2nd Chronicles

2nd Chronicles Chapter 12

Abeg click here to share dis post

      Egypt Attack Judah

  1. E con happun sey, afta Rehoboam govment stand strong gidigbam, naso  him plus all di pipo of Israel fashi Baba-God law.
  2. Becos dem no dey faithful to Baba-God, for di fifth year of King Rehoboam, naso King Shishak of Egypt attack Jerusalem.
  3. He get 1,200 horse-moto, 60,000 horse-riders, and plenty sojas wey dem  no fit count—follow am from Egypt, even Libyans, Sukkites, and Ethiopians [Africans].
  4. He take-over di strong cities of Judah, and he con attack Jerusalem.
  5. Naso Shemaiah wey be di prophet come meet Rehoboam, plus di leaders  of Judah wey gada for Jerusalem becos of Shishak. He con tell dem sey, “Dis na wetin Baba-God tok: ‘Una don fashi me, so me sef don fashi una, and I go carry una give Shishak.’”
  6. Di leaders of Israel plus di king, con humble demsef, and dem tok sey, “Baba-God get clean-heart.”
  7. Wen Baba-God see sey dem don sempe for am, he give dis message to Shemaiah: “Dem don humble demsef for me, so I no go scata dem. I go save dem.  I no go use Shishak take scata Jerusalem becos I dey vex for dem.
  8. But dem go turn to hin servants, so dat dem go fit experience di difference between serving me—from serving di nations wey dey around.”
  9. So king Shishak of Egypt attack Jerusalem, and he carry di beta-beta-tins wey dey for di stores of Baba-God house plus di king palace; he carry everitin, even di gold shields wey Solomon bin make.
  10. King Rehoboam make bronze shields to replace dem, and he give dem to di chief of di king guards wey dey guard di gates of di king palace—to dey in charge of dem.
  11. Any time wey di king visit Baba-God house, di king guards go carry dem, and dem go lata carry dem go di guardroom.
  12. So wen Rehoboam calm down from hin ways, Baba-God stop to dey vex, and he no wipe am out; so Judah see some beta days.

Di End of Rehoboam As King

13. King Rehoboam make hin govment stand gidigbam for Jerusalem; na forty-one years old wen he climb di king-chair and he rule for seventeen years for Jerusalem, di city wey Baba-God choose from all di tribes of Israel to be place for hin name. Rehoboam mama na from Ammon and her name na Naamah.

14. He do evil tin becos he no set hin mind to follow Baba-God.

15. As for di tins wey happun wen Rehoboam be king, from starting to ending, dem write dem for di books of History of Shemaiah di prophet, and di Book of Iddo di prophet about di history of di generations. Naso Jeroboam and Rehoboam dey always fight wars.

16. So Rehoboam die, and dem bury am for di City of David. Hin son Abijah, con take hin place as king.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website