Judges

Judges Chapter 16

Abeg click here to share dis post
  1. One day Samson go Gaza where he see one ashawo. So he follow di ashawo go do full-time.
  2. Naso dem tell di pipo of Gaza sey, “Samson dey here!” So dem surround di place, con dey wait for am tru-out di night for front of di gate of di city. Dem no gree move tru-out di night, dem tok sey, “We go kill am for morning.”
  3. But Samson sleep for there reach midnight. He wake up for midnight, con stand up. He hold di doors of di gate of di city, togeda wit di two pillars, con carry dem, di iron plus everitin. He carry dem put for hin shoulder, con carry dem go on top of di hill before Hebron.
  4. Lata-lata, Samson con love one woman wey dey stay for bottom-of-di-mountain wey dem dey call Sorek. Her name na Delilah.
  5. Di leaders of di Philistines go meet her con tell her sey, “See if you go fit whyne am to show you di secret of hin ogbonge pawa, and how we go fit over-pawa am so dat we go fit tie am, con dey control am. Everi single one of us go give you hundred silver coins.”
  6. So Delilah tell Samson sey, “Tell me di secret of your ogbonge pawa, and how pesin go fit tie you, con over-pawa you.”
  7. So Samson ansa her sey, “If any pesin tie me wit seven new wires wey dem neva dry—for bow and arrow, I no go get pawa like any normal pesin.”
  8. Naso di leaders of di Philistine bring seven fresh wires wey dem neva dry—for bow and arrow, she con use dem take tie Samson.
  9. Men con hide for inside di room dey wait. So she call Samson, “Samson, di Philistine wan attack you!” But he cut di bow and arrow wire, like rope wey dey burn for faya. So dem no still know di secret of hin pawa.
  10. Naso Delilah tell Samson sey, “You dey use me play; you dey lie to me. Come now, tell me how pesin go fit take tie you.”
  11. So he tok sey, “If any pesin tie me well-well wit new ropes wey dem neva use before, I go weak like any oda man.”
  12. So Delilah carry new ropes take tie am. Men hide for inside di room dey wait. So she con call Samson, “Samson, di Philistines wan attack you!” But Samson cut di ropes from hin body as if na thread.
  13. Naso Delilah tell Samson sey, “You don dey make be look like mumu since, con lie to me. Tell me how pesin go fit take tie you.” So he ansa her, “If you weave di seven dada for my head togeda, tie am join di thread of weaving-machine, con tie am wit pin; naso I go con soft like any oda man.”
  14. So as he dey sleep, Delilah carry di seven dada for hin head, con weave dem togeda join di thread of di weaving-machine. Den she use pin take tight am. Naso she con dey shout, “Samson, di Philistines wan attack you!” He wake up from hin sleep con komot hin hair from di weaving-machine.
  15. So Delilah tell Samson sey, “How you go tok sey you love me wen your heart no dey wit me? Na dis be di third time wey you don make be look like mumu, and you no gree tell me di secret of your pawa.”
  16. Naso she disturb am everi day wit her complain—sote Samson con taya for di mata die.
  17. So he tell her everitin. “No razor don ever touch my head, becos I be Nazarite wey dem separate for Baba-God from my mama belle. My pawa go komot from me if dem shave my head, and I no go get pawa like any oda man.
  18. Wen Delilah see sey he don tell her everitin, she send message to di leaders of di Philistines, “Make una come back one more time becos he don tell me everitin.” So di leaders of di Philistines come back wit moni for dia hands.
  19. Naso she make Samson sleep for her lap, she call one man to cut di seven dada for hin head, naso she start to dey do Samson anyhow. And hin pawa komot from hin body.
  20. So Delilah shout, “Samson, di Philistines dey attack you!” He wake up from hin sleep con reason sey, “I go go out like before, con shake to free mysef.” But he no know sey Baba-God don komot from hin body.
  21. Di Philistnes gbab am, dem pluck hin eyes komot, con carry am go Gaza. Dem tie am wit bronze chain and dem force am to grind seed for prison.
  22. But di hair for hin head start to dey grow again afta dem cut am.

As Samson Take Die

23. Now di leaders of di Philistine con gada to give sacrifice to Dagon dia god and to celebrate sey, “Awa gods don put Samson awa enemy for awa hands.”

24. Wen di pipo see am, dem praise dia god sey, “Awa gods don put awa enemy for awa hands, di pesin wey dey scata awa kontri, con dey kill plenty of awa pipo.”

25. As dem don high well-well, dem con tok sey, “Carry Samson come make he con perform for us.” So dem call Samson komot from inside prison, and he perform for dem. So dem put am for di middle of two pillars.

26. Naso Samson tell di servant wey dey hold hin hand sey, “Carry me put for where I fit hold di pillars wey dey hold di house, so dat I fit rest by body on dem.”

27. Dat time, men plus women burku for inside di house; all di leaders of di Philistines dey for there, and about three thousand men plus women dey for di roof dey watch as Samson dey perform.

28. Naso Samson pray to Baba-God, “Chai Almighty God, abeg remember me. Oh Baba-God abeg give me pawa one more time, and make I use one blow take revenge on di Philistines becos of my two eyes.”

29. Naso Samson move go di two middle pillars wey dey support di house. He use hin right hand take hold di pillar, and he left hand hold anoda pillar.

30. Samson con tok sey, “Make I die wit di Philistines!” Naso he use all hin pawa take push, and di house fall yakata on all di leaders plus all di pipo wey dey inside am. So he kill more pipo wen he die—pass wen he bin dey alive.

31. Naso hin brodas and hin papa full family go there to carry am come back. Dem bury am between Zorah and Eshtaol for inside di burial ground wey belong to Manoah hin papa. He lead Israel for twenty years.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website