Deuteronomy

Deuteronomy Chapter 7

Abeg click here to share dis post

Pursue Di Nations

  1. Wen Baba-God una Oga carry una enta di land wey  una go enta to claim, con pursue plenty nations komot from una front; di Hittites, Girgashites, Amorites, Canaanites, Perizzites, Hivites plus Jebusites, seven nations wey big and strong pass una—
  2. And wen Baba-God una Oga don carry dem put for  una hand, make una take-over dem, con scata dem  kpatakpata. Make una no make any agreement wit dem, and make una no sorry-for dem.
  3. Make una no marry dia pipo. No give una women to  dia men, or marry dia daughters for una sons,
  4. Becos dem go turn una sons komot from following me, to serve dia gods, and Baba-God go vex for una  like faya, con scata una sharp-sharp.
  5. Na wetin una go do to dem be dis: scata dia altars, break dia images for ground, cut dia Asherah image  of wood, con use faya take burn dia idols wey dem carve.
  6. Becos una be pipo wey holy for Baba-God una Oga—wey don choose una to be special pipo for  hinsef out of all di pipo wey dey for di earth.
  7. Baba-God no love una con choose una becos una plenty pass di oda pipo; una even small pass of all  di pipo.
  8. But na becos Baba-God love una, con keep di oath wey he swear to una ancestors—nahin make am carry una come out wit strong hand, con save una from di land of where una be slaves, from di pawa of  Pharaoh wey be di king of Egypt.
  9. So make una sabi now sey Baba-God una Oga nahin  be Baba-God, na di faithful God, he dey keep hin agreement and love, for one thousand generations—wit those pipo wey love am, and wey dey do wetin he tok.
  10. But he go use scata-scata take revenge for di face of those pipo wey hate am; he no go do sme-sme to  punish di pipo wey hate am.
  11. So make una calm down to follow wetin he tell una, hin words, commandments and hin laws wey I dey give una today—to do dem.

Baba-God Promise

12. If una put-mind for dis laws, and una calm down to follow dem, naso Baba-God wey be una Oga go keep hin agreement and soft-love wit una, as he bin swear to una papa-papa-papa.

13. He go love una, and bless una, con make una burku. He go bless di pikin for una belle, una farm for di land—di food wey una plant, new wine and ororo, he  go bless di pikin of una malu, di pikin of una sheep, plus di pikin of una goats.

14. Baba-God go bless una pass any oda pipo, none of  una men or women go dey wit-no pikin, or even any of una animals no go dey wit-no pikin.

15. Baba-God go make una free from everi disease. Baba-God go komot everi sickness from una. He no go let any of di disease wey una see for Egypt—come near una, but he go use dem take punish all di pipo wey hate una.

16. Una must scata all di pipo wey Baba-God una Oga  put for una hand. Make una no sorry-for dem and make una no serve dia gods, becos dat one go be like trap for una.

17. If una tok for inside una heart sey, “All dis nations get pawa pass us. How we go take pursue dem komot?”

18. But make una no fear dem; no forget wetin Baba-God una Oga do Pharaoh plus di whole of Egypt.

19. Remember di bad disease wey una see wit una korokoro eyes, di miracles plus di wonders, plus di ogbonge pawa and strength wey Baba-God una Oga  use take free una. Just as he scata di Egyptians, naso Baba-God go do to all dis pipo wey una dey fear now.

20. But Baba-God una Oga go send hornet [gbege from  Baba-God] among dem, until even di pipo wey survive, wey dey hide from una—don kpeme.

21. Make una no let dem make una fear, becos Baba-God wey be una Oga na great and ogbonge God.

22. Baba-God una Oga go pursue di nations komot from  una front—small-small. Baba-God no go let una komot dem at onces, or wild animals go con plenty among una.

23. But Baba-God una Oga go put dem for una hand, he  go cos serious katakata for dem, until dem scata kpatakpata.

24. He go put dia kings for una hand, and una go wipe dia names komot from di earth. No pesin go fit fight  una; until una don scata dem finish.

25. Una go burn dia images wit faya. Make una no carry  di silver and gold wey dey on dem, make una no carry am for unasef, or e go put una for trap, becos Baba-God hate dem.

26. No carry anytin wey be tufiakwa enta your house, or  curse go dey on you just like di tin; hate sometin like dat, and no near dat kain tin, becos na sometin wey curse dey on.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website