2nd Kings

2nd Kings Chapter 21

Abeg click here to share dis post

Manasseh As King of Judah

  1. Manasseh na twelve years old wen dem make am king, he reign for Jerusalem for fifty-five years. Hin mama name na Hephzibah.
  2. He do wicked tins for Baba-God eyes, he copy di mumu traditions of di nations wey Baba-God bin pursue komot from front of di pipo of Israel.
  3. He build di shrines wey hin papa Hezekiah bin scata; he still build altars for Baal and he build image of Asherah, just as Ahab di king of Israel bin do. He bow down to all di stars, con worship dem.
  4. He build altars for inside Baba-God house of which Baba-God tok sey, “Na Jerusalem I go put my Name.”
  5. He build altars for all di stars of heaven—for inside di two yards for Baba-God house.
  6. He sacrifice hin own son for inside faya. He do jazz and otumorkpor, con meet pipo wey dey tok to dead pipo, he even run tins wit witch. He do plenty bad-bad-tins for Baba-God eyes, to make Baba-God vex.
  7. Manasseh even put di image of di goddess of Asherah inside Baba-God house, for di place wey Baba-God bin tell David and Solomon hin pikin—sey, “My Name go get respect forever for dis worship-place and inside Jerusalem—di city wey I don choose from among all di tribes of Israel.
  8. I no go make di legs of di pipo of Israel waka komot again—from di land wey I don give dia papa-papa-papa, if only dem go cool down to do everitin wey I don tell dem to do, con keep di whole Law wey my servant Moses give dem.”
  9. But di pipo no gree listen. Manasseh make dia eyes shuuk to do more evil tins pass di nations wey Baba-God scata from front of di pipo of Israel.
  10. So Baba-God tok tru hin servants wey be di prophets:
  11. “Manasseh wey be di king of Judah don do all dis tufiakwa. He don do plenty wicked tins pass di Amorite wey bin dey before am, and he don make Judah commit sin wit hin idols.
  12. So dis na wetin Baba-God di Oga of Israel tok: See, I go bring one kain gbege for Jerusalem plus Judah sote any pesin wey hear am—hin ears go scratch am.
  13. I go judge Jerusalem wit di same level wey I use take judge Samaria, and di same level wey I use for di family of Ahab. I go wipe di pipo of Jerusalem komot as pesin take dey wash dirty komot from plate. I go wash di plate, con turn dem upside down.
  14. I go fashi di pipo wey remain among my pipo wey belong to me, con carry dem give dia enemies. All dia enemies go steal from dem, con rob dem,
  15. becos dem do evil tins for my eyes, con make me vex—from di day wey dia ancestors komot from Egypt reach today.”
  16. Evensef, Manasseh shed plenty innocent blood, sote dem brekete for Jerusalem from one side reach di oda side—apart from di sins wey he make Judah commit by doing evil tins for Baba-God eyes.
  17. As for di oda tins wey happun wen Manasseh be king, plus everitin wey he do, plus di bad-bad-tins wey he do—dem write dem for di books of history of kings of Judah.
  18. Manasseh rest wit hin ancestors and dem bury am for di palace garden, di garden of Uzza. So Amon wey be hin pikin take hin place as king.

Ammon As King of Judah

19. Amon na twenty-two years old wen dem make am king, and he reign for Jerusalem for two years. Hin mama name na Meshullemeth and she be di pikin of Haruz from Jotbah.

20. He do evil tins for Baba-God eyes, as hin papa Manasseh bin do.

21. He waka for all di ways of hin papa; he worship di idols wey hin papa bin dey serve, con bow down to dem.

22. He fashi Baba-God wey be di Oga of hin ancestors, and he no gree follow Baba-God way.

23. Amon servants plans codedly against am, con kill am for inside hin palace.

24. Naso di pipo of di land kill all di pipo wey plan against king Amon, and dem make Josiah wey be hin pikin, di king to take hin place.

25. As for di oda tins wey Amon do wen he be king, dem write dem for di books of history of di kings of Judah.

26. Dem bury am for hin grave for inside di garden of Uzza, and Josiah wey be hin pikin take hin place as king.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website