Numbers

Numbers Chapter 28

Abeg click here to share dis post

 Di Offerings Wey Dem Dey Give Everi Day

  1. Baba-God con tell Moses sey,
  2. “Tell di pipo of Israel sey make dem do dis tins, and tell dem sey: ‘Make sure sey una carry di food for my offering wey una make wit faya—come meet me for di correct time—na as sweet scent wey dey make me happy.”
  3. Tell dem sey: “Dis na di offering wey una go make wit faya, wey una go carry come meet Baba-God: two lambs wey be one year old and wey no get comma for body, as normal burnt offering everi day.
  4. Prepare one lamb for morning and di oda one for evening,
  5. Togeda wit seed offering of 1kg of fine flour, wey dem mix wit 1 liter of pure ororo wey dem press from olive fruits.
  6. Na dis be di normal burnt offering for everi day, na for Mountain Sinai dem first offer am, as sacrifice wey una make wit faya—na sweet scent wey Baba-God like.
  7. Along wit am, una must offer drink offering wit everi single lamb; 1 liter of wine. Pour di ogogoro [strong drink] for di holy-place as offering to Baba-God.
  8. Prepare di second lamb for evening along wit di same kind of seed offering plus drink offering wey una prepare for morning. Dis na offering wey we make wit faya—sweet scent wey dey make Baba-God happy.

Sabbath Offerings

9. “On di Sabbath dey, make offering wit two lambs wey be one year old and wey no get comma for body, togeda wit e drink offering and seed offering of 1.8kg of fine flour wey una mix wit olive ororo, plus di drink offering.

10. Na dis be di burnt offering for everi Sabbath, to add-join di normal burnt offering and e drink offering.

Offerings For Di Month

11. “On di first day of everi month, carry burnt offering go meet Baba-God—two small-malu, one ram plus seven male lambs wey be one year old, and wey no get comma for body,

12. Make seed offering for everi single malu—about 3kg of fine flour wey una mix wit ororo, and about 2kg of fine flour mix wit ororo—for one ram;

13. and about 1kg of fine flour mix wit ororo, as seed offering for everi single lamb. Di burnt offering na sweet scent wey Baba-God like—na sacrifice wey dem make wit faya to Baba-God (na food offering).

14. Di correct drink offering na 2liters of wine for everi single malu, 1.5liters of wine wit di ram, and 1liter for everi single lamb. Naso dem take dey organize di burnt offering for di first day of everi month tru-out di year.

15. apart from di normal burnt offering wit e drink offering, una go carry one he-goat go meet Baba-God as sin offering.

 Di Passover Plus Di Festival Of Bread Wit No Yeast

16. “On di fourteenth day of di first month, make una do di Passover of Baba-God.

17. On di fifteenth day of dis month, make una do festival; make una chop bread wey dem make wit-no yeast for seven days.

18. Make una do holy meeting on di first day, and make una no do any work.

19. Make una carry offering wey una make wit faya go meet Baba-God (food offering); two small malu, one ram, plus seven male lambs wey be one year old, and make all of dem no get comma for body.

20. Offer di correct seed offering of fine flour wey una mix wit olive ororo: 3kg of wit everi single malu, and 2kg wit di ram,

21. and 1kg for everi single one of di seven lambs.

22. Add one he-goat join as sin offering, to sacrifice for una sins to make una clean.

23. Prepare dis tins to add-join di normal morning burnt offering wey una dey always do.

24. Wit di same way nahin una go take give Baba-God di food offering, wey una dey bring as special gift, for seven days. Na sweet scent wey Baba-God like. Offer dis tins to add-join di everi day offering plus di drink offering.

25. Make una gada for worship on di seventh day, and make una no do any normal work.

Festival of Weeks

26. “ ‘On di day of firstfruits, wen una carry offering of new seed go meet Baba-God—for di Festival of Weeks, make una gada to worship Baba-God, and make una no do any work.

27. Carry burnt offering of two small-malu go meet Baba-God, plus one ram, and seven lambs wey be one year old, as sweet scent wey dey make Baba-God happy.

28. Offer di correct seed offering of fine flour wey dem mix wit olive ororo: 3kg wit everi single malu, 2kg wit everi single ram,

29. plus 1kg wit everi single one of di seven lambs.

30. One one small he-goat to sacrifice for una sins to make una clean.

31. Prepare dis tins togeda wit dia drink offerings, to add-join di normal burnt offering and e seed offering wey una dey always offer, and make sure sey di animals no get comma for body.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website