2nd Samuel

2nd Samuel Chapter 5

Abeg click here to share dis post

David Turn To Di King of Israel

  1. All di tribes of Israel come meet David for Hebron, con tell am sey, “We be your own flesh and blood.
  2. Before-before, wen Saul still be king of Israel, na you be di pesin wey dey really lead di armies of Israel. And Baba-God tell you sey, ‘You go lead my pipo Israel, and you go be dia ruler.’ ”
  3. Wen all di senior-men of Israel come meet David for Hebron, David make agreement wit dem for Baba-God front, and dem anoint am as king of Israel.
  4. David na thirty years old wen he be king, and he be king for forty years.
  5. For Hebron—he rule Judah for seven years and six months, and for Jerusalem—he rule Israel for thirty-three years for di whole of Israel plus Judah.

David Over-pawa Jerusalem

6. Di king and hin men march go Jerusalem to attack di Jebusites wey dey stay for there. Di jebusites con tell David sey, “You no go reach here, even di pipo wey blind and di pipo wey no fit waka go pursue you komot.” Dem reason sey, “David no fit reach here.”

7. But David take-over di strong-house of Zion, nahin con be di City of David.

8. On dat day, David tok sey, “Any pesin wey pass tru di big gota con attack di Jebusites—di pipo wey no fit waka and blind pipo of Jebus wey David hate, I go make dat pesin wey attack dem be my chief and commander.” Nahin make pipo start to dey tok sey, “Di blind pipo and pipo wey no fit waka, no go enta di house.”

9. Naso David start to dey stay for di strong-house for there. And he call di city, ‘Di City of David. He build all around from di Millo go inside.

10. David con dey get pawa more-more, becos Baba-God Almighty dey wit am.

11. Now Hiram wey be di king of Tyre send messengers go meet David and dem carry cedar woods, and carpenters, wit men wey dey build wit stones, and dem build palace for David.

12. So David con know sey Baba-God don make am stand as king of Israel, and sey Baba-God don give hin kingdom levels becos of hin pipo Israel.

13. Afta he komot from Hebron, David get more side-chicks and wives from Jerusalem, and dem born more pikin for am.

14. Na dis be di names of di pikin wey dem born for am for there: Shammua, Shobab, Nathan, plus Solomon.

15. And Ibhar, Elishua, Nepheg, Japhia,

16. Elishama, Eliada, plus Eliphelet.

David Win Di Philistines

17. Wen di Philistines hear sey dem don anoint David as king of Israel, all of dem get up go fyne David. But David hear about am, con go hide for hin strong-place.

18. Di Philistines come, con spread demsef for bottom-of-di-mountain wey dem dey call Rephaim.

19. So David ask Baba-God, “Make I go attack di Philistines? You go surely put di Philistines for my hand?” Naso Baba-God ansa am sey, “Dey go, and I go surely put di Philistines for your hand.”

20. So David go Baal Perazim, and he kill di Philistines for there. He tok sey, “As water take dey break out, naso Baba-God don break out against my enemies for my front.” So dem call dat place ‘Baal Perazim’.

21. Di Philistines run leave dia idols for there, and David plus hin men burn dem.

22. Naso di Philistines come again, con spread demsef for bottom-of-di-mountain wey dem dey call Rephaim;

23. So David ask Baba-God, and Baba-God ansa am, “Make you no go straight up, but go round dia back, con attack dem near di mulberry trees.

24. As you just hear di sound of marching on top of di mulberry trees, move sharply, becos dat one mean sey Baba-God don carry-go for your front to kill di Philistines army.”

25. So David do wetin Baba-God tell am to do, and he kill di Philistines from Gibeon reach Gezer.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website