Joshua

Joshua Chapter 3

Abeg click here to share dis post

Di Pipo of Israel Cross River Jordan

  1. For early mor-mor, Joshua wake up, and all di pipo of Israel komot from Shittim, con go River Jordan—him plus all di pikin of Israel. Na for there dem camp before dem cross di river.
  2. E con happun sey—afta three days, di officers patrol for inside di camp,
  3. con tell di pipo sey: “Wen una see Baba-God Ark of di agreement, and di priests [Levites] dey carry am, una go komot from where una dey, con follow am.
  4. Naso una go sabi which way una go follow, since una neva reach di place before. But make una give space of about hundred yards between una and di Ark; make una no go near am.”
  5. Joshua tell di pipo sey, “Make una clean unasef, becos Baba-God go do ogbonge tin among una tomorrow.”
  6. Joshua con tell di priests sey, “Make una carry di Ark of di agreement and make una go for front of di pipo to cross River Jordan.” So dem carry di Ark of di agreement, con dey move go for front of di pipo.
  7. Naso Baba-God tell Joshua sey, “Today, I go start to dey give you levels for di eyes of di pipo of Israel. So dat dem go sabi sey I go dey wit you as I bin take dey wit Moses.
  8. Tell di priests wey dey carry di Ark of di agreement sey: ‘Wen una reach di corner of River Jordan, una go stand for inside di river and una no go move.’ ”
  9. So Joshua tell di pipo of Israel sey, “Make una come here to hear di word of Baba-God wey be una Oga.”
  10. He tok sey, “Dis na how una go take sabi sey di God wey dey alive dey among una, and sey he go surely pursue di Canaanites from una front, and even di Hittites, Hivites, Perizzites, Girgashites, Amorites and Jebusites.
  11. See, di Ark of di agreement of Baba-God, of di whole earth, go pass Jordan dey go for una front.
  12. So now make una choose twelve men, from everi single tribe of Israel.
  13. E go happun sey, as di priests wey dey carry Ark of Baba-God—di God of di whole earth—put dia leg for River Jordan, di water wey dey flow go stop from di up side. And di water go gada like wall.”
  14. E con happun sey as di pipo komot from dia camps to cross river Jordan, and di priests wey dey carry di Ark of di Agreement—dey for front of di pipo.
  15. River Jordan dey always overflow tru-out harvest time. But as di priests wey dey carry di Ark reach River Jordan and dia leg touch di water,
  16. naso di water wey dey flow from up side of di river con stop. Di water gada togeda con form wall for one place wey far—for one city wey dem dey call Adam near Zarethan, and di water wey dey flow go down to di River of di Arabah [di Salt Sea] stop, con cut komot kpatakpata. So di pipo cross go di oda side opposite Jericho.
  17. Di priests wey dey carry di Ark stand strong for dry ground, for di middle of River Jordan, and all di pipo of Israel cross for dry ground, until all di pipo cross kpatakpata.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website