Deuteronomy

Deuteronomy Chapter 14

Abeg click here to share dis post

Animal Wey Clean Plus Animals Wey No Clean

  1. Una be di pikin of Oluwa [Baba-God]. Make una no  cut unasef or shave di front of una heads for pipo wey don die,
  2. Becos una be pipo wey holy for Baba-God una Oga. Out of all di pipo wey dey for di earth, Baba-God don choose una to be hin special pipo for hinsef.
  3. No chop anytin wey no clean.
  4. Na dis be di animals wey una fit chop: Ox, sheep, goat,
  5. Deer, gazelle, di roe deer, wild goat, ibex, antelope plus di sheep wey dey for mountain.
  6. Una fit chop any animals wey bottom of e leg divide like malu leg, and wey dey bring back food from e belle to chew.
  7. But make una no chop any oda animal wey bottom of e leg no divide like malu leg, and wey dey bring back food from e belle to chew. So make una no chop camel, hare or hyrax. Dem dey bring back food  from dia belle to chew, but bottom of dia leg no divide like malu leg. So dem no clean for una.
  8. Even pig, becos even though bottom of e leg divide like malu leg, e no dey bring back food from e belle to chew. So pig no clean for una. Make una no chop  di meat of dis animals or even touch dia deadbody.
  9. Out of all di animals wey dey live for water, make una chop only di ones wey get fins and scales.
  10. But make una no chop animal for water—wey no get fins or fish-skin [scales], becos dem no clean for una.
  11. Una fit chop any bird wey clean.
  12. But make una no chop dis ones: eagle, vulture, black vulture,
  13. Red kite, falcon, any kind of kite;
  14. Any kind of raven,
  15. And owl, plus night hawk, and di cuckow, plus di  hawks wey be like am,
  16. Di small owl, di big owl, di white owl,
  17. Di desert owl, osprey, cormorant,
  18. Stork, any kind of heron, hoopoe and bat.
  19. All di insect wey dey fly no clean for una, make una no chop dem.
  20. But una fit chop any bird wey clean.
  21. No chop anytin wey die by esef. Una fit give am to any of di foreigners wey dey live for una towns and he fit chop am, or una fit sell am give foreigner. But  una be pipo wey holy for Baba-God. No cook small  goat wey still dey suck e mama breast.

      Tithes

22. Make una dey sure sey una keep ten percent for one  place—out of everitin wey una land produce everi year.

23. For front of Baba-God una Oga nahin una go take chop di tithes of una animals, fresh wine plus ororo, and di first born of una sheep plus malu—for di place wey Baba-God go choose as house for hin Name, so dat una go always sabi how to fear Baba-God una Oga.

24. But if dat place too far for una, and Baba-God don  bless you sote you no fit carry your tithe [becos di  place wey Baba-God choose to put hin Name dey far-far],

25. Den make una sell una tithes con carry di moni follow-body go di place wey Baba-God una Oga go  choose.

26. Use di moni take buy anytin wey you like; malu, sheep, wine or ogogoro, or anytin wey you wish. Den make you and your family chop am for Baba-God front, con dey celebrate wit your family.

27. And make una no fashi di Levites wey dey live for una towns [make dem celebrate wit una], becos dem  no get share inside di land among una.

28. For di end of everi three years bring di tithes of everitin wey una produce dat year, and make una store dem for una towns,

29. So dat di Levites wey no get any share or property of dia own, and di foreigners, di pipo wey no get papa, plus di widows wey dey live for una towns—fit  come chop belleful, and so dat Baba-God una Oga go bless una for work wey your hand dey do.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website