2nd Kings

2nd Kings Chapter 2

Abeg click here to share dis post

Elijah Move Go Heaven

  1. Wen Baba-God wan carry Elijah go heaven for inside rolling-breeze, Elijah plus Elisha dey komot from Gilgal.
  2. Elijah con tell Elisha sey, “Abeg stay for here; Baba-God don send me go Bethel.” But Elisha tok sey, “As surely as Baba-God dey alive, and you dey alive, I no go leave you.” So dem go Bethel togeda.
  3. Di group of prophets wey dey for Bethel come out to ask Elisha sey, “You know sey Baba-God go carry your oga komot from your side today?” Elisha con ansa dem sey, “Yes I know, but make una no tok about am.”
  4. Naso Elijah tell am sey, “Stay for here Elisha, Baba-God don send me go Jericho. And he ansa am, “As surely as Baba-God dey alive, and you sef dey alive, I no go leave you.” So dem go Jericho togeda.
  5. Di son of prophets for Jericho go meet Elisha con ask am sey, “You know sey Baba-God go carry your oga komot from your side today?” Elisha con ansa dem sey, “Yes I know, but make una no tok about am.”
  6. Naso Elijah tell am sey, “Dey for here, Baba-God don send me go Jordan.”  But Elisha tok sey, “As surely as Baba-God dey alive, and you sef dey alive, I no go leave you.” So dem carry-go.
  7. Fifty men of di sons of prophets go, con stand far-far, dem face di place where Elijah plus Elisha stop for Jordan.
  8. Elijah carry hin cloth, he roll am, con nack di water wit am. Naso di water just separate to right and left, and di two of dem cross to di oda side for dry ground.
  9. Wen dem don cross, Elijah con tell Elisha sey, “Tell me, wetin I fit do for you, before Baba-God go carry me komot from you?” So Elisha ansa, “Make I get times two of your spirit.”
  10. Elijah tok sey, “You don ask for hard tin, but if you see me wen I dey komot from you, e go belong to you—or else, no be so.”
  11. E con happun sey, as dem dey yarn, naso one horse-moto wit faya just show, con separate di two of dem, and Elija move go heaven inside one rolling-breeze.
  12. Elisha see dis tin, con cry out, “My papa, my papa! Di horse-moto and horsemen of Israel!” And Elisha no see am again. Naso he carry hin own cloth, con tear dem.
  13. He carry di cloth wey fall from Elijah con go back go stand near River Jordan.
  14. So he carry di cloth wey fall from am Elijah con use am nack di water. Naso he ask, “Where di God of Elijah now?” Wen he nack di water, di water separate go right and left, and he cross to di oda side.
  15. Di sons of di prophets from Jericho wey dey watch, con tok sey, “Di spirit of Elijah don dey on Elisha.” Naso dem go meet am, con bow face ground for hin front.
  16. Dem tok sey, “Look, we your servants get fifty strong men. Make dem go fyne your oga. Maybe Baba-God spirit don carry am go put for one mountain, or bottom of one mountain.” So he tok sey, “Make una no send any pesin.”
  17. But dem kontinu to dey ask am sote shame con catch am to agree, and las-las he tok sey, “Okay, send dem.” So dem send fifty men to go fyne Elijah for three days, but dem no see am.
  18. Wen dem come back to Elisha wey dey stay for Jericho, he tell dem sey, “Abi I no tell una sey make una no go?”

Healing of Di Water

19. Di men of di city con tell Elisha sey, “Look, awa oga, di city dey for correct position, as you dey see so, but di water no good and di land no dey gree produce tins.”

20. Elisha con tok sey, “Give me bowl, con put salt inside am.” So dem carry di bowl plus salt come meet am.

21. Naso he go di water wey dey flow, con pour salt for there, and he tok sey, “Dis na wetin Baba-God tok, ‘I don heal dis water. Dis water no go make pipo die again, or make di land no gree produce anytin.’ ”

22. Naso di water con good till today, based-on di word wey Elisha tok.

Dem Use ElishaTake Play

23. From there Elisha komot go Bethel. As he dey waka for road, some small-small pikin come from di city, con dey yab am. “Waka dey go, you gorimakpa-head! Waka dey go, you gorimakpa-head!”

24. He turn round, he look dem, con curse dem wit Baba-God name. Naso two female bears just come out from di forest, con wound forty-two of di small-small pikin.

25. So he carry-go Mountain Carmel, and from there he go back to Samaria.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website