2nd Kings

2nd Kings Chapter 1

Abeg click here to share dis post

              Baba-God Judgment On Ahaziah

  1. Afta Ahab kpeme, naso Moab change-am-for Israel.
  2. Now Ahaziah fall from di window of hin up stairs room for Samaria and he wound hinsef. So he send messengers, con tell dem sey, “Go ask Baal-Zebub, wey be di god of Ekron, to see if I go heal from dis wound.”
  3. But Baba-God angel tell Elijah di Tishbite sey, “Go up to meet di messengers of di king of Samaria, con ask dem, ‘Shey becos Baba-God no dey for Israel nahin make you dey go meet Baal-Zebub wey be di god of Ekron?
  4. So dis na wetin Baba-God yarn: ‘You no go komot from di bed wey you dey lie down. You go must surely die!’ ” So Elijah carry-go.
  5. Wen di messenger go back to meet di king, he ask dem sey, “Why una come back?”
  6. Dem ansa am, “One man come meet us, con tell us sey, ‘Go back to meet di king wey send una, con tell am sey, “Dis na wetin Baba-God tok: Shey becos God no dey for Israel nahin make you dey go meet Baal-Zebub wey be di god of Ekron? So you no go komot from di bed wey you dey lie down put. And you go must surely kpeme!” ’ ”
  7. So di king ask dem sey, “Which kain man be dat wey con tell una dis tin?”
  8. Dem ansa am, “Na man wey wear goat hair for body, and wey wear leather belt round hin waist.” So di king tok sey, “Na Elijah di Tishbite be dat.”
  9. Naso di king send one captain go meet Elijah wit fifty men. Di captain go meet Elijah wey dey sidon on top of one hill, he con tell am sey, “Man of God, di king sey make you come down.
  10. So Elijah ansa di captain, “If I true-true be man of God, make faya come down from heaven, con burn you plus your fifty men!” Naso faya just fall from heaven, con burn di captain plus hin fifty men.
  11. Afta dis, di king send anoda captain wit fifty men. Di captain tell am sey, “Man of God, dis na wetin di king tok, ‘Come down now-now-now!’ ”
  12. Elijah con ansa dem sey, “If I true-true be man of God, make faya come down from heaven con burn you plus your fifty men!” Naso faya from Baba-God come down from heaven, con burn him and hin fifty men.
  13. So di king send di third captain wit fifty men. Dis third captain go, con fall for hin knees for Elijah front. Naso he con dey beg, “Man of God, abeg respect my life plus di lives of dis fifty men wey be your servants!
  14. See, faya don fall from heaven, con burn di first two captains wit all dia fifty men. But now, make you respect my life!”
  15. Baba-God angel con tell Elijah sey, “Follow am go down, no dey fear am.” So Elijah stand up, con go down wit am—to meet di king.
  16. He tell di king sey, “Dis na wetin Baba-God tok: Shey becos God no dey for Israel nahin make you go meet Baal-Zebub wey be di god of Ekron? Becos you don do dis tin, you no go ever komot from di bed wey you dey lie down put. You go must surely die!”
  17. Naso he con die, based-on di word of Baba-God wey Elijah tell am. Becos Ahaziah no get any son, Joram take hin place as king for di second year of Jehoram wey be di son of Jehoshaphat di king of Judah.
  18. As for all di oda tins wey happun wen Ahaziah be king, and wetin he do—dem write dem for di books of history of di kings of Israel.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website