2nd Chronicles

2nd Chronicles Chapter 17

Abeg click here to share dis post

Jehoshaphat Na King

  1. Asa son Jehoshaphat, take Asa place as king, and he make hin govment strong against Israel.
  2. He put sojas for di whole of Judah strong cities wey get wall, and he position sojas for di whole land of Judah—wit di cities of Ephraim wey hin papa Asa bin seize.
  3. Baba-God con dey wit Jehoshaphat, becos he follow di way of hin ancestor David—from wen he climb di king-chair as king, and he no follow Baalim,
  4. but, he follow Baba-God of hin ancestors, con obey wetin Baba-God tell  am to do; he no behave like di pipo of Israel.
  5. Naso Baba-God make hin kingdom stand gidigbam for hin hand; and all di pipo of Judah bring gifts come meet Jehoshaphat. He con get moni well-well and dem respect am well-well .
  6. He follow Baba-God ways; evensef, he komot di idol shrines and di images of Asherah—from Judah.
  7. For di third year wen he be king, he send hin leaders; Ben-Hail, Obadiah, Zechariah, Nethanel, and Micaiah to teach for inside di cities of Judah.
  8. Di Levites; Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, and Tob-Adonijah, and di priests Elishama plus Jehoram—follow dem sef.
  9. Dem teach pipo for di whole of Judah, dem carry di Books of di Law of Baba-God follow body. Dem travel go all di cities of Judah and dem teach di pipo.
  10. Naso Baba-God put fear inside all di kingdoms wey dey around Judah, so dem no fit fight war wit Jehoshaphat.
  11. Some of di Philistines bring gift for Jehoshaphat, wit silver as tax. Di Arabs bring 7,700 rams plus 7,700 goats for am sef.
  12. Jehoshaphat kontinu to dey get more-more pawa. He build strong-houses and cities where he dey store tins for di whole of Judah.
  13. He get plenty business for di cities of Judah, and he get army wit plenty  strong sojas wey sabi fight well-welll, for inside Jerusalem.
  14. Na dis be dia numbas based-on dia papa house: Adnah wey be di commander of di sojas from Judah, dey lead 300,000 men wey sabi fight  well-well.
  15. And next to am na Jehochanan di commander wit 280,000 sojas.
  16. Afta am na Amasiah wey be di son of Zikri, wey use free-mind take serve Baba-God, he dey lead 200,000 strong sojas wey sabi fight well- well.
  17. From Benjamin, Eliada, wey sabi fight well-well, wit 200,000 men wey get bow and arrow, and shields,
  18. and Jehozabad lead 180,000 fighters wey ready for war.
  19. Na all dis ones serve di king, apart from di ones wey di king put for di  strong cities for di whole of Judah.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website