1st Samuel

1st Samuel Chapter 5

Abeg click here to share dis post

Di Ark For Ashdod And Ekron

  1. Afta di Philistines carry Baba-God Ark, dem carry am from Ebenezer go Asdod.
  2. Naso dem carry di ark enta Dagon shrine, con put am near Dagon.
  3. Wen di pipo of Ashdod wake up for early mor-mor di next day, dem see sey Dagon don fall face ground for front of Baba-God Ark! Dem carry Dagon, con put am back for hin place.
  4. But di next morning, wen dem wake up, dem see sey Dagon don fall dey face ground for front of Baba-God Ark! Dagon head plus di two palm of hin hand don break komot, and dem dey for di doormot. Only hin body nahin remain.
  5. Nahin make till today, even di priest of Dagon or any pesin wey enta di shrine of Dagon for Ashdod no dey march di doormot.
  6. Baba-God hand con punish di pipo of Ashdod well-well, plus di areas around, con punish dem wit boils.
  7. Wen di men of Adshdod see wetin dey happun, dem con tok sey, “Di Ark of Baba-God of Israel must no stay here wit us, becos hin hand dey against us and against Dagon awa god.”
  8. So dem call all di rulers of di Philistine togeda, con ask dem sey, “Wetin we go do wit di ark of Baba-God of Israel?” So dem ansa, “Make dem carry Baba-God ark go Gath” So dem move di Ark of Baba-God of Israel.
  9. But afta dem don move am, naso Baba-God hand con dey against dat city, sote di city con dey face serious gbege. He kill di pipo of dat city, both small and big, naso boils con dey for dia body.
  10. E con happun sey as dem send Baba-God Ark go Ekron. Naso di pipo of Ekron con dey shout sey, “Dem don carry di Ark of Baba-God of Israel come meet us to kill us and awa pipo.”
  11. So dem call all di rulers of di Philistine togeda, con tok sey, “Make una carry di Ark of Baba-God of Israel komot; make e go back to e own place, or e go kill us wit awa pipo.” Becos death don burku for di city; Baba-God hand con heavy well-well against di city.
  12. Boil catch even those pipo wey no die, and di cry of di city—reach heaven.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website