2nd Kings

2nd Kings Chapter 15

Abeg click here to share dis post

Azariah As Di King of Judah

  1. For di twenty seventh year of Jeroboam wey be di king of Israel, Azariah wey be di son of Amazaiah climb di king-chair of Judah.
  2. Na sixteen year he be wen dem make am king, and he rule for Jerusalem for fifty-two years. Hin mama name na Jecoliah; she come from Jerusalem.
  3. He do di right tins for Baba-God eyes, justs as hin papa Amaziah.
  4. But dem no gree komot di shrines, di pipo kontinu to sacrifice and burn incense for di shrines.
  5. Baba-God send leprosy to di king until di day wey he die, and he con dey stay for separate house. Jotham wey be di king son nahin con dey in charge of di palace, and he lead di pipo of di land.
  6. As for di oda tins wey happun as Azariah be king, and di tins wey he do, dem write dem for di books of history of di kings of Judah.
  7. Azariah rest wit hin ancestors, and dem bury am for di city of David wit hin ancestors. So Jotham wey be hin pikin take hin place as king.

Zechariah Di King of Israel

8. For di thirty eighth year of Azariah wey be di king of Judah, Zechariah wey be di son of Jeroboam con be di king of Israel for Samaria, and he reign for six months.

9. He do wicked tins for Baba-God eyes, as hin papa-papa-papa bin do. He no gree turn komot from di sins of Jeroboam wey be di son of Nebat, sins wey he make Israel commit.

10. So Shallum wey be di son of Jabesh plan codedly against Zechariah. He attack am for front of di pipo, he kill am, con take hin place as king.

11. Di oda tins wey Zechariah do as king, dem write dem for di books of history of di kings of Israel.

12. Na dis be Baba-God word wey he tell Jehu; “Your pikin-pikin-pikin go sidon for di king-chair of Israel reach di fourth generation.” Naso e happun.

Shallum As King of Israel

13. Shallum wey be di son of Jabesh con be king for di thirty ninth year of Uzziah as king of Judah, and he reign for Samaria for one month.

14. Naso Menahem wey be di son of Gadi komot from Tirzah go Samaria, he kill di king, con take hin place as king.

15. Di oda tins wey happun as Shallum be king, plus di evil-plan wey he do—dem write dem for di books of history of di kings of Israel.

16. Naso Menahem attack Tiphsah, from Tirzah—he attack everi pesin wey dey for there and di territory. He attack dem becos dem no gree surrender. So he attack Tiphsah, con tear di belle of everi woman wey get-belle for there.

Menahem As King of Israel

17. For di thirty-ninth year of Azariah as king of Judah, Menahem wey be di son of Gadi con be king of Israel, and he reign for inside Samaria for ten years.

18. He do evil tins for Baba-God eyes. As long as he be king, he no gree turn komot from di sins of Jeroboam wey be di son of Nebat, sins wey he make di pipo of Israel commit.

19. Naso Pul wey be di king of Assyria take over hin land, so Manahem give am 38 tons of silver to win hin support and give hinsef strong hand for di kingdom.

20. Menahem collect di moni from Israel—even everi bigman for Israel—fifty silver coins from everi single man—to give di king of Assyria. So di king of Assyria komot and he no stay for di land.

21. As for di oda tins wey happun as Menahem be king, plus everitin wey he do—dem write dem for di books of history of di kings of Israel.

22. Menahem rest wit hin ancestors. And Pekahiah wey be hin pikin take hin place as king.

Pekahiah As King of Israel

23. For di fiftieth year of Azariah as king of Judah, Pekahiah wey be di son of Menahem con be king of Israel for inside Samaria, and he rule for two years.

24. Pekahiah do evil tins for Baba-God eyes. He no gree turn komot from di sins of Jeroboam wey be di son of Nebat, sins wey he make di pipo of Israel commit.

25. One of hin main officers, Pekah wey be di son of Remaliah, con plan codedly against am. He take fifty men of Gilead wit am, and he kill Pekahiah, along wit Argrob plus Arieh for di strong-house of di palace for Samaria. Naso Pekah take kill Pekahiah, con take hin place as king.

26. Di oda tins wey happun as Pekahiah be king plus di tins wey he do—dem write dem for di books of history of di kings of Israel.

Pekah As King of Israel

27. For di fifty two years of Azariah as king of Judah, Pekah wey be din son of Remaliah con be king of Israel for inside Samaria, and he reign for twenty years.

28. He do evil tins for Baba-God eyes. He no gree turn komot from di sins of Jeroboam wey be di son of Nebat, sins wey he make di pipo of Israel commit.

29. For di time of Pekah as king of Israel, Tiglath-Pileser wey be di king of Assyria come, con take-over Ijon, Abel Beth Maacah, Janoah, Kedesh, plus Hazor. He take Gilead plus Galilee, plus all di land of Naphtali, and he carry di pipo as prisoners go Assyria.

30. Naso Hosea wey be di son of Elah plan codedly against Pekah wey be di son of Remaliah. He attack am, con kill am, and he take hin place as king—for di twentieth years of Jotham wey be di son of Uzziah.

31. As for di oda tins wey happun as Pekah be king, plus di tins wey he do—dem write dem down for di book of history of di kings of Israel.

Jotham As King of Judah

32. For di second year of Pekah wey be di son of Remaliah—king of Israel, Jotham wey be di son of Uzziah wey be di king of Judah con start to rule as king.

33. He be twenty five years old wen dem make am king, and he rule for Jerusalem for sixteen years. Hin mama name na Jerusha and she be di daughter of Zadok.

34. He do di right tins for Baba-God eyes, just as hin papa Uzziah bin do.

35. But dem no gree komot di shrines, so di pipo kontinu to dey sacrifice and burn incense for there. Jotham build di highest gate wey dey for Baba-God house.

36. As for di oda tins wey happun as Jotham be king, and di tins wey he do—dem write dem for di books of history of di kings of Judah.

37. For those days, Baba-God con start to dey send Rezin wey be di king of Syria, plus Pekah wey be di son of Remaliah—against Judah.

38. Jotham rest wit hin ancestors and dem bury am wit hin ancestors for di city of David hin papa. Naso Ahaz hin pikin take hin place as king.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website