1st Chronicles

1st Chronicles Chapter 17

Abeg click here to share dis post

Wetin Baba-God Promise David

  1. Afta David settle down for hin palace, he con tell prophet Nathan sey, “See me, as I dey live for inside palace of cedars, but di Ark of di agreement of Baba-God dey for inside tent.”
  2. Naso Nathan ansa David, “Do anytin wey you get for mind becos Baba-God dey wit you.”
  3. Dat night, message from Baba-God come meet Nathan.
  4. “Go tell my servant David sey, dis na wetin Baba-God yarn: ‘No be you go build house for me to stay.
  5. I neva stay inside house since di day wey I carry Israel komot from Egypt reach today. I don move from one tent to anoda, from one place to anoda.
  6. Any where wey I move go wit all di pipo of Israel, abi I ever tell any of di judges of Israel wey I tell to lead my pipo—sey, “Why una neva build house wit cedar woods for me?” ’
  7. “So now go tell my servant David sey, ‘Dis na wetin Baba-God Almighty dey tok: I carry you from sheep-house and from following sheep, to be di leader of my pipo Israel.
  8. I don dey wit you—any where you don go, and I don cut all your enemies komot from your front. Now I don make your name be like di name of di great men for earth.
  9. I go make place for my pipo Israel, and I go plant dem so dat dem go fit get place wey be dia own, and notin go disturb dem again. Evil pipo no go oppress dem again as dem bin do before-before,
  10. and since di time wey I choose judges to lead my pipo Israel. Evensef, I go press all your enemies. To add-join, I dey tell you sey Baba-God go build house for you [kingdom wey your pikin-pikin-pikin go rule].
  11. E go happun sey, wen your days don end and you wan go meet your ancestors, I go raise up your pikin wey go take your place, one of your own sons, and I go make hin kingdom stand gidigbam.
  12. Na him go build house for me, and I go make hin king-chair stand gidigbam forever.
  13. I go be hin papa and he go be my pikin. I no go ever komot my love from am, as I bin carry am komot from di king wey bin dey before you.
  14. I go settle am for my house and for my kingdom forever, and hin king-chair go stand gidigbam forever.’ ”
  15. So Nathan tell David all di words of Baba-God message.

Di Prayer of David

16. So king David go inside con sidon for Baba-God front, and he tok sey, “Who I be oh Baba-God my Oga, and which levels my family get—wey you con carry me go far like dis?

17. And as if dis na small tin for your eyes, chai Baba-God, you don still tok about di future of your servant house. You don look me as if I be bigman wey get levels, oh Baba-God my Oga.

18. “Wetin David fit tell you wey pass dis one—for di levels wey you give me, your servant? Becos you sabi your servant.

19. Oh Baba-God, becos of your servant, and based-on your will, you don do all dis ogbonge tins, con show me all dis ogbonge tins.

20. “No pesin fit be like you oh Baba-God, and e no get any oda God apart from you, as we don hear wit awa own ears.

21. And who fit be like your pipo Israel—di only nation for di earth wey dia God go out to save di pipo for hinsef, and to make name for yoursef, and to do great and ogbonge wonders by pursuing di nations komot from front of your pipo—wey you save from Egypt?

22. You make your pipo Israel your own forever, and you oh Baba-God, you don turn to dia God.

23. “And now Baba-God, make di promise wey you don make about your servant and hin family stand gidigbam forever. Do wetin you don promise.

24. Make e stand gidigbam, and so dat your name go get levels forever. Naso men go con tok sey, ‘Baba-God Almighty, di God wey dey lead Israel—na di God of Israel!’ And make di house of your servant David stand gidibam for your front.

25. “You, my God, don tell me your servant sey you go build house for [kingdom wey my pikin-pikin-pikin go rule] me. So me your servant don get-mind to pray to you.

26. Oh my Oga, na you be Baba-God! You don promise your servant dis good tins.

27. Now make body sweet you to bless your servant family, so dat e go dey forever for your front, oh Baba-God, you dey give blessings—and your blessings go dey forever.”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website