di pipo of Israel from Baba-God vex. Na di Levite dey in charge of worship-place.”
  54. Di pipo of Israel do all dis tins just as Baba-God tell Moses.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website