Proverbs (Pidgin Bible)

2nd Kings Chapter 20

Abeg click here to share dis post

              Hezekiah Sickness

  1. Those days, Hezekiah con dey sick sote he wan even kpeme. Prophet Isaiah—di son of Amoz go meet am, con tell am sey, “Dis na wetin Baba-God tok: Arrange your house becos you go soon die; and you no go live.”
  2. Hezekiah turn face wall, con start to dey pray to Baba-God,
  3. “Oh Baba-God my Oga, remember as I take waka for your front wit truth and wit my full-heart, and I don do wetin dey good for your eyes.” And Hezekiah cry well-well.
  4. E con happun sey before Isaiah komot from di middle of di yard, message from Baba-God come meet am sey,
  5. “Go back make you go tell Hezekiah di leader of di pipo sey, ‘Dis na wetin Baba-God—di Oga of your ancestor David tok: I don hear your prayer, con see di water for your eyes; see, I go heal you. Three days from now, you go go Baba-God house.
  6. I go add fifteen years join your life. And I go save you plus dis city from di hands of di king of Assyria. I go defend dis city sake of my name, and sake of my servant David.’ ”
  7. Naso Isaiah tok sey, “Arrange cream wit figs.” So Hezekiah servants rub di cream on top of di boil, and Hezekaiah con dey alright!
  8. Hezekiah bin ask Isaiah sey, “Wetin go be di sign sey Baba-God go heal me and sey I go go Baba-God house three days from now?”
  9. Isaiah con ansa am sey, “Dis na di sign from Baba-God, sey Baba-God go do wetin he don promise: Make di shadow move ten steps go front, abi make e move ten steps go back?”
  10. Hezekaiah con tok sey, “Na simple mata for di shadow to move ten steps go front, instead of make e move go back wit ten steps.”
  11. Naso prophet Isaiah call Baba-God, and Baba-God make di shadow go back ten steps for di shadow-clock of Ahaz.

Hezekiah Make Mouth About Di Tins Wey He Get

12. Around dat time, Merodach-Baladan wey be di son of Baladan—di king of Babylon send letters plus gift to Hezekiah, becos he bin hear sey Hezekiah dey sick.

13. Hezekiah receive di messengers, con show dem everi beta tin wey dey inside hin store—di silver, di gold, di spices, plus di beta ororo, hin weapon-house, plus everitin wey dey among di beta-beta-tins wey he get. E no get anytin wey dey for di palace or di kingdom wey Hezekiah no show dem.

14. Naso Isaiah di prophet go meet Hezekiah, con ask am sey, “Wetin those men tok, and where dem come from?” So Hezekiah ansa am, “Dem come from far-far, from Babylon.”

15. So di prophet ask Hezekiah sey, “Wetin dem see for inside your palace?” So Hezekiah tok sey, “Dem see everitin wey dey inside my palace, e no get anytin among di beta-beta-tins wey I get wey I no show dem.”

16. Isaiah con tell Hezekiah sey, “I wan make you hear Baba-God word:

17. “Time dey surely come wen everitin wey dey for inside your palace, plus everitin wey your papa-papa-papa bin keep reach today—time dey come wen dem go carry dem go Babylon. Notin go remain—naso Baba-God tok.

18. And some of your sons, your own flesh and blood wey dem born enta your family—dem go carry dem go, and dem go turn to eunuchs* wey go serve for inside di palace of di king of Babylon.”

19. Naso Hezekiah ansa am sey, “Baba-God word wey you don tok dey good.” Becos he bin reason sey, “Abi e no good if peace plus truth dey for my days?”

20. As for di oda tins wey Hezekiah do as king, and hin pawa, and how he make di pools plus di tunnel wey he use take carry water enta di city—dem write dem for di books of history of di kings of Judah.

21. Hezekiah rest wit hin ancestors, and Manasseh he son—take hin place as king.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website