1st Kings

1st Kings Chapter 15

Abeg click here to share dis post

Abijah Wey Be Di King Of Judah

  1. For di eighteenth year wen Jeroboam wey be di son of Nebat be king, Abijah con be king for Judah.
  2. And he be king for Jerusalem for three years. Hin mama name na Maacah and she be di daughter of Abishalom.
  3. He do all di bad-bad-tins wey hin papa bin do before am; hin heart no fully dey wit Baba-God hin Oga, as di heart of David hin ancestor bin dey.
  4. But becos of David, Baba-God hin Oga give am lamp for Jerusalem by raising up hin son wey go take over hin king-chair, and by making Jerusalem strong;
  5. Becos David do di correct tins for Baba-God eyes, and he no turn komot from anytin wey Baba-God tell am to do all di days of hin life—except for di case of Uriah di Hittite.
  6. Na so-so wars Rehoboam and Jeroboam dey fight all di days of hin life.
  7. As for di oda tins wey happun wen Abijah be king, plus di tins wey he do—dem write dem for di books of history of di kings of Judah. And war dey between Abijah and Jeroboam.
  8. So Abijah rest wit hin ancestors, and dem bury am for di City of David. Naso Asa hin son take hin place as king.

King Asa of Judah

9. For di twentieth year of Jeroboam as king of Israel, Asa con be di king of Judah,

10. And he be king for Jerusalem for forty-one years. Hin mama name na Maacah wey be di daughter of Abishalom.

11. Asa do di right tins for Baba-God eyes—just as hin papa David sef bin do.

12. He pursue di borstitutes and men wey dey sleep wit men komot from di land, con komot all di idols wey hin papa make.

13. He even komot hin mama Maacah, from her position as queen moda, becos she make image to worship Asherah. He cut her idol come down, con burn am for di stream of Kidron.

14. Even though he no komot di shrines, di whole of Asa heart true-true dey for Baba-God all hin life.

15. He carry silver plus gold enta Baba-God house, plus oda tins wey him and hin papa bin give Baba-God.

16. War con dey between Asa and Baasha wey be di king of Israel tru-out wen dem be king.

17. King Baasha of Israel attack Judah, con take-over di town of Ramah. Naso he start to dey make di town strong—so dat he go put sojas for there to stop pipo—make dem no fit enta or komot from Judah.

18. Asa con carry all di silver and gold wey remain inside di store of Baba-God house, and wey dey inside hin own palace. He send am wit some servants go meet Ben-Hadad wey be di son of Tabrimmon, son of Hezion, di king of Syria, wey dey rule for Damascus, along wit dis message:

19. “Make agreement dey between me and you as he bin dey between your papa and my papa. See I dey send you gifts of silver plus gold. Now break your agreement wit Baasha di king of Israel so dat he go komot from my side.”

20. Ben-Hadad agree wit King Asa, con send di commanders of hin army against di cities of Israel. He take-over Ijon, Dan, Abel Beth Maacah, and di whole of Cinneroth, wit all di land of Naphtali.

21. Wen Baasha hear wetin happun, he stop to dey build Ramah, con komot go Tizrzah.

22. Naso king Asa put order for di whole Judah—con tok sey everi pesin must join to carry di stones plus big-wood wey Baasha bin use take build Ramah. Asa use dis stones and big-wood take build Geba for Benjamin, plus Mizpah.

23. As for all di oda tins wey happun wen Asa be king, all hin pawa, all di tins wey he do and di cities wey he build—dem write dem for di books of history of di kings of Judah. But wen he don old, one disease catch hin leg.

24. Naso Asa rest wit hin ancestors, and dem bury am for di city of David hin papa. And Jehoshaphat hin son take hin place as king.

Nadab Wey Be Di King of Israel

25. Nadab wey be di son of Jeroboam con be king for Israel for di second year wen Asa be king of Judah, and he be king for Israel for two years.

26. He do evil tins for Baba-God eyes, he follow di way of hin papa, he commit sin, plus di bad-bad-tins wey he make di pipo of Israel do.

27. Baasha wey be di son of Ahijah from di house of Issachar con plan against Nadab, and Baasha kill Nadab for Gibbethon, wey be one Philistine town—as Nadab and all Israel dey surround di city of Gibbethon.

28. Baasha kill Nadab for di third year wen Asa be king of Judah, con take-over hin king-chair.

29. Wen he climb di king-chair, he kill di whole of Jeroboam family. He no let any single one of dem survive, until he kill dem finish—based-on wetin Baba-God tok tru di hin servant, di prophet, Ahijah from Shiloh:

30. Becos of di bad-bad-tins wey Jeroboam do and wey he make Israel do, and becos he make Baba-God vex.”

31. As for di oda tins wey happun wen Nadab be king plus everitin wey he do—dem write dem for di books of history of di kings of Israel.

32. War dey between Nadab plus Baasha wey be di king of Israel tru-out wen both of dem be king.

Baasha As King Of Israel

33. For di third year as Asa be king of Judah, Baasha wey be di son of Ahijah con be king of di whole of Israel for Tirzah, and he be king for twenty-four years.

34. He do evil tin for Baba-God eyes, he follow di way of Jeroboam plus di bad-bad-tins wey he do, and wey he make Israel do.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website