1st Chronicles

1st Chronicles Chapter 14

Abeg click here to share dis post

David Prosper

  1. Naso Hiram wey be di king of Tyre send messengers go meet David, along wit cedar woods, men wey sabi work wit stones, plus carpenters to build palace for am.
  2. Naso David con know sey Baba-God don stand am as king of Israel, and hin kingdom don get levels well-well becos of hin pipo Israel.
  3. David marry more wives for Jerusalem, he born more pikin.
  4. Na dis be di names of di pikins wey dem born for am for Jerusalem; Shammua, Shobab, Nathan, Solomon,
  5. Ibhar, Elishua, Elpelet,
  6. Nohag, Nepheg, Japhia,
  7. Elishama, Beeliada plus Eliphelet.

David Win Di Philistines

8. Wen di Philistines hear sey dem don anoint David as king of Israel, dem go up wit full force to fyne David, but David hear about am, con go out to face dem.

9. So di Philistines come spread demsef for bottom-of-di-mountain wey dem dey call Rephaim,

10. So David ask Baba-God, “Make I go attack di Philistines? You go carry dem put dem for my hand?” Naso Baba-God ansa am, “Dey go, I go carry dem put for your hand.”

11. So David and hin men go Baal Perazim, and David kill dem for there. He con tok sey, “As water take dey break out, naso Baba-God don take break out against my enemies wit my hand.” So dem call di place Baal-Perazim.

12. Di Philistines run leave dia gods for there, and David tell hin men to burn am wit faya.

13. Di Philistines con attack for bottom-of-di-mountain again.

14. So David ask Baba-God again, and Baba-God ansa am sey, “Make you no go straight to dem, but turn round dem, and make una attack dem for front of di mulberry trees.

15. As una just hear di sound of marching for up of di mulberry trees, make una come out to fight, becos dat one mean sey Baba-God don go out for front, to fight for una—to kill di Philistine army.”

16. So David do wetin Baba-God tell am, and naso dem kill di Philistine army, from Gibeon reach Gezer.

17. So David name con dey spread for everi land, and Baba-God con make all di nations dey fear am.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website