1st Chronicles

1st Chronicles Chapter 13

Abeg click here to share dis post

David Carry Di Ark Come Back

  1. David reason wit di commanders of thousand sojas, plus di commanders of hundred sojas, plus all di leaders.
  2. He con tell all di pipo of Israel wey gada sey, “If e dey right for una, and if na di will of Baba-God awa Oga, make we send message go far-far to di rest of awa brodas tru-out di whole areas of Israel, and even to di priests plus di Levites wey dey wit dem for dia own cities and farmlands—make dem come join us.
  3. And make we carry Baba-God Ark come back to meet us, becos we bin fashi am wen Saul be king.”
  4. Di whole pipo agree to do dis tin, becos all di pipo feel sey na di right tin to do.
  5. So David gada all di pipo of Israel, from Shihor River for Egypt go reach di front of Lebo Hamath (for di north)—to bring back Baba-God ark from Kiriath-Jearim.
  6. So David plus all di pipo of Israel wey dey wit am go Baalah of Judah (Kiriath-Jearim) to bring back di Ark of Baba-God di Oga, wey dey sidon between di cherubim—di Ark wey dem dey call by hin name.
  7. Naso dem carry Baba-God Ark from Abinadab house wit new truck [wey dem tie join malu], con carry am from Abinadab house. Uzzah plus Ahio nahin dey guide di truck.
  8. David plus all di pipo of Israel dey celebrate wit all dia full pawa for Baba-God, wit songs plus (music instruments) harps, lyres, sheke-sheke, cymbals plus trumpets.
  9.  Wen dem reach di harvest ground of Chidon, di malu wey dey drag di truck almost fall, and Uzzah use hin hand take hold di Ark.
  10. Baba-God con vex like faya for Uzzah, and he nack am for ground, becos he put hin hand on di Ark. So he die for there for Baba-God front.
  11. Naso David no con happy, becos Baba-God use vex kill Uzzah, and dem dey call di place Perez Uzzah till today.
  12. So David con dey fear Baba-God dat day, and he ask, “How I go take carry Baba-God Ark come house to meet me?”
  13. So he no carry di Ark follow-body wit am go di City of David. Instead, he carry am go Obed-Edom house—wey be Gittite.
  14. Baba-God Ark con dey wit di family of Obed-Edom for hin house for three months, and Baba-God bless hin family plus everitin wey he get.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website