2nd Kings

2nd Kings Chapter 19

Abeg click here to share dis post

Isaiah Give Hezekiah Assurance

  1. Wen king Hezekiah hear dis tin, he tear hin cloth, con wear sackcloth, and he enta inside Baba-God house.
  2. He send Eliakim wey dey in charge of di palace, Shebna wey be di writer (secretary) and di senior priests, all of dem wear sackcloth—he send dem go meet Isaiah di prophet wey be di son of Amoz.
  3. Dem tell am sey, “Dis na wetin Hezekiah tok: Today na day of wahala, punishment plus disgrace. We be like woman wey wan born pikin but she no get enuff pawa to push di pikin come out.
  4. Di Assyrian king don send hin official to insult Baba-God wey dey alive. Maybe Baba-God your Oga fit hear dis insults, con punish di pipo wey tok dem. So pray to Baba-God for those of awa pipo wey remain.”
  5. Wen king Hezekiah servants come meet Isaiah,
  6. Isaiah tell dem sey, “Make una tell una oga sey, ‘Dis na wetin Baba-God tok: No let fear catch you becos of di words wey you don hear, wey di servants of Assyria take insult me.
  7. Listen! I go send one kain spirit enta am, he hear one kain message, con go back to hin own kontri, and I go make am die by sword for there.’ ”
  8. Wen Rabshakeh hear sey di king of Assyria don komot from Lachish, he go back, con see sey di king dey fight against Libnah.
  9. Now Sennacherib receive message sey, Tirhakah wey be di Ethiopian king dey come attack am: he send messengers again go meet Hezekiah wit dis words,
  10. “Tell Hezekiah wey be di king of Judah: Make you no let di God wey you dey depend on deceive you wen he tok sey, ‘Jerusalem no go fall enta di hand of di king of Assyria.’
  11. Surely, you don hear wetin di kings of Assyria don do to all di kontris, as he take scata dem kpatakpata. And you dey safe so?
  12. Abi di gods of di nations wey my papa-papa-papa scata save dem: di gods of Gozan, Haran, Rezeph and di pipo of Eden wey bin dey for Telassar?
  13. Where di king of Hamat dey, di king of Arpad, di king of di city of Sepharvaim, or di king of Hena or Ivvah?”

Di Prayer of Hezekiah

14. Hezekaih receive di letter from di messengers and he read am. Naso he go Baba-God house, con spread di letter open for Baba-God.

15. And Hezekiah pray to Baba-God: “Chai Baba-God, God of Israel wey sidon for di king-chair between di cherubim, na only you be Baba-God wey dey rule all di kingdoms of di world. Na you make di heavens plus di earth.

16. Listen oh Baba-God, and make you hear, open your eyes, chai Baba-God, and make you see, listen to di words wey Sennacherib send to insult Baba-God wey dey alive.

17. “No be lie, Oh Baba-God, di king of Assyria don turn di nations and dia lands to waste.

18. Dem don burn dia gods wit faya; but dem no be gods, but dem just be wood plus stone, na sometin wey men make wit dia hand—nahin make dem scata dem.

19. Now, Oh Baba-God wey be awa Oga, save us from hin hand, so dat all di kingdoms of di earth go sabi sey na only you be God—Oh Baba-God.

Isaiah Prophesy Against Assyria

20. Naso Isaiah wey be di son of Amoz send message go meet Hezekiah sey: “Dis na wetin Baba-God, di God of Israel tok: I don hear your prayer against Sennacherib—di king of Assyria.

21. Dis na di word wey Baba-God don tok against am: ‘Di virgin Daughter of Zion hate you and she dey yab you wit laff, di daughters of Jerusalem dey shake dia head for you for your back.

22. Who you tink sey you don insult and down-grade? Who you raise your voice against con see-finish wit your big eyes wey dey up? Abi no be against di Holy One of Israel?

23. Your messengers don bring message wey insult Baba-God. And you don tok sey, “I don climb di highest place for di mountain wit my plenty horse-moto, to di sides of Lebanon, and I go cut down di tall cedar trees from there; I go cut di best fir trees. I go reach di borders wey far pass, con enta di deep-deep forests.

24. I don dig wells for foreign land, and I don drink water for there. I don use bottom of my leg my leg take dry di small-rivers of Egypt.”

25. ‘Abi you neva hear? Tey-tey nahin I decide am. I plan am since olden days, and now I don make am happun—sey you go beat strong cities and to turn dem to scata-scata wey for ground.

26. Nahin make dia pipo no get pawa and dem dey fear well-well, con dey confused. Dem be like grass for field, dem be like green herbs, dem no-strong like grass wey dey grow on top of house, wey sun dey burn before e even fit produce flower or grow.

27. ‘But I know where you dey stay, and wen you dey komot and wen you dey enta, and how you take dey vex for me.

28. Becos you dey para for me, and your disrespect don reach my ears, I go put my hook for your nose, con put my bit for your mouth, and I go make you go back from di road wey you pass come.’

29. ‘Na dis go be di sign for you, Oh Hezekiah: ‘Dis year, you go chop wetin dey grow by esef, and  for di second year, you go chop wetin grow from am. But for di third year, you go plant food, con harvest dem; una go plant grape-farms, con chop dia fruits.

30. Again, di root of di pipo wey remain from di house of Judah—go enta ground, con produce fruit for up.

31. Becos na from inside Jerusalem pipo wey remain go come out from, and pipo wey survive go show from di mountain of Zion. Di energy of Baba-God Almighty nahin go do am.

32. “So dis na wetin Baba-God tok about di king of Assyria: He no go enta dis city or shoot any arrow for here. He no go come face di city wit shields, or build wall to enta di city.

33. Na di road wey he follow come nahin he go pass go; he no go enta dis city,’ naso Baba-God tok,

34. ‘I go defend dis city and I go save am, becos of me and sake of my servant David.”

35. Dat night, Baba-God angel komot, con kill one hundred and eighty five thousand men for inside di Assyrian pipo camp. Wen di pipo stand up di next morning na so-so deadbody con full everi where.

36. So king Sennacherib of Assyria komot, con go back to Nineveh.

37. One day wen he dey worship for di shrine of hin god Nisroch, two of hin sons, Adrammelech plus Sharezer kill am wit dia swords, con escape go di land of Armenia. Naso anoda of hin son, Esarhaddon take hin position as king.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website