Numbers

Numbers Chapter 3

Abeg click here to share dis post

Dem Separate Di Levites [Aaron Sons]

  1. Dis na di generations of di family of Aaron and Moses, on di day wen Baba-God follow Moses tok for Mountain Sinai.
  2. Di names of di sons of Aaron na; Nadab wey be di first born, Abihu, Eleazar, plus Ithamar.
  3. Na di names of Aaron sons be dis, di priests wey dem anoint, wey dem bless to make dem holy to serve as priest.
  4. But Nadab and Abihu die for Baba-God front wen dem make offering wit faya wey dem no suppose do, for Baba-God front, for inside di Desert of Sinai. Dem bin no get sons, so only Eleazar and Ithamar con serve as priests wit dia papa Aaron.

Di Levites Go Serve For Di Worship-place

5. Baba-God con tell Moses sey,

6. “Bring di tribe of Levi, con carry dem go show Aaron di priest, make dem dey epp am.

7. Dem go dey work for Aaron and di whole pipo of Israel—for di worship-place, to do di service of di worship-place.

8. Na dem go take care of all di instruments for inside di worship-place, and dem go dey serve for di worship-place—for di pipo of Israel.

9. Give di Levites to Aaron and hin sons, na dem be di pipo of Israel wey go serve am fully.

10. Choose Aaron and hin sons to serve as priests; dem must kill any stranger wey go near di worship-place.”

11. Baba-God still tell Moses sey,

12. “I don take di Levites from among di pipo of Israel, instead of all di firstborn sons of di pipo of Israel. So di Levites belong to me;

13. Becos na me get all di firstborn. Wen I kill all di firstborn inside Egypt, I keep di firstborn of di pikin of Israel for mysef—whether na human being or animal. Na me get dem. Na me be Baba-God.”

14. Naso Baba-God tell Moses for inside di Desert of Sinai—sey,

Census For Di Worship-place

15. “Count di Levites by dia families and dia papa house. Count everi boy from one month old go up.”

16. So Moses count dem just as Baba-God yarn am.

17. Na dis be di names of di sons of Levi: Gershon, Kohath plus Merari.

18. Na dis be di names of di sons Gershon by dia families: Libni and Shimei.

19. Na dis be di names of di sons Kohathite by dia families: Amram, Izhar, Hebron, plus Uzziel.

20. Na dis be di names of di sons Merarite by dia families: Mahli and Mushi. Na dis be di families of di Levite based-on dia papa house.

21. Gershon belong to di families of Libnites and Shimeites; na dem be di Gershonite pipo.

22. Di numbas of all di boys from one month old go up, na 7,500 wen dem count dem.

23. Di families of Geshon go camp for di west side, for back of di worship-place.

24. Di chief of di families of di Gershonites na Eliasaph wey be son of Lael.

25. Di sons of Gershon nahin dey in charge of di tent of di worship-place, di different covers, di curtains for di doormot,

26. di curtains for di yard, and di curtains for di door of di yard, wey dey for di worship-place, di curtains wey dey for di altar, and di curtains wey dey round di altar, plus di ropes. Na dem dey in charge of everitin wey relate to how dem dey use dis tins.

27. Di pikin-pikin-pikin of Kohath na from di families of Amram, Izhar, Hebron, plus Uzziel. Na dis be families of di Kohathites.

28. Di numba of all di boys from one month old go up, na: 8,600. Na di Kohathite dey take care of di worship-place.

29. Di families of di sons of Kohath go set dia camp di south side of di worship-place.

30. Di chief of di families of di Kohath na Elizaphan wey be di son of Uzziel.

31. Na dem dey take care of di Ark, di table, di lampstand, di altars, di tool for di worship—place wey dem dey use for dia work, di inside curtains. Di Kohathites nahin dey in charge of all di service of all dis tins.

32. Di chief leader of di Levites na Eleazar wey be son of Aaron. Na dem dey to control those pipo wey dey take care of di worship-place.

33. Di pikin-pikin-pikin of Merari na from di families of Mahites plus di Mushites; na dis be di families of Merari.

34. Di numba of boys from one month old go up, na; 6,200 wen dem count dem.

35. Dem give dem di area wey dey for di north side of Baba-God house as dia camp. Di leaders of di families of di Merari na Zuriel wey be di son of Abihail.

36. Merarite families nahin go dey take care of di frames of di worship-place, di crossbars, di pillars, di solid-bottom, plus all di tools. Na dem dey in charge of all di work wit dis tins.

37. Na dem still dey in charge of di pillars of di yard plus all dia solid-bottom, tent-hook, and ropes for di tent.

38. Dem keep dis area for Moses plus Aaron and hin sons: di area wey dey for front of di worship-place, for di east where di sun dey rise. Na dem dey in charge of di holy place for di pipo of Israel. And dem go kill any pesin wey no be Levite or priest wey go near di holy-place.

39. Di whole numba of boys for di tribe of Levi na 22,000, wen dem count dem, from one month old go up, based-on dia families—as Baba-God tell Moses and Aaron.

Di Firstborn Plus Di Levites

40. “Baba-God con tell Moses sey, “Count all di firstborn wey be boys for Israel, wey be from one month old go up, and write dia names down.

41. You must keep di Levites for me to replace di firstborn sons of Israel; na me be Baba-God. And dem must keep di animals of di Levites for me, to replace di firstborn animals of all di pipo of Israel.”

42. So Moses count all di firstborn of all di pikin of Israel, as Baba-God tell am.

43. Di whole numba of di boys wey be firstborn from one month old go up—na; 22,273 wit dia names wey dem write.

44. Baba-God still tell Moses sey,

45. “Take di Levites to replace di firstborn sons of di pipo of Israel. And take di animals of di Levites to replace di firstborn animals of di pipo of Israel. Di Levites belong to me; na me be Baba-God.

46. You go count 273 firstborn sons of Israel before you see one Levite. And to save dis extra firstborn sons,

47. collect five pieces of silver for everi single one of dem (make everi single piece of silver weigh di same as di standard for di holy-place, wey equals to twenty gerahs).

48. Give Aaron di silver and hin sons as di price to save di extra firstborn sons.”

49. So Moses collect di silver for buying back di firstborn sons of Israel  wey plenty pass di Levites. Di weight of di silver na based-on di standard weight of silver for di worship-place.

50. he collect silver wey weigh 1,365 silver coins for di firstborn sons of di pipo of Israel. Di weight of di silver na based-on di standard weight of silver for di worship-place.

51. Naso Moses carry di silver give Aaron plus hin sons, just as Baba-God bin tell dem to do.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website