Deuteronomy

Deuteronomy Chapter 27

Abeg click here to share dis post

Di Law Wey Dem Write For Stones

  1. Now Moses wit all di senior-men of Israel con tell di pipo sey, “Keep all di commandment wey I don tell una today.
  2. And e go happun sey on di day wen una go cross to  di oda side of River Jordan, to di land wey Baba-God una Oga dey give una, una go set up big stones for unasef, con cover dem wit plaster.
  3. Una go write everi words of di law on dem, wen una  don cross over, so dat una go enta di land wey Baba-God una Oga dey give una, land wey dey flow  wit milk plus honey, just as Baba-God di Oga of una  papa-papa-papa promise una.
  4. So e go happun sey, wen una cross River Jordan, for Mountain Ebal nahin una go set up dis stones, wey I dey tell una today, and make una cover dem wit plaster.
  5. And una go build altar for Baba-God, altar of stones, make una no use iron tool on dem.
  6. Make una use stones wey una no cut—take build di altar for Baba-God, con sacrifice burnt offerings on am to Baba-God wey be una Oga.
  7. Make una give peace offerings, con chop for there, and make una happy for front of Baba-God una Oga.
  8. And make una write all di words of di law on dis stones, so dat pipo go fit see am well-well.”
  9. Naso Moses plus di priests, di Levites, tok to all di pipo of Israel, “Make una calm down and make una  listen, oh Israel: Una don turn to di pipo of Baba-God una Oga today.
  10. So una go obey di voice of Baba-God una Oga, con  keep hin words and hin laws wey I dey tell una today.”

Curses From Mountain Ebal

11. And Moses tell di pipo di same day sey,

12. “Wen una cross River Jordan, di tribes of Simeon, Levi, Judah, Issachar, Joseph, plus Benjamin—go stand for mountain Gerizim to bless di pipo,

13. And di tribes of Reuben, Gad, Asher, Zebulun, Dan, plus Naphtali go climb mountain Ebal—to curse.

14. “And di Levites go tok wit loud voice, con tell all di  men of Israel sey,

15. ‘Make curse dey on any pesin wey make image wey  dem carve or idol, sometin wey be tufiakwa for Baba-God, di handwork of artist, con set am up for secret.’ And all di pipo go tok sey, ‘Iseeee!’

16. ‘Make curse dey for di head of any pesin wey dey use hin mama and papa take do anyhow.’ And all di  pipo go tok sey, ‘Iseeee [Amen]!’

17. ‘Make curse dey for di head of any pesin wey shift hin neighbour boundary stone.’ And all di pipo go tok sey, ‘Iseeee’

18. ‘Make curse dey on di head of any pesin wey let blind man waka miss-road.’ And all di pipo go tok sey, ‘Iseeee’

19. Make curse dey on di head of any pesin wey bend di justice wey stranger or pesin wey no get papa, or widow.’ And all di pipo go tok sey, ‘Iseee!’

20. Make curse dey on di head of any pesin wey sleep wit hin papa wife. Di man don disrespect hin papa bed. And all di pipo go tok sey, ‘Iseeee!’

21. Make curse dey on di head of any pesin wey sleep  wit any kind of animal,’ and all di pipo go tok sey, ‘Iseeee!’

22. ‘Make curse dey on di head of any pesin wey sleep  wit hin sista, di daughter of hin papa or di daughter  of hin mama.’ And all di pipo go tok sey, ‘Iseee!’

23. Make curse dey for di head of any pesin wey sleep wit hin moda-in-law.’ And all di pipo go tok sey, ‘Iseee!’

24. Make curse dey for di head of any pesin wey attack  hin neighbour codedly.’ And all di pipo go tok sey, ‘Iseee!’

25. Make curse dey on di head of any pesin wey collect bribe to kill innocent pesin.’ And all di pipo go tok sey, ‘Iseeee!’

26. Make curse dey on di head of any pesin wey no gree  confam all di words of dis law, to do dem.’ And all di  pipo go tok sey, ‘Iseeee!’

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website