1st Kings

1st Kings Chapter 21

Abeg click here to share dis post

Naboth Grape-farm

  1. Lata, e get one mata wey sup about one grape-farm wey belong to Naboth di Jezreelite. Di grape-farm dey for Jezreel, near di palace of Ahab wey be di king of Samaria.
  2. So Ahab tell Naboth sey, “Give your grape-farmer, make I use am take make vegetable garden, since di place near di palace. I go give you beta grape-farm, or if you prefer, I go pay you di moni for di grape-farm.”
  3. But Naboth ansa am, “Baba-God forbid sey make I give you my ancestors property.”
  4. So king Ahab go house wit vex and he no happy, becos Naboth di Jezreelite don tell am sey, “I no go give you my ancestors property.” Naso Ahab lie down for hin bed, he turn face one side and he no gree chop.
  5. Hin wife Jezebel come inside, con ask am, “Why you dey feel sad? Why you no wan gree chop?”
  6. He ansa her, “Na becos I tell Naboth wey be di Jezeelite sey, ‘Sell your grape-farm for me, or if you prefer, I go give you anoda grap-farm.’ But he tell me sey, ‘I no go give you my grape-farm.’ ”
  7. Jezebel hin wife con tell am sey, “Naso you take dey behave like king of Israel? Get up make you chop! Dey happy. I go collect di grape-farm of Naboth di Jezreelite.”

Jezebel Plan

8. So she use Ahab name take write letters, con put hin seal on dem, con send dem go meet di senior-men and di princes wey dey stay for Naboth city wit am.

9. She write for inside di letters sey: “Make una declear day of fasting and make Naboth sidon for high table among di pipo.

10. But make two jaguda pipo sidon opposite am, and make dem tok sey, ‘You don curse both Baba-God plus di king!’ Den you go carry am go outside to stone am to death.”

11. So di senior-men plus di princes wey dey stay for Naboth city do wetin Jezebel tell dem to do inside di letters wey she write for dem.

12. Dem declear fasting con put Naboth for high table among di pipo.

13. Naso two jaguda pipo just show-face, con sidon opposite am, naso dem put mata for hin head for front of di pipo. Dem tok sey, “Naboth don curse both Baba-God and di king.” So dem carry am go outside di city, con stone am to death.

14. So dem send message to Jezebel: “Dem don stone Naboth and he don die.”

15. As Jezebel just here sey dem don stone Naboth, and sey he die, she tell Ahab sey, ‘Get up make you go claim di grape-farm of Naboth di Jezreelite wey he no gree sell for you. Naboth no dey alive again, he don kpeme.”

16. Wen Ahab hear sey Naboth don die, he stand up, con go claim Naboth grape-farm.

17. Naso message from Baba-God come meet Elijah wey be di Tishbite:

18. “Stand up, go met Ahab di king of Israel wey dey for Samaria. He dey for Naboth grape-farm now, he don go claim di farm.

19. Tell am sey, ‘Dis na wetin Baba-God tok: Abi you neva kill man con claim hin property?’ Den tell am sey, ‘Dis na wetin Baba-God tok: For di place where dogs take lick Naboth blood, nahin dogs go take lick your blood sef—yes, your blood!’ ”

20. Tell Ahab tell Elijah sey, “So you don fyne me, oh my enemy?” Elijah con ansa am, “I don fyne you becos you sell yousef to do evil tin for Baba-God eyes.

21. Dis na wetin Baba-Gd tok, ‘I go put kasala for your head. I go kill your pikin-pikin-pikin, con cut off everi last man komot from Ahab family for Israel—whether na slave or free pesin.

22. I go make your house be like di house of Jeroboam wey be di son of Nebat, and Baasha wey be di son of Ahija, becos you don make me vex, con make Israel sin.’

23. “Evensef, about Jezebel, Baba-God tok sey: ‘Dogs go chop Jezebel for di wall of Jezreel.

24. “Dogs go chop all di pipo wey belong to Ahab family wey die for inside di city, and birds wey dey fly for sky go chop di ones wey dey for field.”

25. No man be like Ahab, wey sell hinsef to do evil tins for Baba-God eyes, and hin wife Jezebel nahin dey ginger am.

26. He do serious tufiakwa by following idols, just like di Amorites wey Baba-God bin pursue for front of di pipo of Israel.

27. Wen Ahab hear dis words, he tear hin cloth, he wear sackcloth, con fast. He sleep wit sackcloth con dey move around wit humbleness.

28. Naso message from Baba-God come meet Elijah wey be di Tishbite:

29. “You don notice how Ahab take humble hinsef for me? Becos he don humble hinsef, I no go bring all dis kasala for hin days, but I go bring am on hin house for di days of hin son.”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website