1st Samuel

1st Samuel Chapter 31

Abeg click here to share dis post

    As Saul Take Kill Hinsef

  1. Now, di Philistines fight against di pipo of Israel; and di pipo of Israel con dey run from dem, and dem kill plenty of dem for di Mountain of Gilboa.
  2. Naso di Philistine follow Saul more-more wit hin pikin, and dem kill hin sons—Jonathan, Abinabad plus Malki-Shua.
  3. Di fight con serious more-more around Saul, and wen dem shoot am wit arrow, he con wound seriously.
  4. So Saul tell di pesin wey dey keep hin weapon sey, “Carry your sword make you kill me, or dis pipo wey no circumcise go come kill me, con abuse me.” But di pesin wey dey keep hi weapon con dey fear, and he no gree do am; So Saul carry hin own sword, con fall on top of am.
  5. Wen di pesin wey dey keep hin weapon see sey Saul don kpeme, hinsef fall on hin own sword, con die wit Saul.
  6. So Saul wit hin three sons plus di pesin wey dey keep hin weapon, and all di men die togeda dat same day.
  7. Wen di pipo of Israel wey dey around bottom-of-di-mountain, and those wey dey for di oda side of Jordan, con see sey Israel army don run and sey Saul wit hin three sons don die, dem leave dia towns, con run komot. And di Philistines con take over di land.
  8. Di next day, wen di Philistines come check all di deadbody, dem see Saul plus hin three sons wey don die for Mountain Gilboa.
  9. Dem cut hin head komot, con komot hin weapon and fighting-cloth from hin body, and dem send messengers tru-out di land of di Philistines to tok di news for inside di shrine of dia idols and among dia pipo.
  10. Dem put Saul weapons for inside di shrine of Ashtoreths, and dem tie hin body for di wall of Bethshan.
  11. Wen di pipo of Jabesh Gilead hear wetin di Philistine do to Saul,
  12. All dia strong men con travel tru di night go Bethshan. Dem carry Saul body and hin sons body come down from di wall of Bethshan and dem go Jabesh.
  13. Den dem take dia bones, con burry dem under di tamarisk tree for Jabesh, and dem fast for seven days.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website