2nd Chronicles

2nd Chronicles Chapter 11

Abeg click here to share dis post

Rehoboam As King of Judah

  1. Wen Rehoboam reach Jerusalem, he gada 180,000 sojas wey sabi fight well-well, from Judah and Benjamin, to attack di pipo of Israel, con bring back di kingdom to Rehoboam.
  2. But Baba-God tell Shemaiah di prophet, sey,
  3. “Tell King Rehoboam wey be di son of Solomon of Judah, and to all di pipo of Israel wey dey for Judah plus Benjamin, sey:
  4. ‘Dis na wetin Baba-God tok: “Make una no go attack and fight war wit una brodas. Make all of una dey go back to una house, becos na me make dis tin happen.”’” So dem obey Baba-God word, con stop di attack against Jeroboam.

Rehoboam Make Di Cities Strong Well-well

5. Rehoboam live for Jerusalem; he build dis strong cities wit wall tru-out  Judah:

6. He build even Bethlehem, plus Etam, and Tekoa,

7. Beth Zur, Soco, plus Adullam,

8. Gath, Mareshah, and Ziph,

9 Adoraim, Lachish, plus Azekah,

10. Zorah, Aijalon, and Hebron. Na dis be di strong cities wit wall—for Judah and Benjamin.

11. He make dis cities strong, con build dia wall, and he put officers for there, and even store-houses for food, ororo, and wine.

12. He put shields plus long-sharp-weapons for dis cities; he con make dis cities strong well-well. So only Judah plus Benjamin nahin he con dey control.

Di Priests Plus Di Levites Move Go Judah

13. Di priests plus di Levites wey dey stay tru-out Israel support am, no mata where dem dey stay.

14. Di Levites even leave dia farmland plus dia property, and dem come Judah and Jerusalem, becos Jeroboam and hin sons stop dem from serving as priests for Baba-God.

15. Jeroboam choose hin own priests to serve for di worship places and to do di worship of di goat idols [devils], plus idols wey resemble small-malu, wey he don make.

16. Those among all di tribes of Israel wey don zero dia mind to worship Baba-God of Israel, follow dem go Jerusalem to sacrifice to Baba-God wey be di Oga of dia papa-papa-papa.

17. Dem support di kingdom of Judah, and dem make Rehoboam, son of Solomon—strong for three years; dem follow di laws of David and Solomon  for three years.

     Di Family of Rehoboam

18. Rehoboam marry hin cousin Mahalath, wey be di daughter of David son, Jerimoth, and he still marry Abihail wey be di daughter of Eliab di son of Jesse;

19. Mahalath born sons, and dia names na; Jeush, Shemariah, plus Zaham.

20 He lata marry anoda of hin cousin, Maacah wey be di grand-daughter of Absalom. She born Abijah, Attai, Ziza, and Shelomith—for am.

21. Rehoboam love Maacah wey be di daughter of Absalom, pass hin oda wives and side-chicks. He get eighteen wives plus six side-chicks; he born twenty-eight sons plus sixty daughters.

22. Rehoboam choose Abijah wey be di son of Maacah, as di leader of hin brodas, becos he bin plan to make Abijah take-over di king-chair afta am.

23. He use sense take put some of hin plenty sons tru-out di territories of Judah plus Benjamin, inside di different strong cities. He give dem evertin  wey dem want wit food wey brekete, and he marry plenty wives for dem.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website