1st Chronicles

1st Chronicles Chapter 15

Abeg click here to share dis post

David Carry Di Ark Go Jerusalem

  1. Afta David build for hinsef for inside di City of David, he arrange place for Baba-God Ark, con make tent for am.
  2. Naso David tok sey, “Na only di Levites must carry Baba-God ark, na dem Baba-God choose to carry di ark and to serve for Baba-God front forever.”
  3. David gada all di pipo of Israel togeda for Jerusalem, to carry Baba-God ark go di place wey dem arrange for am.
  4. He call di pikin-pikin-pikin of Aaron plus di Levites.
  5. From di pikin-pikin-pikin of Kohath, Uriel wey be di leader, plus 120 hin family-pipo;
  6. From di pikin-pikin-pikin of Merari, Asaiah di leader, plus 220 hin family-pipo,
  7. From di pikin-pikin-pikin of Gershon, Joel wey be di leader, plus 130 hin family-pipo,
  8. From di pikin-pikin-pikin of  Elizaphan, Shemaiah wey be di leader, plus 200 of hin family-pipo;
  9. From di pikin-pikin-pikin of Hebron, Eliel wey be di leader, plus 80 of hin family-pipo.
  10. From di pikin-pikin-pikin of Uzziel, Amminadab wey be di leader, plus 122 of hin family-pipo.
  11. Naso David call Zadok plus Abiathar wey be di priests, and Uriel, Asaiah, Joel, Shemaniah, Eliel plus Amminadab wey be Levites.
  12. He con tell dem sey, “Na una be di head of di Levite families; you and your fellow Levite go make unasef holy, and una go carry Baba-God of Israel ark—to di place wey I don arrange for am.
  13. Na becos una wey be di Levites—no first carry am come dat time, nahin make  Baba-God nack us wit vex. We no bin ask Baba-God about how to do am di wey way e suppose be.”
  14. So di priests plus di Levites make demsef holy so dat dem go fit carry di Ark—wey belong to Baba-God of Israel.
  15. Naso di Levites carry Baba-God Ark wit di poles for dia shoulder, as Moses bin tell dem to do based-on Baba-God word.
  16. David tell di leaders of di Levite to choose dia brodas as singers to sing songs of happiness, and make dem play music instrument like; lyre, harps plus cymbals.
  17. So di Levites choose Hemna wey be di son of Joel, wit hin fellow Levites—Asaph wey be di son of Berechiah; and Ethan wey be di son of Kushaiah from di sons of Merari wey be dia family-pipo sef.
  18. Along wit dem, na dia brodas wey dey next for rank: Zechariah, BenJaaziel, Shemiramoth, Jehiel, Unni, Eliab, Benaiah, Maaseiah, Mattithaiah, Eliphelehu, Mikneiah, Obed-Edom plus Jeiel, di guards.
  19. Na di musicians Heman, Asaph plus Ethan go sound di bronze cymbal;
  20. Zechariah, Aziel, Shemiramoth, Jehiel, Unni, Eliab, Maaseiah plus Benaiah nahin dem choose to play di strings based-on Alamoth*,
  21. And Mattithiah, Eliphelehu, Mikneiah, Obed-Edom, Jeiek plus Azazaiah nahin go play di harps based-on Sheminith*.
  22. Kenaniah wey be di head of di Levites nahin dey in charge of songs, nahin dey direct di song becos he sabi well-well.
  23. Berekiah plus Elkanah nahin dey guard di Ark;
  24. Shebaniah, Joshaphat, Nethanel, Amasai, Zechariah, Benaiah, plus Eliezer wey be priest—nahin dey blow di trumpets for front of Baba-God Ark. Obed-Edom plus Jehiah sef dey guard di Ark.
  25. So David plus di senior-men of Israel, and di captains of thousands go bring di ark of di agreement of Baba-God from Obed-Edon house—wit happiness.
  26. E happun sey wen Baba-God don epp di Levites wey dey carry di Ark of di agreement of Baba-God, dem sacrifice seven malu plus seven rams.
  27. Now David wear hin fine linen cloth, na di same tin di Levites wear—wey dey carry di Ark, wit di singers, plus Kenaniah wey be di music director. David still wear priest-cloth wey be linen.
  28. So all di pipo of Israel carry di Ark of Baba-God agreement wit shouting, wit di sound of ram horn plus trumpets, and di sound of cymbal, wit di sound of lyre plus harp [music instruments] wey dem dey play.
  29. As di ark of Baba-God agreement dey enta di City of David, Michal wey be Saul daughter dey look from window. And wen she see David dey dance and play, she no con like am for her heart.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website