Numbers

Numbers Chapter 30

Abeg click here to share dis post

Festival of Trumpets

  1. “On di first day of di seventh month, make una do holy meeting, and make una no do any normal work. Dis na di day wen una go sound di trumpets.
  2. As sweet scent wey dey make Baba-God happy, prepare burnt offering of one small-malu, one ram, plus seven male lambs wey be one year old, and wey no get comma for body.
  3. Offer di correct seed offering of fine flour wey una mix wit ororo; 3kg wit di malu, 2kg wit di ram,
  4. and 1kg for everi one of di seven lambs.
  5. Plus one small he-goat as sin offering to do sacrifice to clean una sins.
  6. Dis na to add-join di burnt offering of everi month, plus di burnt offering of everi day wit dia seed offering plus dia drink offerings—based-on wetin di Law tok. Dem be offering to Baba-God wey dem make wit faya—and na sweet scent wey Baba-God like.

Day For Di Cleaning of Sin

7. “On di tenth day of dis seventh month, make una do holy meeting. Una must no chop any food or do any work.

8. Carry burnt offering  go meet Baba-God—burnt offering wey be sweet scent wey dey make Baba-God happy; one small-malu, one ram, plus seven male lambs wey be one year old and wey no get comma for body.

9. Offer di correct seed offering of fine flour wey you mix wit ororo: 3kg of fine flour wit di malu, 2kg of fine flour wit di ram,

10. And 1kg of fine flour wit everi single one of di seven lambs.

11. And still offer one he-goat as sin offering, to add-join di sin offering to clean di pipo sins, and di burnt offering for everi day, wit dia seed offerings plus di drink offerings.

Festival of Tents

12. “On di fifteenth day of di seventh month, make una do holy meeting, and make una no do una normal work. Celebrate festival to Baba-God for seven days.

13. Make una give burnt offering to Baba-God, sacrifice wey dem make wit faya as sweet scent wey dey make Baba-God happy—burnt offering of thirteen small-malu, two rams, plus fourteen male lambs wey be one year old, and wey no get comma for body.

14. Give di correct seed offering of fine flour wey dem mix wit ororo: 3kg of fine flour wit everi single malu, 2kg of fine flour wit everi single ram,

15. and 1kg of fine flour wit everi single one of di fourteen lambs;

16. Plus one small he-goat as sin offering, to add-join di normal burnt offering, di drink offering, plus di seed offering wey dem dey always give.

17. “On di second day, carry offering come meet Baba-God—twelve small-malu, two rams plus fourteen male lambs wey be one year old, and wey no get comma for body;

18. And arrange seed offering plus drink offerings based-on di law, and di numbas of di malu, rams, plus lambs;

19. Plus one small he-goat as sin offering, to add-join di normal burnt offering wit e seed offering, and dia drink offerings wey dem dey always give.

20. “On di third day, prepare eleven small-malu, two rams, and fourteen male lambs wey be one year old, and wey no get comma for body;

21. Wit all di malu, rams and lambs; prepare dia seed offering and drink offerings based-on di law and dia numbas;

22. Add small he-goat join as sin offering, to add-join di normal burnt offering, wit e seed offering and drink offering wey dem dey always give.

23. “On di fourth day, prepare ten small malu, two rams plus fourteen male lambs wey be one year old, and wey no get comma for body

24. Wit all di small malu, rams, and lambs; prepare dia seed offering plus drink offerings based-on di law and dia numbas;

25. Add one he-goat join as sin offering, to add-join di normal burnt offering, wit e seed offering and drink offering wey dem dey always give.

26. “On di fifth day, prepare nine small-malu, two rams, plus fourteen lambs wey be one year old, and wey no get comma for body;

27. Wit all di malu, rams and lambs; prepare dia seed offering and drink offering based-on di law, and dia numbas;

28. Add one he-goat join as sin offering, to add-join di normal burnt offering, wit e seed offering and drink offering wey dem dey always give.

29. “On di sixth day, prepare eight small-malu, two rams, plus fourteen male lambs wey be one year old, and wey no get comma for body;

30. Wit all di malu, rams and lambs; prepare dia seed offering and drink offering based-on di law and dia numbas;

31. Add one he-goat join as sin offering, to add-join di normal burnt offering wey una dey always do, wit e seed offering, plus drink offering.

32. “On di seventh day, prepare seven small-malu, two rams, plus fourteen male lambs wey be one year old, and wey no get comma for body;

33. Wit all di malu, rams and lambs; prepare dia seed offering and drink offering based-on di law, and dia numbas;

34. Add one he-goat join as sin offering, to add-join di normal burnt offering, wit e seed offering and drink offering wey dem dey always give.

35. “On di eight day, make una do holy meeting, and make una no do any normal work.

36. Make una give burnt offering to Baba-God, sacrifice wey una make  wit faya, as sweet scent wey dey make Baba-God happy—burnt offering of one small-malu, one ram, plus seven male lambs wey be one year old, and wey no get comma for body;

37. Wit all di malu, rams and lambs, prepare dia seed offering plus drink offering based-on tradition and dia numbas;

38. Add one he-goat join as sin offering, to add-join di normal burnt offering, wit e seed offering and drink offering wey dem dey always give.

39. “To add-join wetin una don promise Baba-God, and una offering from una free mind, prepare dis tins for Baba-God for una festivals everi year: una burnt offerings, seed offerings (meat offerings), drink offerings, plus peace offerings.’ ”

40. So Moses tell di pipo of Israel everitin wey Baba-God tell am to do.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website