1st Kings

1st Kings Chapter 16

Abeg click here to share dis post

Jehu Prophesy Against Baasha

  1. Naso Baba-God word come meet Jehu wey be di son of Hanani against Baasha:
  2. “I carry you up from dust, con turn you to leader of my pipo Israel, but you waka for di ways of Jeroboam, and you make my pipo Israel commit sin, and dem make me vex wit di bad-bad-tins wey dem do.
  3. See, I go soon cut Baasha komot from di land wit hin whole house, just like Jeroboam wey be di son of Nebat.
  4. Dogs go shop those wey belong to Baasha wey die for inside di city, and di birds wey dey fly for sky go chop those wey die for field.”
  5. As for di oda tins wey happun wen Baasha be king, all di tins wey he do plus hin pawa—dem write dem for di books of history of di kings of Israel.
  6. Baasha rest wit hin ancestors and dem bury am for Tirzah. And Elah hin son con be king afta am.
  7. But Baba-God word come tru di prophet Jehu wey be di son of Hanani—to Baasha and hin house, becos of all di bad-bad-tins wey he don do for Baba-God eyes, as he make am vex wit di tins wey he do, and be con be like di house of Jeroboam—and becos he kill am.

Elah Di King of Israel

8. For di twenty-sixth year wey Asa be king of Judah, Elah wey be di son of Baasha con be king of Israel, and he be king from Tirzah for two years.

9. Zimri wey be one of hin officials wey dey command half of hin horse-moto con plan against am. Elah dey for Tirzah around dat time, he dey jogodo for di house of Arza, di man wey dey in charge of di palace for Tirzah.

10. Zimri enta, naso he nack am, con kill am on di twenty-seventh year as Asa be king of Judah. Naso he con be king.

11. E con happun sey, as dem make am king, and he sidon for di king-chair, naso he kill all Baasha family. He no let any single man go free, whether na family-pipo or padi of Baasha.

12. So Zimri kill di whole family of Baasha, to confam wetin Baba-God yarn against Baasha tru di prophet Jehu—

13. Becos of all di sins wey Baasha and hin son Elah commit, and di sins wey dem make Israel commit, dem make Baba-God vex, di God of Israel, dem make am vex wit dia tufiakwa idols.

14. As for di oda tins wey happun as Elah be king, plus everitin wey he do—dem write dem for di books of history of di kings of Israel.

Zimri Di King of Israel

15. For di twenty-seventh year wey Asa be king of Judah, Zimri con be king from Tirza for seven days. Di army dey surround di city of Gibbethon wey belong to di Philistines.

16. Wen di pipo of Israel for inside di camp hear sey Zimri don plan against di king, con kill am, dat day dem make Omri wey be di commander of di army—king of Israel, for there for di camp.

17. Naso Omri plus all di pipo of Israel komot from Gibbethon, con go surround Tirza.

18. Wen Zimri see sey dem don round di city, he enta di strong-house of di palace, con put faya round di palace wey he dey. Naso he take kpeme,

19. becos of di bad-bad-tins wey he do. He do evil for Baba-God eyes, con waka for di ways of Jeroboam and inside hin bad-bad way, and di bad tins wey he make di pipo of Israel do.

20. As for di oda tins wey happun as Zimri be king, and as he take betray di king—dem write dem for di book of history of di kings of Israel.

Omri Di King Of Israel

21. Di pipo of Israel con separate into two groups; half of dem support Tibni wey be di son of Ginath for king, and di oda half support Omri.

22. But Omni followers con strong pass Tibni followers—Tibni di son of Ginath. So Tibni kpeme and Omri con be di king.

23. For di thirty-first year as Asa be king for Judah, Omri con be king for Israel, and he be king for twelve years. He rule di first six years for Tirzah,

24. he buy di hill of Samaria from Shemer, for 68 kg of silver, and he build city on top of di hill, he call am Samaria, afta Shemer, di name of di former owner of di hill.

25. But Omri do evil tin for Baba-God eyes, con do bad-bad-tins pass those wey dey before am.

26. He waka for all di ways of Jeroboam wey be di son of Nebat, and inside hin sin wey he make Israel commit, sote dem make Baba-God vex, dem make di God of Israel vex wit dia idols.

27. As for di oda tins wey Omri do wen he be king, plus hin pawa—dem write dem inside di book of history of di kings of Israel.

28. Omri rest wit hin ancestors, and dem bury am for Samaria. And Ahab hin son take hin place as king.

Ahab Di King Of Israel

29. On di thirty-eighth year of Asa as king of Judah, Ahab wey be di son of Omri con be king for Israel, and he rule Israel from Samaria for twenty-two years.

30. Ahab wey be Omri pikin do bad-bad-tins for Baba-God eyes pass those wey dey before am.

31. E con happun sey, no be sey he only just look am like small tin to do di bad-bad-tins wey Jeroboam do [Jeroboam na di son of Nebat], he still marry Jezebel wey be di daughter of Ethbaal wey be di king of di Sidonians, naso he start to dey worship Baal, and he serve am.

32. He build altar for Baal for di shrine of Baal wey he build for Samaria.

33. Ahab still make image of di goddess of Asherah, and he do more-more tins to make Baba-God vex—pass all di kings of Israel wey dey before am.

34. For Ahab time, Hiel of Bethel build Jericho again. As Baba-God bin tell Joshua wey be di son of Nun—Heil lose hin senior son Abiram wen he lay di foundation of Jericho, and he lose hin smallest son Segub wen he build di gates.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website