Joshua

Joshua Chapter 10

Abeg click here to share dis post

Di Sun No Gree Move

  1. Now, Adonizedek wey be di king of Jerusalem con hear sey Joshua don take-over Ai, con scata am kpatakpata, and sey Joshua do Ai plus dia king, di same tin wey he do to Jericho plus dia king—and sey di pipo of Gibeon don make agreement of peace wit di pipo of Israel, and dem dey stay near Israel.
  2. Him and hin pipo con dey fear well-well becos of dis tin, becos Gibeon na big city, as one of di royal cities; Gibeon big pass Ai and all di men for Gibeon sabi fight well-well.
  3. So Adonizedek wey be di king of Jerusalem con send message to Hoham wey be di king of Hebron, Piram wey be di king of Jarmuth, Japhia wey be di king of Lachish, plus Debir wey be di king of Eglon.
  4. Adonizedek con tok sey, “Make una come epp me attack Gibeon, becos dem don go make peace wit Israel and Joshua.”
  5. Naso di five kings of di Amorite—di king of Jerusalem, di king of Hebron, di king of Jarmuth, di king of Lachish, plus di king of Eglon—join dia pawa togeda. Dem go up wit all dia sojas, con take dia positions against Gibeon, and dem attack Gibeon.
  6. So di pipo of Gibeon send message go meet Joshua for di camp wey dey for Gilgal: “No leave your servants. Come up to meet us sharply to save us! Epp us, becos of all di kings of di Amorite wey dey for di mountains don gada togeda to fight us.”
  7. So Joshua march from Gilgal wit hin whole army, plus all di men wey sabi fight well-well.
  8. Baba-God con tell Joshua sey, “Make you no fear dem; I don put dem for your hand. No single one of dem go fit stand for your front.”
  9. Afta dem march tru-out di night from Gilgal, Joshua attack dem wit surprise.
  10. Baba-God cos katakata for dem—for front of di pipo of Israel. Israel kill dem well-well for Gibeon, con pursue dem for road wey dey go Bethhoron, and kill dem go reach Azekah plus Makkedah.
  11. As dem dey run from di pipo of Israel—for di road wey dey go Bethhoron, naso Baba-God throw big ice-stones on dem from sky, until dem reach Azakah, and dem die. Di ones wey die from di ice-stones wey fall from sky plenty pass di ones wey Israel kill wit sword.
  12. On di day wey Baba-God give di Amorites to Israel, Joshua con tok to Baba-God for front of di pipo of Israel—sey, “Oh sun, stand still for Gibeon; moon, stand still—for bottom-of-di-mountain wey dem dey call Ajalon.”
  13. So di sun stand for one place, and di moon stop, till Israel revenge on dia enemies, as dem write am for di book of Jashar. “Di sun stop for di middle of di sky and e no gree go down for one full day.”
  14. Day like dat neva dey before or since dat time, day wey Baba-God listen to man. Naso Baba-God fight for Israel!
  15. So Joshua go back wit all di pipo of Israel to di camp wey dey for Gilgal.

Dem Kill Five Amorite Kings

16. So di five kings run, con hide inside rock for Makkedah.

17. Naso dem gist Joshua sey, “Dem don see di five kings dey hide for inside rock or Makkedah.”

18. So Joshua tok sey, “Make una roll big stone for di mouth of di rock, and put some men for there wey go dey guard am.

19. But make una no stop! Pursue una enemies, attack dem from back. No give dem chance to enta dia cities, becos Baba-God una Oga don make una win dem.”

20. So Joshua plus di pipo of Israel scata dia enemies kpatakpata—sote almost no pesin remain, naso di ones wey remain among dem con manage reach dia strong cities.

21. Di whole army come back to meet Joshua safely for di camp for Makkedah, and no pesin fit tok any word against di pipo of Israel.

22. Naso Joshua tok sey, “Open di mouth of di rock, con carry those five kings come out to meet me.”

23. So dem carry di five kings come out from inside di rock; di king of Jerusalem, di king of Hebron, di king of Jarmuth, Lachish, plus di king of Eglon.

24. Wen dem carry di kings come meet Joshua, he call all di men of Israel, con tell di army commanders wey follow am, sey, “Come here, make una carry una legs put on di necks of all dis kings.” So dem come front, con put dia legs on dia necks.

25. Naso Joshua tell dem sey, “Make una no fear; make una spirit no weak. Make una dey strong and get-mind. Naso Baba-God go do to all di enemies wey una go face.”

26. So Joshua kill di kings, con hang dem for five trees, and dem hang for di trees reach evening.

27. Wen evening reach, Joshua sey make dem go carry di kings come down from di trees, and dem throway dem for inside di rocks wey dem bin dey hide before. Dem put big stones for front of di rock—wey still dey for there till today.

Joshua Scata Di Cities For Di South

28. Joshua take-over Makkedah dat day. He use sword kill di pipo for di city plus dia king—and he kill everi pesin kpatakpata. He no let any pesin survive am. And he do di king of Makkedah di same tin wey he do to di king of Jericho.

29. Naso Joshua plus all di men wey dey wit am move from Makkedah go Libnah, con attack Libnah.

30. Baba-God still put di city plus dia king for Israel hand. Joshua use sword take kill everi pesin wey dey for inside di city. He no let any pesin survive am. He do di king, di same tin wey he do to di king of Jericho.

31. Naso Joshua plus all di pipo of Israel wey dey wit am move from Libnah go Lachish; dem surround di place, con attack di place.

32. Baba-God put Lachish for di hand of di pipo of Israel, and Joshua take-over di city di second day. He kill everi pesin wey dey for di city wit sword, just as he bin do to Libnah.

33. Naso Horam wey be di king of Gezer bin come epp Lachish, but Joshua kill him and hin army sote no pesin remain.

34. Naso Joshua plus all di pipo wey dey wit am move from Lachish go Eglon; dem surround di place, con attack di place.

35. Dem take-over di city di same day, dem kill everi pesin wit sword, con kill everi pesin kpatakpata, just as he bin do to Lachish.

36. Naso Joshua plus all di men wey dey wit am move from Eglon go Hebron, con attack di place,

37. dem take-over di place, con kill everi pesin wit sword—togeda wit dia king, and all dia cities plus everi pesin wey dey for there. Dem no let any pesin survive am. Just like Eglon, dem scata di city kpatakpata plus everi pesin wey dey for inside di city.

38. Naso Joshua plus all di pipo of Israel wey dey wit am turn round, con attack Debir.

39. Dem take-over di city, dia king, plus dia cities. Dem kill everi pesin wit sword. Dem kill everi pesin wey dey there kpatakpata. Dem no allow any pesin survive. Dem do Debir plus e king—di same tin wey dem do to Libnah and Hebron, plus dia kings.

40. So Joshua take-over di whole area, di mountain kontri, di south, di lowland, plus di springs, and all di kings. He no let any pesin survive, but he kill everitin wey dey breath kpatakpata—just as Baba-God wey be di God of Israel bin tell am.

41. Joshua scata dem—from Kadeshbarnea reach Gaza, and from di whole area of Goshen reach Gibeon.

42. Joshua take-over all dis kings plus dia lands at once, becos Baba-God wey be di Oga of Israel fight for Israel.

43. So Joshua plus all di pipo of Israel go back to di camp for Gilgal.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website