2nd Kings

2nd Kings Chapter 13

Abeg click here to share dis post

Jehoahaz As King of Israel

  1. For di twenty third year of Joash wey be di son of Ahaziah wey be king of Judah, Jehoahaz wey be di son of Jehu nahin con be king of Israel for inside Samaria, and he be king for seveneen years.
  2. He do wicked tins for Baba-God eyes by following di sins of Jeroboam wey be di son of Nebat—evil tins wey he make Israel pipo do, and he no gree komot hand from dem.
  3. So Baba-God vex for Israel like faya, and he put dem for di hand of Hazael di king of Syria and hin son Ben-Hadad—tru-out wen dem be king.
  4. Naso Jehoahaz con dey fyne Baba-God favour, and Baba-God listen to am, becos he see how di king of Syria dey oppress Israel well-well.
  5. So Baba-God bring pesin come wey go save Israel, and dem escape from di pawa of di Syrians. So di pipo of Israel live for dia own house as dem dey live before.
  6. But dem no gree komot hand from di sin of Jeroboam, di bad-bad-tins wey he make di pipo of Israel do. Dem kontinu to dey do di evil tins, evensef, di image of wood still dey for Samaria.
  7. Notin remain from di army of Jehoahaz except fifty horse-riders, ten horse-moto, plus ten thousand sojas on ground, becos di king of Syria don scata di rest of dem, con make dem be like dust for harvest ground.
  8. As for di oda tins wey happun as Jehoahaz be king, plus everitin wey he do, and hin pawa—dem write dem for di books of history of di kings of Israel.
  9. Jehoahaz rest wit hin ancestors and dem bury am for Samaria. And Jehoash wey be hin son take hin place as king.

Jehoash As King of Israel

10. For di thirty-seventh year as Joash be king of Judah, Jehoash wey be di son of Jeoahaz con be king of Israel for inside Samaria, and he reign as king for sixteen years.

11. He do evil tins for Baba-God eyes, and he no gree komot hand from any of di sins wey Jeroboam di son of Nebat commit, and wey he make di pipo of Israel commit; he kontinu to dey do dem.

12. As for di oda tins wey happun as Jehoash be king, everitin wey he do, and di war wey he fight against Amaziah wey be di king of Judah—dem write dem for di books of history of di kings of Israel.

13. Jehoash rest wit hin ancestors, and Jeroboam take hin place as king. So dem bury Jehoash for Samaria wit di kings of Israel.

14. Now Elisha con dey sick wit sickness wey kill am las-las. Jehoash wey be di king of Israel con go see am, and he cry for am. “Oh my papa! Oh my papa!” naso he dey cry. “Di horse-moto plus di horsemen of Israel!”

15. Elisha con tok sey, “Bring bow and some arrows,” naso Jehoash carry bow and some arrows come meet Elisha.

16. So he tell di king of Israel sey, “Take di bow for your hands.” Afta he carry di bow for hin hands, naso Elisha put hin hands for di king hands.

17. He con tok sey, “Open di east window.” And he open am. So Elisha tok sey, “Shoot!” And naso di king shoot. Elisha con tok sey, “Dis na Baba-God arrow of victory, and di arrow of victory wen you fight Syria, you go kill di Syrians kpatakpata for Aphek.”

18. So he tok sey, “Take di arrows,” and di king collect dem. So Elisha tell am sey, “Nack dem  for ground!” So di king carry di arrows, con nack dem for ground three times, con stop.

19. Di man of God con dey vex wit am, and he tok sey, “You for hit di ground five of six times; and naso you for win Syria con scata dem kpatakpata. But now you go win dem only three times.”

20. Elisha die and dem bury am. Some groups of Moabite dey attack di land wen di new year don dey reach.

21. Once, as some pipo of Israel dey bury one man, naso dem just see some group of pipo wey dey raid, so dem throway di man body for Elisha grave. Wen di body touch Elisha bones, di man come back to life, con stand up wit hin legs.

22. But Hazael wey be di king of Syria oppress Israel tru-out wen Jehoahaz be king.

23. But Baba-God show dem grace, con sorry-for dem, and he respect dem, becos of hin agreement wit Abraham, Isaac plus Jacob. He no gree scata dem reach today, or pursue dem komot from hin front.

24. So Hazael wey be di king of Syria kpeme, and Ben-Hadad wey be hin son take hin position as king.

25. Den Jehoash wey be di son of Jehoahaz take over some cities from Ben-Hadad, cities wey he use war take collect from hin papa Jehoahaz. Jehoash win am for war three times, and naso he take collect di cities of Israel back from am.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website