Numbers

Numbers Chapter 9

Abeg click here to share dis post

Di Second Passover

  1. Baba-God follow Moses tok for inside di desert of Sinai for di first month of di second year afta dem komot from Egypt. He tok sey,
  2. “Make all di pikins of Israel celebrate di Passover for di right time.
  3. Celebrate am for di right time, for evening, on di fourteenth day of dis month, based-on all di rules and ceremonies.”
  4. So Moses tell all di pikins of Israel sey make dem celebrate di Passover.
  5. Dem keep di Passover for di Desert of Sinai, for evening of di fourteenth day of di first month.  Di pikins of Israel do everitin just as Baba-God bin yarn Moses.
  6. But some of dem no fit celebrate di Passover on dat day, becos dem no clean, becos dem don touch deadbody. So dem come meet Moses and Aaron dat same day,
  7. And dem tell Moses sey, “Wey no clean becos we touch deadbody, but why we no go fit carry awa offering go meet Baba-God wit di oda pipo of Israel for di right time?”
  8. Moses con ansa dem sey, “Make una wait first, until I go ask Baba-God about una mata.”
  9. Naso Baba-God tell Moses sey,
  10. “Tell di pikins of Israel sey, ‘Wen una or una pikin no clean becos he touch deadbody, or una travel go far-far, dem fit still celebrate di Passover of Baba-God.
  11. Make dem celebrate am on di fourteenth day of di second month for evening. Make dem chop di lamb, togeda wit bread wey dem no use yeast make, plus bitter herbs.
  12. Dem must no remain anytin until morning or break any of e bones. Wen dem celebrate di Passover, dem must follow di rules.
  13. But for man wey clean and wey no travel, and he no gree celebrate di Passover, dem must cut dat kain pesin komot from hin pipo. Dat man go pay for hin sin, becos he no carry offering come meet Baba-God for di right time.
  14. “Foreigner wey dey stay among una, wey wan celebrate di Passover, must do am based-on di laws and traditions. Una must use di same laws for both foreigner and pesin wey dem born for di land.

Di Cloud Plus Di Faya

15. On di day wey dem set up di worship-place, di cloud cover am. But from evening reach morning, di cloud wey dey on top of di worship-place con be like pillar of faya.

16. E con kontinu to dey like dat; di cloud cover am for day, and e con be like faya for night.

17. Any time wey di cloud raise go up from di worship-place, all di pikin of Israel go move; any time wey di cloud settle, all di pikin of Israel go settle down.

18. All di pipo of Israel dey move any time wey Baba-God tell dem to move, and dem settle down togeda any time wey Baba-God tell dem. But dem go rest for di camp as long as di cloud dey on top of di worship-place.

19. If di cloud dey on top of di worship-place for long time, naso di pipo of Israel go do wetin Baba-God tok, and dem no go move.

20. Sometimes, di cloud go stay on top of di worship-place for only some days, so di pipo go stay only for some days, just as Baba-God tell dem. Den dem go move wen Baba-God tell dem to move.

21. Some times, di cloud go stay there only from evening to morning, and wen e raise go up for morning, dem go move. Whether na for day or night wen di cloud raise go up—dem go move.

22. Whether di cloud stay on top of di worship-place for two days, one month, or one year, di pipo of Israel go stay for di camp and dem no go move. But as di cloud just move, dem go komot from dia camp, con carry-go.

23. Dem gada togeda any time wey Baba-God tell dem, and dem move any time Baba-God tell dem. Dem do wetin Baba-God tell dem, based-on wetin he tell dem tru Moses

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website