Numbers

Numbers Chapter 32

Abeg click here to share dis post

Three Tribes Settle Down For Di East Of Jordan

  1. Di pipo of Reuben plus di pipo of Dan wey get plenty malu and oda animals. Wen dem see sey di land of Jazer and Gilead dey okay for animals,
  2. Di pipo of Reuben and di pipo of Gad go meet Moses plus Eleazar di priest, and di leaders of di pipo, con tell dem sey,
  3. “Ataroth, Dibon, Jazer, Nimrah, Heshbon, Elealeh, Sebam, Nebo, and Beon—
  4. plus di land wey Baba-God don epp di pipo of Israel collect—na beta land wey good for malu, and we get plenty animals.
  5. If we don see favour for your eyes, give di land to your servants as awa property. No let us cross River Jordan.”
  6. Moses con tell di pipo of Gad and di pipo of Reuben sey, “Abi una kontri men go go war and una go just sidon for here?
  7. Why una dey make di pipo of Israel lose mind to go di land wey Baba-God don give dem?
  8. Na wetin una papa do wen I send dem from Kadesh Barnea to go look di land.
  9. Afta dem climb from bottom-of-di-mountain wey dem dey call Eshcol, con see di land, dem make di pipo of Israel lose mind, sote dem no fit enta di land wey Baba-God don give dem.
  10. Baba-God con vex well-well dat day—sote he con swear sey:
  11. “Becos dem no gree follow me wit dia full heart, no single pesin wey be from twenty years go up, wey komot from di land of Egypt—go see di land wey I promise wit oath to Abraham, Isaac and Jacob.
  12. No single one of dem except Caleb wey be di son of Jephunneh di Kenizzite, plus Joshua wey be di son of Nun; becos dem follow Baba-God wit dia full heart.
  13. Baba-God con dey vex for Isreal like faya, con make dem dey waka-waka for inside di desert for forty years, until di whole generation of all those pipo wey don do evil tins for Baba-God eyes—pass komot.
  14. “And see, una for here, families of sinners, wey dey represent una papa, and una dey make Baba-God seriously vex wit Israel more-more.
  15. If you una komot from following am, he go leave all dis pipo again for inside di desert, and una go scata all dis pipo.”
  16. Naso dem come meet am, con tok sey, “We go like to build house for here for awa animals, and cities for awa women and awa pikin.
  17. But we ready to carry weapon, con move for front of di pipo of Israel, until we don carry dem enta dia place. For now awa women and pikin go stay for city wey get fence to guard dem from di pipo wey dey for di area.
  18.  We no go go back to awa house until all di pipo of Israel don claim dia land.
  19. We no go claim any land among dem for di oda side of River Jordan, or for front, becos we don receive awa share for here for di east side of di Jordan.”
  20. So Moses tell dem sey, “If una do dis tin—if una go carry weapon for Baba-God front, for war
  21. and una men wey be sojas go cross River Jordan, con attack una enemies until Baba-God pursue hin enemies from Hin front,
  22. den una go take-over di land as Baba-God dey look una, den una fit go back, becos una go don do wetin Baba-God plus di oda pipo of Israel want. And di land go be una property for Baba-God eyes.
  23. “But if una no do dis tin, una don commit sin against Baba-God; and make una dey sure sey una sin go catch una.
  24. Build cities for una women and pikin, and house for una animals, but do wetin una don promise.”
  25. Di pipo of Gad plus di pipo of Reuben con tell Moses sey, “We your servants go do wetin awa oga don tell us to do.
  26. Awa pikin and awa wives, awa animals and plenty malu go stay for here for di cities of Gilead.
  27. But we your servants, everi man wey dey carry weapon to fight, go cross River Jordan to fight as Baba-God dey look, just as awa oga don tell us to do.”
  28. Naso Moses tell Eleazar, Joshua, plus di oda leaders of Israel—wetin to do about dem:
  29. He tell dem sey, “If di pipo of Gad plus di pipo of Reuben, wit everi man carry weapon to fight, con cross River Jordan wit you as Baba-God dey look, den una take-over di land; give dem di land of Gilead as dia property.
  30. But if dem no follow you cross River Jordan wit weapon, dem must accept share of land wit you for Canaan.”
  31. Di pipo of Gad plus di pipo of Reuben con ansa, “We go do wetin Baba-God tok.
  32. We go cross over as Baba-God dey look—enta Canaan, wit weapon, so dat di land for dis side of River Jordan go belong to us.”
  33. Naso Moses give di pipo of Gad plus di pipo of Reuben, and di half-tribe of Manasseh wey be di son of Joseph—di kingdom of Sihon of di Amorites, and di Kingdom of Og wey belong to di king of Bashan—di whole land plus e cities and di areas wey dey around dem.
  34. Di pipo of Gad build Dibon, Ataroth, Aroer,
  35. Atroth Shophan, Jazer, and Jogbehah,
  36. Beth Nimrah plus Beth Haran—cities wey get wall. And dem build house for dia animals.
  37. Di pipo of Reuben build Heshbon, Elealeh and Kiriathaim,
  38.  And even Nebo plus Baal Meon (dem change dis names), plus Sibmah. Dem rename di new cities wey dem build.
  39. Di pikin-pikin-pikin of Manasseh go Gilead, dem take-over di place, con pursue di Amorite wey dey for there.
  40. So Moses give Gilead to di pipo of Machir, di pikin-pikin-pikin of Manasseh, and dem settle down for there.
  41. Jair wey be one of di pikin-pikin-pikin of Manasseh take-over dia small towns, con name dem Havothjair.
  42. Nobah take-over Kenath plus di villages wey dey around di area, and he name dem Nobah—he name di place wit hin own name.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website