1st Chronicles

1st Chronicles Chapter 23

Abeg click here to share dis post

Di Levites

  1. Wen David don old, and hin years don brekete, he crown hin pikin Solomon as king of Israel.
  2. He gada all di princes of Israel, and di priests plus di Levites.
  3. He count di Levites wey be from thirty years old go up, and all di men na 38,000.
  4. David con tok sey, “Out of dis ones, 24,000 dem go control di work for Baba-God house, and 6,000 go be officials plus judges.
  5. 4,000 go dey guard di gates, and 4,000 go dey praise Baba-God wit music instrument wey David make—to praise Baba-God.
  6. So David organize di Levites for groups based-on di sons of Levi:  Gershom, Kohath, plus Merari.

Gershonites

7. Dis ones belong to di Gershonites: Ladan plus Shimei.

8. Dis na di sons of Ladan: Jehiel na di firstborn, den Zetham plus Joel—all of dem na three. Na dis be di head of di families of Ladan.

9. Dis na di sons of Shimei: Shelomoth, Haziel plus Haran—all of dem na three. Na dem be di heads of di families of Ladan.

10. And di sons of Shimei na: Jahath, Ziza, Jeush plus Beriah. Na dis be di sons of Shimei—all of dem na four.

11. Jahath nahin be di first and Ziza na di second, but Jeush plus Beriah no get many sons, so dem count dem as one family.

Di Kohathites

12. Dis na di sons of Kohath: Amram, Izhar, Hebron plus Uzziel—all of dem na four.

13. Dis na di sons of Amram: Aaron plus Moses. Dem separate Aaron forever, him and hin pikin-pikin-pikin—to bless di most holy tins for Baba-God, to burn incense for Baba-God front, to serve Baba-God, and to pray for blessings wit hin name forever.

14. Dem count di sons of Moses wey be man of God as part of di tribe of Levi.

15. Dis na di sons of Moses; Gershom plus Eliezer.

16. Di leader among Gershom sons na Shubael.

17. Dis na di son of Eliezer. Rehabiah di chief. Eliezer no get any oda son, but Rehabiah sons plenty well-well.

18. From di sons of Izhar: Shelomith di firstborn.

19. Dis na di sons of Hebron: Jeriah nahin be di first, Amariah nahin be di second, Jahaziel nahin be di third plus Jekameam nahin be di fourth.

20. Dis na di sons of Uzziel: Micah nahin be di first and Jesiah nahin be di second.

Di Merarites

21. Dis na di sons of Merari: Mahli plus Mushi. Dis na di sons of Mahli: Eleazar plus Kish.

22. Eleazar die wit no son: na only daughters he get. So dem marry dia cousins wey be di sons of Kish.

23. Dis na di sons of Mushi: Mahli, Eder plus Jerimoth—all of dem na three.

24. Na dis be di sons of Levi by dia families—even di head of di families wey dem count one-one by dia names—those wey be twenty years go up, and wey work for di service of Baba-God house.

25. David con tok sey, “Baba-God di Oga of Israel don give rest to hin pipo, and dem go stay for Jerusalem forever,

26. And even di Levites—no need to carry di worship-place again, or any of di tins wey dem dey use for service.

27. Based-on di last words of David, dem register di Levites for service—from twenty years go up:

28. Becos di work of di Levites na to epp Aaron sons to serve for Baba-God house, dem dey in charge of all di yard and rooms, di cleaning of di holy tins, plus any work for di service of Baba-God house.

29. Na dem dey in charge of di bread wey dey for di table, di fine flour for di seed offering, di thin cake of di bread wit no yeast, di tins wey dem dey bake for pan, di tins wey dem dey fry, plus everi kind of measurement and size.

30. Evensef, dem dey stand everi mor-mor to tank and praise Baba-God. Dem suppose do di same tin for evening,

31. and to epp wit all di burnt sacrifices wey pipo dey give to Baba-God—on Sabbath dey, for New Moon festivals, and for oda festivals. Based-on di law, di correct numbas of Levites suppose serve for Baba-God front everi time.

32. Make di Levite do dia work for di worship-place, and for di holy-place, and to epp dia brodas wey be di sons of Aaron—for di service of Baba-God house.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website