Numbers

Numbers Chapter 4

Abeg click here to share dis post

Di Work of Di Sons Of Kohath

  1. Naso Baba-God follow Moses plus Aaron tok sey,
  2. “Count di Kohathite from among di sons of Levites, by dia families and by dia papa house.
  3. Count all di men from thirty to fifty years old, wey fit serve for di work inside di worship-place.
  4. “Na dis be di work of di Kohathite inside di worship-place: na dem go take care of di most holy tins.
  5. Any time wey dem move di camp, Aaron and hin sons must enta di worship-place first to komot di inside curtain, con use am take cover di Ark of di agreement.
  6. Dem must cover di inside curtain wit badger skin, con use blue cloth take cover am. Las-las, dem must put di poles to carry di ark for dia positions.
  7. “Afta dat, dem must spread blue cloth take cover di table where di Bread wey dem dey give to Baba-God dey, and dem go put di bowl for di cloth, di spoons, jugs for pouring, plus di oda tools, and dem go put di special bread for there.
  8. Dem must use red cloth take cover all dis tins, and las-las dem go use badger skin take cover am. Naso dem go con hang di poles wey dem take dey carry di table.
  9. “Next, dem must cover di lampstand wit blue cloth, along wit e lampstand for di light, lamps, lamp-quentcher, trays, and all di containers for ororo.
  10. Naso dem go use badger skins take cover am wit all di tools, con put am on di wood for carrying am.
  11. Dem go use blue cloth take cover di golden altar, con cover am wit badger skins; and dem go fix e poles.
  12. Naso dem go carry all di properties wey dem dey use for di service of di worship-place, con wrap dem wit blue cloth, dem go wrap dem wit badger skin, con put am on di wood for carrying am.
  13. “Dem go komot di ashes from di bronze altar, con spread purple cloth take cover am.
  14. Dem go put all di tools wey dem use for di service; di incense-container, fork, shovel, basins plus all di tools for di altar. Dem go use badger skin take cover dem, and dem go fix di poles.
  15. “Afta Aaron and hin sons don cover di worship-place, plus all di holy tins—and wen di camp dey ready to move, na only dat time di Kohathites go come carry di worship-place. But dem must no touch di holy tins or dem go die. Di Kohathites nahin go carry dis tins as dia service for di worship-place.
  16. “Eleazar wey be son of Aaron, di priest nahin go dey in charge of di ororo for di light, di incense wey dey scent, di seed offering wey dem dey give everi day, plus di anointing ororo. Nahin go dey in charge of di whole worship-place plus everitin wey dey for inside am, even di holy materials plus oda tins.”
  17. Baba-God con tell Moses and Aaron sey,
  18. “Make sure sey di families of Kohath no cut komot from di Levites.
  19. So dat dem go live and dem no go die wen dem come near di most holy tins, do dis for dem: Aaron and hin sons go enta di worship-place, con give everi man dia work and wetin dem go carry.
  20. But di Kohathite most no enta to look di holy tins wen dem dey cover dem, or dem go kpeme.”

Di Work Of Di Sons Of Gershon

21. Naso Baba-God tok to Moses and Aaron, sey,

22. “Count all di Gershonites by dia families and by dia papa house.

23. Count all di men from thirty to fifty years old, wey fit serve for di work inside di worship-place.

24. “Na dis be di work of di families of di Gershonites; na to serve and carry dia load.

25. Na dem go carry di curtains of di worship-place, di tent of di worship-place, di cover, and di cover of di badger skin wey dey on am, di curtain of di doormot of di worship-place,

26. di curtain of di walls of di yard wey surround di worship-place and di altar, di curtain wey dey for di doormot, di ropes, plus all di tools wey dem dey use for di service of di tent. Di Gershonites nahin dey in charge of all dis tins.

27. Na Aaron and hin sons go control all di services of di sons of Gershon—whether na to carry load or na to work. Na una go tell dem all dia work and wetin dem go carry.

28. Na dis be di service of families of di sons of Gershon for di worship-place. Ithamar wey be di son of Aaron di priest nahin go control all dia works.

Di Work Of Di Sons Of Merari

29. Count di sons of Merari by dia families and by dia papa house.

30. Count all di men from thirty to fifty years old, wey fit serve for di work for di worship-place.

31. Dia work for di worship-place na to carry loads. Na dem go carry di frames of di worship-place, di crossbar, di pillars, di solid-bottoms,

32. Even di pillars wey dey around di yard, wit dia solid-bottom, pegs, ropes, plus all di oda tools and everitin wey dem dey use wit dem. Use di names of di tins take put di men in charge of di different loads.

33. Na dis be di service of di families of di sons of Merarite as dem dey work for di worship-place, and as Ithamar di son of Aaron di priest, dey control dem.”

Dem Count Di Levites

34. Moses plus Aaron and di chiefs of di community con count di Kohathites, by dia families and dia papa house.

35. All di men from thirty to fifty year, wey fit serve for di work for di worship-place.

36. Na 2,270 wen dem count dem based-on dia families and dia papa house.

37. Na dis be di total of all di pipo wey dem count from di families of Kohath, wey fit serve for inside di worship-place. Moses and Aaron count dem based-on wetin Baba-God tell dem tru Moses.

38. Dem count di sons of Gershon by dia families and dia papa house,

39. All di men from thirty to fifty years, wey fit serve for di work for di worship-place,

40. Na 2,630 wen dem count dem based-on dia families and dia papa house.

41. Na dis be di total of those pipo wey belong to di sons of Gershon, wey fit serve for di worship-place. Moses and Aaron count dem based-on wetin Baba-God tell dem.

42. Dem count di families of di sons of Merari by dia families and pipo.

43. All di men from thirty to fifty years, wey fit serve for di work for di worship-place,

44. dem be 3,200 wen dem count dem based-on dia families.

45. Na dis be di total of di pipo wey dem count from di families of di sons di Merari. Moses plus Aaron count dem based-on how Baba-God yarn dem tru Moses.

46. So Moses and Aaron plus di leaders of Israel, count all di Levites by dia families and by dia papa house;

47. All di men from thirty to fifty years wey fit serve and do dia work for di worship-place, and wey fit carry di worship-place,

48. Dem be 8,580 wen dem count dem.

49. As Baba-God tell Moses, dem give everi one of dem dia work, and tell dem wetin dem go dey carry. Naso dem count dem as Baba-God tell Moses.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website