2nd Kings

2nd kings Chapter 14

Abeg click here to share dis post

Amazaiah Wey Be Di King of Judah

  1. For di second year of Jehoash wey be di son of Jehoahaz, king of Israel, Amaziah wey be di son of Joash con be king of Judah.
  2. He be twenty five years old wen he be king, and he reign for Jerusalem for twenty-nine years. Hin mama name na Jehoaddin; she come from Jerusalem.
  3. He do di right tins for Baba-God eyes, but no be like David hin papa. He follow di example of Joash hin papa for everitin.
  4. But he no gree scata di shrines for di high places, and di pipo kontinu to offer sacrifices and burn incense for there.
  5. Afta di kingdom con strong for hin hand, he kill di servants wey kill hin papa di king.
  6. But he no kill di sons of di killers, based-on wetin dem write for di Book of di Law of Moses where Baba-God tok sey: “Make dem no kill papa becos of dia pikin, or make dem kill pikin becos of dia papa; make everi pesin die for hin own sins.”
  7. Nahin be di pesin wey win ten thousand Edomites for bottom-of-di-mountain wey dem dey call Salt, and he take over Sela for war, con call am Joktheel, and na di name of di place be dat till today.
  8. Naso Amaziah send messengers go meet Jehoash wey be di son of Jehoahaz, di son of Jehu, di king of Israel—he tok sey: “Come meet me face-to-face.”
  9. But Jehoash wey be di king of Israel ansa Amaziah wey be di king of Judah; “One shuuku-shuuku flower for Lebanon send message to one cedar for Lebanon sey, ‘Give your daughter to my son make he marry her.’ Naso one wild animal for Lebanon just show-face, con march di shuuku-shuuku flower wit hin leg.
  10. You don true-true win di Edomite, and now you dey carry-shoulder. Make your victory belleful you, and stay for your house! Why you dey fyne wahala, abi you wan use your own hand take carry wahala meet you plus di pipo of Judah to fall?”
  11. But Amaziah no gree hear word, so Jehoash wey be di king of Israel attack am. Him and Amaziah wey be di king of Judah con face each oda for Bethshemesh for inside Judah.
  12. Dem beat Amaziah army [Judah], and all hin sojas run go dia house.
  13. Jehoash wey be di king of Israel con catch Amaziah di king of Judah, di son of Joash, di son of Ahaziah for Beth-shemesh. Naso Jehoash go Jerusalem con scata di wall of Jerusalem from di Ephraim gate—area wey long reach 600 feet.
  14. He carry all di gold plus silver, plus all di tins wey dem see inside Baba-God house, and for inside di stores of di palace. He still carry pipo as prisoners follow-body go Samaria.
  15. As for di oda tins wey happun wen Jehoash be king, di tins wey he do, plus hin war against Amaziah di king of Judah—dem write dem for di books of history of di kings of Israel.
  16. Jehoash rest wit hin ancestors and dem bury am for Samaria wit di kings of Israel. And Jeroboam hin son take hin place as king.
  17. Amaziah wey be di son of Joash di king of Judah live for fifteen years afta Jehoash wey be di son of Jehoahaz di king of Israel die.
  18. As for di oda tins wey Amaziah do as king—dem write dem for di books of history of di kings of Judah.
  19. Dem plan against am for inside Jerusalem, and he run go Lachish, but dem send men follow am go Lachish, con kill am for there.
  20. Na horse carry am come back, and dem bury am for Jerusalem wit hin ancestors, for inside di City of David.
  21. Naso all di pipo of Judah make Azariah king to take hin papa (Amaziah) position and he be sixteen years old.
  22. Afta hin papa rest wit hin ancestors, Azariah claim Elath for Judah again, con build am.

Jeroboam II As King of Israel

23. For di fifteenth year of Amaziah wey be di son of Joash, king of Judah—Jeroboam wey be di son of Jehoash king of Israel, con be king for inside Samaria, and he rule for forty-one years.

24. He do evil tins for Baba-God eyes and he no gree komot hand from di sins of Jeroboam wey be di son of Nebat—evil tins wey he make di pipo of Israel do.

25. Jeroboam collect back di territories of Israel from Lebo Hamath reach di Dead Sea, based-on Baba-God word, di God of Israel, wey he tok tru hin servant Jonah wey be di son of Amittai, di prophet from Gath Hepher.

26. Baba-God bin see as everi pesin for Israel dey suffer well-well; whether di pesin na slave or free pesin; no pesin dey to epp dem.

27. But no be Baba-God plan to scata di pipo of Israel kpatakpata and forever, so he use king Jeroboam wey be di son of Joash—take save dem.

28. As for di oda tins wey happun as Jeroboam be king, everitin wey he do, hin pawa, plus di wars wey he fight, and how he take collect back Damascus and Hamath wey belong to Judah, for Israel—dem write dem for di history books of di kings of Israel.

29. Jeroboam rest wit hin ancestors, di kings of Israel. And Zechariah hin pikin take hin place as king.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website